અમદાવાદ જિલ્લા પંચાયતની સિંગરવા અને ભુવાલડી બેઠક કોંગી ઉમેદવારના ફોર્મ રદ કરાયા છે. ભાજપના ઉમેદવારની જીત
અમદાવાદ જિલ્લા પંચાયતને લઇ મોટા સમાચાર
જિ.પંચાયતની 2 બેઠકો પર ભાજપની જીત
અમદાવાદ જિલ્લા પંચાયતમાં કોંગ્રેસને મોટો ઝટકો
અમદાવાદ જિલ્લા પંચાયતની બે બેઠકોને લઈ કોંગ્રેસની માઠી બેઠી છે. મતદાન પહેલા જ જિલ્લા પંચાયતની 2 બેઠકો પર ભાજપની જીત નોંધાઈ ચૂકી છે. જિલ્લા પંચાયતની 2 બેઠકો પર કોંગ્રેસના ફોર્મ રદ કરવામાં આવ્યા છે. અમદાવાદ જિલ્લાની સિંગરવા અને ભુવાલડી બેઠક કોંગી ઉમેદવારના ફોર્મ રદ કરાયા છે.
શા માટે રદ કરાયા ફોર્મ
મતદાન પહેલા જ કોંગ્રેસને મોટો ઝ્ટકો લાગ્યો છે. બે બેઠક પર કોંગ્રેસના ઉમેદવારના ફોર્મ રદ કરાયા છે. જેમાં સિંગરવા બેઠક પર કોંગ્રેસના ઉમેદવારના ઘરે શૌચાલય ન હતું. જેના કારણે શૌચાલય ન હોવાથી ભાજપે વાંધો ઉઠાવ્યો હતો. તો બીજી તરફ ભુવાલડીના ઉમેદવારે ફોર્મમાં પક્ષનું નામ લખ્યું ન હતું. આ કારણથી ભુવાલડી બેઠક પર કોંગ્રેસના બુધાજી ઠાકોરનું ફોર્મ રદ કરાયું છે. સ્થાનિક સ્વરાજની ચૂંટણીમાં પહેલા જ ભાજપ અનેક બેઠક પર બિનહરિફ ચૂંટાઈ રહી છે. અને ઉપરથી કોંગ્રેસના ઉમેદવારોની ભૂલના કારણે ભાજપને વધુ ફાયદો પહોંચી રહ્યો છે.
જાણો ઉમેદવાર માટે શું છે નિયમ
સ્થાનિક સ્વરાજની ચૂંટણીની જાહેરાત બાદ રાજ્ય ચૂંટણી પંચે વધુ એક જાહેરનામું રજૂ કર્યું છે. ઉમેદવારની વ્યવસ્થા અને કૌટુંબિક જીવનની માહિતી આધારે ઉમેદવારી નોંધાવવી પડશે. જે ઉમેદવારના રહેઠાણમાં શૌચાલય નહીં હોય તો ફોર્મ સ્વીકાર કરાશે નહીં. આ સાથે જે ઉમેદવારને 2થી વધુ બાળકો હશે. તે પણ ઉમેદવારી માટે યોગ્ય ગણાશે નહીં. સાથે જાહેરનામાને અવગણીને પણ જે ઉમેદવારી નોંધાશે. તેમને ગેરલાય ઠેરવવામાં આવશે.
રાજ્યની 31 જિલ્લા પંચાયત, 231 તાલુકા પંચાયત, કચ્છની પાંચ સહિત 80 નગરપાલિકા અને 6 મહાનગરપાલિકાનો ચૂંટણી કાર્યક્રમ જાહેર થઈ ગયો છે. છ મહાનગરપાલિકાઓની ચૂંટણી 21 ફેબ્રુઆરી તેમજ નગરપાલિકા, તાલુકા, જિલ્લા પંચાયતોની ચૂંટણીનું મતદાન 28 ફેબ્રુઆરીએ સવારે સાતથી સાંજે છ વાગ્યા સુધી થશે. જેના માટે 6990 ઇવીએમનો ઉપયોગ કરવામાં આવશે.
રાજ્ય ચૂંટણી આયોગ દ્વારા આગામી સ્થાનિક સ્વારાજ્યની ચૂંટણીને લઈને ચૂંટણીના પ્રચારના ખર્ચને લઈને જાહેરનામું બહાર પાડવામાં આવ્યું છે. આ જાહેરનામા મુજબ મનપા ઉમેદવારો મહત્તમ 6 લાખ જેટલો ખર્ચ કરી શકશે તથા 9 કરતા વધુ વોર્ડ ધરાવતી નગરપાલીકાના ઉમેદવારો રૂ.2.25 લાખ ખર્ચી શકશે.
તો, 9 વોર્ડથી ઓછા વોર્ડ ધરાવતી નગરપાલીકાના ઉમેદવાર 1 લાખ 50 હજાર જેટલા ખર્ચી શકશે. તો જિલ્લા પંચાયત માટે આ લિમિટ 4 લાખ તથા તાલુકા પંચાયત માટે 2 લાખ જેટલો ખર્ચ કરવાનું રાજ્ય ચૂંટણી આયોગ દ્વારા જાહેરનામું બહાર પાડવામાં આવ્યું છે.