સરકારે ટેક્સટાઈલ ઉદ્યોગકારોની માંગ સ્વીકારી, અગાઉ 12 ટકા GST લાગુ કરવાનો પ્રસ્તાવ હતો જે હાલ પૂરતો મોકૂફ રાખવામાં આવ્યો છે આગામી સમયમાં આ અંગે નિર્ણય લેવાશે
કાપડ ઉપર GST 5 ટકા જ યથાવત
12 ટકા GST લગાવવાનો પ્રસ્તાવ હાલ પુરતો મોકૂફ
આગામી બેઠકમાં થશે વિચાર
આવતીકાલ એટલે 1 જાન્યુઆરી 2022થી GSTના નવા દર લાગુ થવા જઈ હતા ત્યારે ગુજરાતના કાપડ વેપારીઑને આ નિર્ણયનો સૌથી મોટો ફટકો પડ્યો હતો પણ આજે દિલ્લીમાં નાણા મંત્રી નિર્મલા સિતારમણની અધ્યક્ષતામાં GST કાઉન્સિલની બેઠક મળી હતી જેમાં મોટો નિર્ણય લેવામાં આવ્યો છે કે કાપડ ઉપર હાલ પુરતો 5 ટકા GST જ રહેશે. એટલે કે કાપડ ઉપર 12 ટકા GST લગાવવાનો પ્રસ્તાવ હાલ મોકૂફ રાખવામાં આવ્યો છે. ગુજરાતના ટેક્ષટાઈલ ઉદ્યોગકારોએ કાપડ ઉપર GSTના વધારાનો વિરોધ કર્યો હતો જે બાદ રાજ્ય સરકાર અને સી.આર.પાટીલે પણ કેન્દ્રમાં રજૂઆત કરી હતી. જે બાદ કાપડ ઉપર GST 5 ટકા જ રાખવાનો નિર્ણય હાલ પૂરતો લેવામાં આવ્યો છે. આગામી બેઠકમાં તમામ રાજ્યો સાથે ચર્ચા કરી નિર્ણય લેવામાં આવશે કે GST વધારવો જોઈએ કે નહીં?
જો GST વધે તો કાપડ વેપારીઓને શું અસર થતી હતી
કાપડ પર લાગતા GST માં સરકારે વધારો કરી 12 ટકા કરતા કાપડના વેપારીઓ રોષે ભરાયા હતા.GSTમાં થયેલા વધારાના કારણે રો મટેરિયલના ભાવ વધી જાત જેનાથી કપડાના ભાવમાં 20 થી 25 ટકાનો વધારો થવાનો ડર હતો. તેનાથી હોલસેલ અને રીટેઇલ વેપારીઓ માટે વર્કીંગ કેપીટલ વધારવાની ફરજ પડી જાત.જેથી કાપડ પર લાગતા GST કરાયેલા વધારાને લઈને સરકારમાં વિવિધ સ્તરે કાપડાના વેપારીઓએ રજૂઆત કરી હતી.અગાઉ કાપડ ઉપર 5 ટકા GST લાગતો હતો જે વધારીને 12 ટકા કરવામાં આવ્યો હતો. જે નિર્ણય કાલથી લાગુ પણ પડવાનો હતો પણ આજે મળેલી GST કાઉન્સિલની બેઠકમાં નિર્ણય લેવામાં આવ્યો કે 12 ટકા GST લગાવવાનો પ્રસ્તાવ હાલ પુરતો મોકૂફ રાખવામાં આવ્યો છે.
1 જાન્યુઆરી, 2022 કઈ વસ્તુઑમાં GST વધવાની જાહેરાત છે
ગુડ્સ એન્ડ સર્વિસ ટેક્સ (જીએસટી) સિસ્ટમમાં 1 જાન્યુઆરી, 2022થી મોટા ફેરફારો થવાની તૈયારીમાં છે. તેમાં રેસ્ટોરન્ટ ક્ષેત્રમાં પૂરી પાડવામાં આવતી પરિવહન અને સેવાઓ પર ઇ-કોમર્સ સર્વિસ ઓપરેટરો પર કર જવાબદારીનો સમાવેશ થાય છે. આ ઉપરાંત ફૂટવેર અને ટેક્સટાઇલ સેક્ટરમાં ડ્યુટી સ્ટ્રક્ચરમાં પણ ફેરફાર 1 જાન્યુઆરી, 2022થી અમલમાં આવશે, જેમાં તમામ પ્રકારના ફૂટવેર પર 12 ટકા જીએસટી લાગશે, જ્યારે રેડીમેડ ગાર્મેન્ટ્સ સહિત તમામ ટેક્સટાઇલ પ્રોડક્ટ્સ (કોટન સિવાય) 12 ટકા જીએસટી લાગશે. પણ હવે સરકારે જાહેરાત કરી છે કે ટેક્સટાઇલ સેક્ટરમાં જે જીએસટી વધારો કરવામાં આવ્યો હતો તે પ્રસ્તાવ હાલ પૂરતો સ્થગિત રાખવામાં આવ્યો છે જેથી હવે પહેલાંની જેમ 5% GST કાપડ પર લાગશે જેનો સીધો ફાયફો વેપારીઓને થશે.