ફિલ્મ રિવ્યૂ / 'છપાક'માં દીપિકાની દમદાર એક્ટિંગ, ફિલ્મમાં એક સેકન્ડ માટે પણ પલકારો નહીં મારવા દે

ફિલ્મઃ છપાક

સ્ટાર કાસ્ટ: દીપિકા પાદુકોણ, વિક્રાંત મેસી, અંકિત બિષ્ટ, મધુરજીત સરઘી, દેલજાદ હિવાલે, ગોવિંદ સિંહ સંધૂ

ડિરેક્ટરઃ મેઘના ગુલઝાર

ફિલ્મનો સમયઃ 2 કલાક 18 મિનિટ

આ ફિલ્મની કહાની એક એસિડ એટેક સર્વાઈવર લક્ષ્મી અગ્રવાલના જીવન પર આધારિત છે. સ્ટોરીની શરૂઆત એસિડ એટેકનો ભોગ બનેલી માલતી (દીપિકા પાદુકોણ)થી થાય છે. જે નોકરીની શોધમાં બતાવી છે. આ દરમિયાન તેને વારંવાર એસિડ એટેકને કારણે તેના ખરાબ થઈ ગયેલા ચહેરાની યાદ અપાવવામાં આવે છે. ઘણી બધી સર્જરીથી પસાર થયેલી પીડિતાનો ઈન્ટરવ્યૂ લેવા જ્યારે એક પત્રકાર તેને મળે છે, ત્યારે કહાનીના બીજા આવરણો ખુલે છે. 

એસિડ હુમલાથી બદલાય જાય છે જીવન

માલતી એસિડ પીડિતા સર્વાઈવર્સ માટે કામ કરનાર એક એનજીઓ સાથે જોડાય છે. ત્યાં તે એનજીઓના કરતા-ધરતા અમોલ (વિક્રાંત મેસી)ને મળે છે. ત્યાર પછી એસિડ હુમલાનો શિકાર થયેલી અન્ય યુવતીઓ પર થયેલા અત્યાચારની કહાની સામે આવે છે. 19 વર્ષની સુંદર અને હમેશાં ખુશ રહેનાર માલતી સિંગર બનવાનું સપનુ જોતી હોય છે, પરંતુ બશીર ખાન ઉર્ફ બબુ દ્વારા કરાયેલા અમાનવીય એસિડ હુમલા પછી તેનું જીવન નરક બની જાય છે. ઘરમાં ટીબીની બીમારીથી પીડિત ભાઈ, આર્થિક તંગી સામે ઝઝૂમતા માતા-પિતા અને માલતીની એક પછી એક સર્જરી વચ્ચે પોલીસનું ઈન્વેસ્ટિગેશન અને કોર્ટ કચેરીના ધક્કા. આ બધું જોઈને તમારું મન વિચલિત થઈ ઉઠશે. 

એસિડ હુમલા બાદ કદરૂપો ચહોરો

એસિડ હુમલા બાદ કદરૂપો ચહોરો, સમાજનો તિરસ્કાર વચ્ચે પણ માલતીનો પરિવાર અને વકીલ અર્ચના (મધુરજીત સરઘી) તેના પડખે અડીખમ ઊભા રહે છે. અર્ચનાની પ્રેરણાથી જ માલતી એસિડના વેચાણ પણ પ્રતિબંધ મૂકવાની પીટિશન દાખલ કરે છે. એસિડ હુમલામાં માલતીનો ચહેરો ભલે કદરૂપો થઈ જાય છે પણ તેનો જુસ્સો અને સ્મિત કોઈ છીનવી શકતું નથી. 

ડિરેક્શન

ડિરેક્ટર મેઘના ગુલઝારની ખાસિયત એ છે કે, તેણે ફિલ્મની સ્ટોરીને રિયાલિસ્ટિક રાખી છે. તેણે એસિડ હુમલાને મેલોડ્રેમેટિક અને સનસનાટીભરી દર્શાવી નથી. ફિલ્મનો ફર્સ્ટ હાફ ધીમો છે પણ ફિલ્મ ઈન્ટરવલ પછી સ્પીડ પકડે છે. મેઘનાએ ફિલ્મમાં સુંદરતાની પરંપરાગત માન્યતાઓ પર પણ પ્રહાર કર્યા છે. 

એક્ટિંગ

એસિડ વિક્ટિમ તરીકે દીપિકાનો પ્રોસ્થેટિક મેક-અપ વખાણવા લાયક છે. ફિલ્મનું સંગીત પણ હૃદયસ્પર્શી છે. જોકે, ફિલ્મમાં અમુક સવાલોના જવાબ મળ્યા નથી. કોઈપણ હિરોઈન માટે એસિડ હુમલામાં બળી ગયેલા ચહેરા સાથે સામે આવવું સાહસિક પગલું છે અને દીપિકાએ આ કરી બતાવ્યું છે. દીપિકાની એક્ટિંગ અને કેટલાક સીન ફિલ્મમાં કાબિલે તારીફ છે. એક દૃશ્યમાં તે પોતાની ઈમિટેશન જ્વેલરી અને કપડા બેગમાં રાખતા કહે છે, “ન નાક છે, ન કાન, આ ઝૂમકા ક્યાં લટકાવીશ મા? વિક્રાંત મેસીએ પણ તેના રોલમાં પ્રાણ ફૂંકી દીધા છે. સહયોગી કલાકારોએ પોતાની ભૂમિકામાં પૂરો ન્યાય કર્યો છે.

કેમ આ ફિલ્મ જોવી?

દીપિકા પાદુકોણના અભિનય અને એસિડ હુમલાનો ભોગ બનેલી યુવતીઓનું જીવન કેવું હોય છે તે જાણવા માટે આ ફિલ્મ એકવાર ચોક્કસથી જોવી જોઈએ.