બનાસકાંઠાના આબુ રોડ પર કન્ટેનરની અડફેટે નાના બેડા ગામના એક જ પરિવારના ચાર સભ્યોના મોત નિપજતા પંથકમાં સનસનાટી મચી જવા પામી છે.
કન્ટેનર ચાલકે અડફેટે લેતા ચાર વ્યકિતના મૃત્યુ
નાના બેડા ગામનો વતની હતો પરિવાર
પરિવારના અન્ય બે સભ્યોને ઈજા
ગુજરાતમાં માર્ગ અકસ્માતનો ગોઝારો સિલસિલો અટકવાનું નામ જ લેતો હોય તેવી સ્થિતિ સર્જાઇ રહી છે. ગત તા. 8 ના રોજ મોરબીમાં સર્જાયેલ ગમખ્વાર અકસ્માતમા પાંચ લોકોના મોત નિપજ્યાંની કરુણ ઘટના હજુ તાજી જ છે ત્યાં આજે અકસ્માતને પગલે બનાસકાંઠાનો આબુ રોડ રક્તરંજિત બન્યો છે. કાળ બનીને દોડતા કન્ટેનરની અડફેટે નાના બેડા ગામના એક જ પરિવારના ચાર સભ્યોના પ્રાણ પંખેરુ ઊડી જતા પંથકમાં અરેરાટી મચી જવા પામી છે.
એક જ પરિવારના 4 સભ્યોના અકસ્માતે મૃત્યુ
વિકાસની હરણફાળ ભરતા ગુજરાતમાં માર્ગ અકસ્માતની ઘટનામાં દિવસેને દિવસે ઉછાળો જોવા મળી રહ્યો છે. તેવામાં આજે બનાસકાંઠાના આબુ રોડ પર નાના બેડા ગામના રહેવાસી પરિવારને અકસ્માત નડ્યો હતો. આ પરિવાર સુપ્રસિધ્ધ સુંધા માતાજીના મંદિરે દર્શન કરીને પોતાના ઘરે પરત ફરી રહ્યો હતો. આબુ રોડ પર દર્શનાર્થી પરિવારની કારને અજાણ્યા વાહને ઠોકરે લીધી હતી. જે અકસ્માતમાંથી હેમખેમ ઊગરી ગયેલ પરિવાર કારમાંથી બહાર નીકળી રહ્યો હતો. ત્યાં કાળ બનીને પૂર પાટ વેગે આવતા કન્ટેનરના ચાલકે આ પરિવારને અડફેટે લીધા હતા. જેમાં તોતિંગ કન્ટેનરના ટાયર નીચે કચડાઈ જતા એક જ પરિવારના ચાર સભ્યો કાળનો કોળીયો બની ગયા હતા.
બે વ્યક્તિને ગંભીર ઇજા પહોંચી
આ ગોઝારી ઘટનાને પગલે માર્ગ મરણચીસોથી ગુંજ્યો હતો. એક જ પરિવારના ચાર સભ્યોના મોતની સાથે બે વ્યક્તિને ગંભીર ઇજા પહોંચતા તાત્કાલિક સારવાર અર્થે ખસેડવામાં આવ્યા હતા. આ મામલે પોલીસને જાણ થતાં સ્થાનીક પોલીસ કાફલો ઘટના સ્થળે દોડી ગયો હતો અને તપાસ હાથ ધરી છે.