જગતના તાતની વાત / બટાકાનો પાક લેનારા ખેડૂતોને પડતા પર પાટૂ જેવો ઘાટ, ઉઠ્યા વિરોધના સૂર

• ડીસામાં કોલ્ડસ્ટોરેજના ભાડા વધતા વિરોધ
• ભારતીય કિસાન સંઘે કલેક્ટરને આપ્યું આવેદનપત્ર
• ભાડાના નિર્ણયને મોકૂફ કરાવવાની માગ

કિસાન સંઘે નાયબ કલેકટરને આવેદનપત્ર આપી કોલ્ડ સ્ટોરેજ એસોસિયેશન દ્વારા લેવાયેલા વધારાના ભાડાના નિર્ણયને મોકૂફ કરાવવા માટેની માંગ સાથે આવેદનપત્ર આપ્યું છે.

બનાસકાંઠામાં ડીસા અને તેની આજુબાજુના પંથકમાં સૌથી વધુ બટાકાની ખેતી થાય છે. બટાકા પર જ આ વિસ્તારના ખેડૂતો નિર્ભર છે. પરંતુ આ વર્ષે એકાએક કોલ્ડ સ્ટોરેજ એસોસિયેશન દ્વારા બટાકા સંગ્રહ માટે ના ભાવ વધારો કરી દેવાતા ખેડૂતો મુશ્કેલીમાં મૂકાયા છે.

ખેડૂતોને આત્મહત્યા કરવાના દિવસો આવે

આજે ભારતીય કિસાન સંઘની આગેવાની હેઠળ ખેડૂતો તેમજ કિસાન સંઘના હોદ્દેદારોએ ડીસાના નાયબ કલેકટરને આવેદનપત્ર આપ્યુ. ડીસા કોલ્ડ સ્ટોરેજ એસોસિયેશન દ્વારા જે ભાવ વધારો કરવામાં આવ્યું છે તે ત્વરિત પાછો ખેંચાય તેની માંગ સાથે આવેદનપત્ર આપવામાં આવ્યું હતું. ખેડૂતોની માંગ છે કે આ ભાવ વધારા ના કારણે ખેડૂતોની મુશ્કેલીમાં વધારો થશે. જે પ્રકારે બટાકાના ભાવ ગગડયા છે તે જોતા જો ભાવ વધારો પણ અમલમાં આવે તો ખેડૂતોને આત્મહત્યા કરવાના દિવસો આવે.

શું છે મુખ્ય મુદ્દા
 
- કોલ્ડ સ્ટોરેજ માં 5 ℅ નો ભાવ વધારો

- બનાસકાંઠા જિલ્લામાં 200 કોલ્ડ સ્ટોરેજ

- દર વર્ષે 3.15 કરોડ કટા ની સંગ્રહ ક્ષમતા 

- ત્રણ ભાગમાં કોલ્ડ સ્ટોરેજ દ્વારા ભાડાની વસૂલાત 

- નવા ભાડા પ્રમાણે ખેડૂતોએ 50 કરોડ વધારે ચૂકવવા પડે

- અગાઉ પ્રતિકીલો રૂપિયા 1.90 ભાડું હતું જે હવે પ્રતિકીલો 2.00 રૂપિયા લેવામાં આવશે

જુના ભાવમાં બટાકા સંગ્રહિત કરવું કોલ્ડ સ્ટોરેજના માલિકોને પોષાય તેમ નથી

ખેડૂતોને ઉતરતા મામલે સ્ટોરેજ એસોસિયેશન પણ પોતાનું પક્ષ મૂક્યો છે. તેમનું કહેવું છે કે છેલ્લા પાંચ વર્ષથી કોલ્ડ સ્ટોરેજ એસોસિયેશન દ્વારા કોઈપણ પ્રકારનો ભાવ વધારો ઝીંકાયો નથી. છેલ્લા પાંચ વર્ષમાં વધેલા ડીઝલ અને ઓઈલના ભાવ મજૂરી તેમજ એમોનિયા ગેસના ભાવ વધ્યા છે. જેના કારણે હવે જુના ભાવમાં બટાકા સંગ્રહિત કરવું કોલ્ડ સ્ટોરેજના માલિકોને પોષાય તેમ નથી. જેથી સામાન્ય ભાવવધારો અત્યારે કરવામાં આવ્યો છે. સરકાર જો બટાકાના MSP ભાવ નક્કી કરે તો આ તમામ મુદ્દાઓનું કાયમી નિકાલ લાવી શકે છે.

કિસાન સંઘે ભાવવધારો પરત ખેંચવા માટે અલ્ટિમેટમ આપ્યું

કિસાન સંઘે ભાવવધારો પરત ખેંચવા માટે અલ્ટિમેટમ આપ્યું છે. જ્યારે કોલ્ડ સ્ટોરેજ એસોસિયેશન તેમની માગણી ઉપર અડગ છે. ત્યારે સવાલ એ છે કે કિસાન સંઘ અને ખેડૂતો તેમની માગણીઓ મામલે કોઈ પરિણામ મેળવી શકે છે કે કેમ...?