આલિયા ભટ્ટ અને રણબીર કપૂર લાંબા સમયથી એકબીજાને ડેટ કરી રહ્યાં છે. ઘણી વખત એ લોકો લગ્ન કરવાના છે એવા પણ સમાચાર આવતા હોય છે. આલિયા અને રણબીરને જ્યારે પણ લગ્ન વિશે પૂછવામાં આવે છે, બંને હસીને ટાળી દે છે. હાલમાં જ દીપિકા પાદુકોણે એક ઈન્ટરવ્યૂમાં આલિયા ટૂંક જ સમયમાં લગ્ન કરશે એવું જણાવ્યું.
ટૂંક સમયમાં લગ્ન બંધનમાં બંધાઈ શકે છે આલિયા-રણબીર
એક ઈન્ટરવ્યૂમાં દીપિકાએ આપ્યા સંકેત
હાલ આલિયા-રણબીર બ્રહ્માસ્ત્રની શૂટિંગમાં વ્યસ્ત
હકીકતમાં, દીપિકા અને આલિયા ફિલ્મ કમ્પેનિયનના એક ઈન્ટરવ્યૂમાં ગયા હતા. આ ઈન્ટરવ્યૂમાં તેમની સાથે સાઉથ સ્ટાર વિજય દેવરકોન્ડા, રણવીર સિંહ, આયુષ્માન ખુરાના અને મનોજ વાજપેયી પણ હતા. અહીં વિજયને પૂછવામાં આવ્યું હતું કે ભારતીય સિનેમા જગતમાં કયા કલાકારો પાસેથી સલાહ લેવા માગશો.
તેના જવાબમાં વિજયે કહ્યું કે દીપિકા અને આલિયા પર તેનો ક્રશ હતો. જેથી આ બંને પાસેથી સલાહ લેતો પણ દીપિકાના લગ્ન થઈ ગયા છે. આ પછી દીપિકા વિજયને રોકતા કહે છે કે, આલિયા પણ જલ્દી લગ્ન કરવાની છે. તો આલિયા કહે છે, 'એક્સક્યૂઝ મી, તમે આ વાતની જાહેરાત કેમ કરી રહ્યા છો.'
આ વાત પર દીપિકા હસવા લાગી અને કહ્યું કે બસ મેં એમ જ કહી દીધું. દીપિકાએ ભલે આલિયાના લગ્ન વિશે જણાવી પીછેહઠ કર્યું હોય પણ તેણે સંકેતમાં તેના લગ્ન અંગે જણાવી દીધું. હવે એ જોવાનું છે કે ક્યારે આલિયા અને રણબીરના લગ્ન થાય છે. હાલ બંને પોતાના કરિયર પર ધ્યાન આપી રહ્યા છે.
અત્યારે બંને ફિલ્મ 'બ્રહ્માસ્ત્ર'ની શૂટિંગમાં બિઝી છે. આ ફિલ્મ દરમિયાન જ બંનેના અફેરની શરૂઆત થઈ હતી. હાલમાં જ રણબીર આલિયા ફિલ્મની શૂટિંગ માટે મનાલી ગયા હતા. અહીં બંનેનું ભવ્ય સ્વાગત થયું હતું. બંને મનાલી પહોંચ્યા તે પછીની તસવીરે પણ સામે આવી.