નિધન / મહારાજાની વિદાયમાં ગોંડલ હિબકે ચડ્યું, હૃદયરોગના કારણે રાજવી જ્યોતિન્દ્રસિંહ જાડેજાનું દેહાવસાન

• ગોંડલના મહારાજા જ્યોતિન્દ્રસિંહ જાડેજાનું નિધન 
• હૃદયરોગના હુમલાને કારણે જ્યોતિન્દ્રસિંહનું નિધન 
• ગોંડલમાં ભારે શોકની લાગણી 

ગોંડલના મહારાજા જ્યોતિન્દ્રસિંહજીનું 84 વર્ષની વયે નિધન થયુ છે.  સોમવારે સવારે હૃદયનો હુમલો આવતા તેઓ સ્વર્ગવાસ પામ્યા છે. મહારાજના નિધનથી રાજવી પરિવાર સહિત ગોંડલમાં શોકની લાગણી ફરી વળી છે. તેઓના નિધનને પગલે નગરપાલિકા કચેરી, કોલેજ સહિતની સંસ્થાઓમાં જાહેર રજા આપવામાં આવી હતી.

ફુલોથી શણગારી પાલખી

રાજવી પરિવાર દ્વારા દરબાર ગઢ મોટી બજાર ખાતે મહારાજ સાહેબના દેહને અંતિમદર્શને મુકવામાં આવ્યો હતો. રાજકોટ રાજવી માંધાતાસિંહજી, પીઠડીયા સ્ટેટ, વીરપુર સ્ટેટ સહિતના રાજવીઓ સહિત મોટી સંખ્યામાં શહેરીજનો દર્શનાર્થે આવી પહોંચ્યા હતા. બ્રાહ્મણો દ્વારા મંત્રોચ્ચાર વિધી અને બેન્ડની સુરાવલી વચ્ચે મહારાજ સાહેબની પાલખી યાત્રા નીકળી હતી. લાકડાની પાલખીમાં કેસરી સાફો પહેરાવીને તેઓને બિરાજમાન કરાયા હતા. હાજર સૌ કોઇ તથા શહેરીજનોએ અશ્રુભીની આંખે મહારાજ જ્યોતિન્દ્રસિંહજીને પુષ્પાંજલિ અર્પણ કરીને વિદાય આપી હતી.

તમામ વિધી દરબાર ગઢમાં કરાશે

84 વર્ષની વયે જ્યોતિન્દ્રસિંહ જાડેજાનું અવસાન થયુ. તેઓ મહારાજા સર ભગવતસિંહજીના પ્રપૌત્ર હતા. ભગવતસિંહજીના પુત્ર ભોજરાજસિંહજી તેમના પુત્ર વિક્રમસિંહજી અને તેમના પુત્ર જ્યોતેન્દ્રસિંહજી હતા.  સાંજે 4 થી 6 વાગ્યા સુધી દરબાર ગઢ મોટી બજાર ખાતે તેઓના પાર્થિવદેહને દર્શનાર્થે મૂકવામાં આવ્યો હતો.. 6 વાગ્યા બાદ અંતિમ વિધી થશે. તમામ વિધી ગોંડલના દરબાર ગઢમાં જ કરવામાં આવશે.

ગોંડલમાં શોકની લાગણી

ગોંડલના વર્તમાન મહારાજા સાહેબ જ્યાતિન્દ્રસિંહજીના નિધનથી સમગ્ર ગોંડલ શોકમાં ગરકાવ થયુ છે.  વળી ગોંડલના મહારાજાનું એન્ટિક કારનું કલેક્શન પણ વિશ્વ વિખ્યાત છે. દેશ વિદેશના લોકો અને બોલિવુડ હસ્તીઓ પણ કારનું કલેક્શન જોઇને ચોંકી ઉઠે છે. મળતી માહિતી મુજબ  જ્યોતિન્દ્રસિંહજી પણ કારના શોખીન હતા તેઓએ અનેક કાર રેસમાં ભાગ લઇને ટ્રોફીઓ પોતાને નામ કરી છે..