કોરોના વાયરસની સામે જંગ લડવા માટે ઉદ્યોગપતિઓની સાથે સાથે બોલિવુડ અને સ્પોર્ટ્સ જગતના સેલેબ્સ આગળ આવી રહ્યા છે .આ લિસ્ટમાં બોલિવુડના ઘણા સેલેબ્સ શામેલ છે. હવે આ યાદીમાં દીપિકા પાદુકોણ અને રણવીર સિંહનું નામ શામેલ થઇ ગયું છે. આ કપલે પોતાના ઑફિશ્યલ સોશ્યલ મીડિયા એકાઉન્ટ પર આ અંગેની જાણકારી આપી છે.
બોલિવુડના સેલેબ્સ દાન કરવા માટે આગળ આવ્યા
કોરોના વાયરસ સામે જંગ લડવા માટે PM CARES માં કર્યું દાન
સોશ્યલ મીડિયા પર પોસ્ટ કરીને સેલેબ્સ કરી રહ્યા છે જાહેરાત
દીપિકા-રણવીરે જોકે આ પોસ્ટ શૅર કરીને રકમની જાહેરાત કરી નથી, જોકે PM-CARES ફંડમાં તેમનું યોગદાન આપ્યું છે. સોશ્યલ મીડિયા પર શૅર કરેલી પોસ્ટમાં લખ્યું હતું કે, ''આવા સમયમાં દરેક મદદનું મહત્ત્વ છે. અમે PM-CARES ફંડમાં યોગદાન આપવા શપથ લઈએ છીએ અને આશા રાખીએ છીએ કે તમે પણ આમાં યોગદાન આપશો. આ સંકટની સ્થિતિમાં આપણે દરેક સાથે છીએ. જય હિન્દ.''
આ પહેલા બોલિવુડની એક્ટ્રેસ અનુષ્કા શર્મા અને ટીમ ઇન્ડિયાના કેપ્ટન વિરાટ કોહલીએ PM-CARES અને મહારાષ્ટ્ર સીએમ રિલીફ ફંડમાં યોગદાન આપ્યું છે. પ્રિયંકા ચોપરા અને નિક જોનસે અલગ અલગ 10 ફંડ્સમાં દાન આપ્યું છે જેમાં એક PM-CARES ફંડ છે. કરિના કપૂર ખાન અને સૈફ અલી ખાને કુલ 5 ફંડ્સમાં યોગદાન આપ્યું છે જેમાં PM-CARES અને મહારાષ્ટ્ર સીએમ રિલીફ ફંડ સામેલ છે. આ સિવાય અક્ષય કુમાર, વિકી કૌશલ, આલિયા ભટ્ટ, અજય દેવગણ, કેટરિના કૈફ, કાર્તિક આર્યન, માધુરી દીક્ષિત, નાના પાટેકર સહિત ઘણા સેલેબ્સે આર્થિક સહાય કરી છે.