આજે એટલે કે 5 જાન્યુઆરીએ દીપિકા પાદુકોણ તેનો 34મો જન્મદિવસ સેલિબ્રેટ કરી રહી છે. શાહરૂખ ખાનની સાથે ફિલ્મ 'ઓમ શાંતિ ઓમ'થી પોતાના કરિયરની શરૂઆત કરનાર દીપિકા પાદુકોણ છેલ્લા એક દાયકાથી બોલિવૂડની ટોપની એક્ટ્રેસિસમાંથી એક રહી છે. દીપિકાએ દેશમાં તો પ્રસિદ્ધિ મેળવી જ છે, સાથે જ વિદેશમાં પણ દેશનું નામ રોશન કર્યું છે.
જોકે, એક સક્સેસફુલ કરિયર હોવા છતાં દીપિકા કેટલીક મહત્વપૂર્ણ ફિલ્મોનો ભાગ બની શકી નહોતી. તેના બોલિવૂડ કરિયરની શરૂઆત ફિલ્મ સાંવરિયાથી કરવાની હતી, પણ સંજય લીલા ભણસાલીએ સ્ટાર કિડ્સના ફોર્મ્યૂલાને અપાનીવે સાંવરિયા માટે રણબીર કપૂર અને સોનમ કપૂરને લોન્ચ કર્યા હતા.
યશરાજની બે ફિલ્મોમાં કેટરીના કૈફે દીપિકાને કરી હતી રિપ્લેસ
સંજય લીલા ભણસાલીએ સાંવરિયા પછી દીપિકા સાથે બેક ટૂ બેક 3 ફિલ્મોમાં સાથે કામ કર્યું અને તેના કરિયરને સફળતાના શિખરે પહોંચાડ્યું હતું. આ સિવાય યશ ચોપડાની છેલ્લી ફિલ્મ 'જબ તક હૈ જાન'નો પણ ભાગ હતી પરંતુ કેટરીના કૈફે દીપિકાની જગ્યા લઈ લીધી હતી. આ સિવાય યશરાજ પ્રોડક્શનની જ સુપરહિટ ફિલ્મ ધૂમ 3નો પણ તે ભાગ હતી. જોકે, આ ફિલ્મમાં પણ કેટરીનાએ તેને રિપ્લેસ કરી હતી. આમિર ખાન સ્ટારર આ ફિલ્મે બોક્સ ઓફિસ પર શાનદાર કમાણી કરી હતી.
દીપિકા વર્ષ 2007માં હિમેશ રેશમિયાના મ્યૂઝિક વીડિયોમાં જોવા મળી હતી
ઉલ્લેખનીય છે કે, દીપિકાએ એક્ટિંગ માટે અનુપમ ખેર સ્કૂલ ઓફ એક્ટિંગ સ્કૂલમાં એડમિશન લીધું હતું. આ સિવાય ડાંસ શીખવા માટે તેણે જાણીતા કોરિયોગ્રાફર શ્યામક દાવર પાસેથી ટ્રેનિંગ લીધી હતી. તે વર્ષ 2007માં હિમેશ રેશમિયાના મ્યૂઝિક વીડિયો 'નામ હૈ તેરા'માં પણ જોવા મળી હતી. ત્યારબાદ તેણે ફરાહ ખાનની ફિલ્મ ઓમ શાંતિ ઓમથી કરિયર શરૂ કર્યું હતું. હાલ દીપિકા તેની ફિલ્મ છપાક અને 83ને લઈને ચર્ચામાં છે.