અમદાવાદ / કુંભલગઢ ફરવા ગયેલા યુવકોએ 'રઈસ' બનવાનું નક્કી કર્યું, રાજસ્થાનથી નરોડા ટ્રકમાં દારૂ લાવ્યા અને...

• રાજસ્થાનથી નરોડામાં દારૂ લાવેલા દર્શક પટેલ અને કિશન પટેલની ધરપકડ
• બે મહિના સુધી યુવકોએ ઠેકેદાર સાથે સંપર્ક કર્યો હતો
• 31 ડિસેમ્બરની પાર્ટી માટે દારૂ વેચીને નામચીન બુટલેગર બનવાનું સપનું હતું

અમદાવાદના સોલા વિસ્તારમાં રહેતા દર્શક પટેલ, વરુણ દેસાઇ અને કિશન પટેલ બે મહિના પહેલા રાજસ્થાનના કુંભલગઢમાં ફરવા માટે ગયા હતા અને જ્યાં તેમણે દારૂનો ધંધો કરવા માટેનું નક્કી કરી લીધું હતું. ત્યાંના દારૂના ઠેકેદાર સાથે મુલાકાત કરી હતી. યુવકોએ ઠેકેદાર સાથે વાત કરીને કહ્યું હતું કે અમને દારૂની જરૂર પડશે તો અમે મગાવીશું અને તમે મોકલી દેજો. બે મહિના સુધી યુવકોએ ઠેકેદાર સાથે સંપર્ક કર્યો હતો. 

યુવકોને રૂપિયાની જરૂર પડી એટલે તેમને 31મી ડિસેમ્બરના રોજ દારૂ વેચવા માટે ઠેકેદારને ફોન કરીને દારૂનો ઓર્ડર લખાવ્યો હતો. રાજસ્થાનથી દારૂ ટ્રકમાં નરોડા આવ્યો હતો. જેમાં યુવકો કાર લઇને દારૂ લેવા માટે ગયા હતા. દારૂ લઇને તે સોલા આવી રહ્યા હતા ત્યારે પોલીસને મળેલી બાતમીના આધારે તેમને પકડી પાડ્યા હતા. પોલીસે આ મામલે દર્શક પટેલ, કિશન પટેલની ધરપકડ કરી છે અને 7.36 લાખનો મુદ્દમાલ કબજે કર્યો છે. 

યુવકોએ પોલીસ સમક્ષ કબૂલાત કરી છે કે શોર્ટકટથી રૂપિયા કમાવવા માટે તેમણે પહેલી વાર દારૂ ખરીદ્યો હતો અને 31મી ડિસેમ્બરે વેચવાનો પ્લાન બનાવ્યો હતો. પોલીસે આ મામલે યુવકો વિરુદ્ધ ગુનો દાખલ કરીને તપાસ શરૂ કરી છે.