અમદાવાદમાં વરસાદના પ્રારંભમાં જ તંત્રની પોલ ખુલી ગઇ છે. પહેલા વરસાદમાં જ ઠેર-ઠેર રોડ રસ્તાઓ બેસી જતા પ્રિ-મોન્સૂન પ્લાન પર સવાલ ઉઠ્યા છે. 2 ઇંચ વરસાદમાં જ 50થી વધુ વિસ્તારોમાં પાણી ભરાઇ ગયા છે. શહેરના અનેક વિસ્તારોમાં રોડની હાલત ખરાબ થઇ ગઇ છે.
ઉલ્લેખનીય છે કે, સુરધારા સર્કલ પાસે હજપ પણ રોડની હાલત બિસ્માર છે. જ્યારે જીવરાજ હોસ્પિટલ પાસે સપ્તાહ પહેલા જ બનેલો રોડ બેસી ગયો છે. ગત રોજ શહેરમાં 9 વૃક્ષ ધરાશાયી થયા. એટલે AMCએ પ્રિ-મોન્સૂનના નામે ખર્ચ કરેલા કરોડો રૂપિયા પાણીમાં ગયા છે. આટલા રૂપિયા ખર્ચા છતા પણ ચોમાસાની શરૂઆતમાં જ તંત્રની બેદરકારીથી શહેરીજનો પરેશાન થયા છે.
VTVના અહેવાલ બાદ તંત્રએ યુદ્ધના ધોરણે કામગીરી હાથ ધરી
અમદાવાદના જશોદાનગર ચાર રસ્તા પાસે ભૂવો પડ્યો હતો. જેનો અહેવાલ VTVએ પ્રસારિત કર્યો હતો. ત્યારે VTVના અહેવાલ બાદ તંત્રએ યુદ્ધના ધોરણે ભૂવો પૂરવાની કામગીરી હાથ ધરી હતી. જોકે તંત્ર દ્વારા પ્રિમોનસુનની કામગીરીમાં યોગ્ય પુરાણ ન થવાથી ભૂવો પડ્યો હોવાનું સામે આવ્યુ છે. ત્યારે ભૂવાને લઈને તંત્રની પ્રિમોનસુન કામગીરી માત્ર કાગળ પર હોવાનું સાબિત થઈ રહ્યુ છે. તેમજ તંત્ર સામે અનેક સવાલો ઉભા થઈ રહ્યા છે.
શહેરના આરટીઓ સર્કલ પાસે પાણી ભરાયા
શહેરના આરટીઓ સર્કલ પાસે પાણી ભરાયા છે. સામાન્ય વરસાદથી પાણી ભરાયા હોવાના દ્રશ્યો ઠેર-ઠેર જોવા મળ્યા છે. આરટીઓ સર્કલ પાસે એક તરફ ટ્રાફિક જામ તો બીજી બાજુ પાણી ભરાયા હોવાના કારણે વાહન ચાલકોને મુશ્કેલી પડી રહી છે.