ચેતવણી / જો આવુ કર્યુ તો કદાચ સરકાર ફ્લેટ પાછો લઈ લેશે, જાણો C.R પાટીલને કેમ કહેવું પડ્યું આવું

• સુરતમાં આવાસ લોકાર્પણ કાર્યક્રમ 
• કાર્યક્રમમાં સીઆર પાટીલનું નિવેદન 
• ખુબજ કિંમતી જમીન પર આ આવાસ બન્યા છે: પાટીલ 

સુરતમાં આવાસ લોકાર્પણ કાર્યક્રમ દરમિયાન સી.આર પાટીલે નિવેદન આપતા આવાસધારકોને જાણે ચેતવણી પણ આપી દીધી છે. પાટીલે કહ્યું, ખૂબ'જ કિંમતી જમીન પર આ આવાસ બન્યા છે. આ મકાનને ભાડે ન ચડાવવા લાભાર્થીઓને અપીલ છે. અને જો એવું કરશો તો કદાચ સરકાર ફ્લેટ પાછો લઈ લેશે. માટે મકાનોની જાળવણી કરજો. સાથે વિકાસના કાર્યો અંગે જણાવ્યું કે, ભાજપ જે કહે છે એ કરે છે અને એના કરતાં પણ વધુ કરે છે.

સુરતમાં રાજ્યના મુખ્યમંત્રી વિજય રૂપાણીના હસ્તે રૂંઢ વેલેન્ટાઈન સિનેમા પાસે નિર્માણ પામેલ ગુજરાત હાઉસિંગ બોર્ડના રૂ.23.81 કરોડના ખર્ચે નિર્મિત LIG આવાસનું લોકાર્પણ કરવામાં આવ્યું હતું .13 માળના બનેલા બનેલા 208 બહુમાળી આવાસોનું લોકાર્પણ કરતા CM રૂપાણીએ જણાવ્યું હતું કે, વડાપ્રધાન નરેન્દ્ર મોદીનું સપનું સાકાર કરી રહ્યા છે. દરેક શહેરોની અંદર જમીનના ભાવ કરોડોમાં બોલાય છે. ત્યારે ગરીબોને પોતાના આવાસ માટેનું સપનું જોવું પણ દુષ્કર બની રહ્યું છે. તેવા સમયે સરકાર સામાન્ય માણસને પોતાના સપનાનું ઘર મળે તેવા પ્રયાસો કરી રહી છે.

દર વર્ષે સરકાર પાંચ લાખ જેટલા મકાનો બનાવીને ગરીબ અને મધ્યમવર્ગના પરિવારોને આપશે. કોંગ્રેસ ઉપર શાબ્દિક પ્રહાર કરતા તેમણે જણાવ્યું કે કોંગ્રેસ સત્તામાં હતી ત્યારે માત્ર નારા લગાવવામાં આવતા હતા. ગરીબી હટાવો જેવા માત્ર નારા લગાવવામાં આવતા હતા. કોંગ્રેસના રાજમાં બનેલા મકાનો ખખડધજ થઈ જતા હતા. હવે સરકાર ગરીબ અને મધ્યમ પરિવારોને મજબૂત અને સારા મકાનો આપી રહી છે. જોકે હાલ હાઇકોર્ટ દ્વારા લવ જેહાદને લઈ જે હુકમ કરાયો છે. તેની સામે સરકાર સુપ્રીમ કોર્ટ જશે. તેવું જણાવી મુખ્યમંત્રીએ સૌને ચોંકાવ્યા હતા.