ગુજરાતમાં ઉત્તરાયણની ધુમધામથી ઉજવણી થઈ રહી છે. ત્યારે કેટલાંક લોકો માટે ઉત્તરાયણ મજાને બદલે સજાનો તહેવાર સાબિત થયો છે. રાજ્યમાં અલગ અલગ જગ્યાએ મોત થતાં મૃતકોના પરિવાર માટે આ તહેવાર માતમનો તહેવાર બન્યો છે. અત્યાર સુધીમાં રાજ્યમાં દોરીના કારણે 2 બાળક સહિત 5 લોકોના મોત થયા છે. ચાઈનીઝ દોરીના કારણે અત્યાર સુધીમાં 5 લોકોના મોત થયા છે. બપોર સુધીમાં 42 લોકોના ગળા દોરીથી કપાયા હતાં જેમાં લોકો ઘાયલ થયા હતાં. જ્યારે ધાબા પરથી પટકાયાના 48 જેટલા બનાવો સામે આવ્યાં છે. ઉત્તરાયણમાં સાવધાનીપૂર્વક ઉજવણી કરવા VTV લોકોને અપીલ કરે છે.
અમદાવાદ
અમદાવાદમાં પતંગની દોરી ગળામાં ફસાતા બાઈક સવારનુ મોત થયુ છે. શહેરના ધોળકા-ખેડા હાઈવે પર બાઈક સવારનુ મોત થયું છે. મળતી માહિતી મુજબ બાઈક સવાર જઈ રહ્યો હતો તે દરમિયાન તેના ગળામાં દોરી ફસાઈ હતી જેના કારણે તેનું મોત નિપજ્યું હતું. બાઈક પર સવાર અન્ય એક વ્યક્તિ પણ ઈજાગ્રસ્ત થયો હતો. ત્યાર બાદ ઈજાગ્રસ્તને સારવાર માટે ધોળકાની હોસ્પિટલમાં ખસેડાયો હતો.
ડીસા
બનાસકાંઠાના ડીસામાં 10 વર્ષીય બાળકીનું મોત થયું છે. ડીસાના વાડી રોડ વિસ્તારમાં ધાબા પરથી પડતા 10 વર્ષીય બાળકીનુ મોત થયુ છે. પતંગ ચગાવતી સમયે બાળકી ધાબા પરથી નીચે પટકાઈ હતી. આ દરમિયાન બાળકીનુ ઘટનાસ્થળે જ મોત નિપજ્યું હતું. બાળકીનું મોત થતા પરિવારમાં માતમનો માહોલ છવાયો છે.
મહેસાણા
આ બાજુ મહેસાણામાં પણ ચાઇનીઝ દોરીએ લીધો જીવ લીધો હતો. જેમાં 8 વર્ષના બાળકનું મોત થયું હતું. આ ઘટના સાઇકલ પર જતા સમયે બની હતી. બાળકના મોતના પગલે પરિવાર માટે ઉત્તરાયણનો આનંદનો પર્વ શોકમાં ફેરવાઈ ગયો હતો.
સુરત
સુરતમાં પતંગ પકડવા જતાં એક બાળકનું મોત નિપજ્યું છે. અજાણ્યા વાહનની અડફેટે આવી જતાં બાળકનું મોત નિપજ્યું છે. આ ઘટના નાના વરાછા ફ્લાય ઓવરબ્રિજની છે. જ્યાં બાળક પતંગ પકડવા માટે માર્ગ પર દોડતાં વાહનની અડફેટે આવી ગયું હતું અને ઘટનાસ્થળે જ તેનું મોત નિપજ્યું છે.
જૂનાગઢ
જૂનાગઢના કેશોદમાં એક કિશોરી ધાબા પરથી પટકાતા ગંભીર ઈજાઓ પહોંચી છે. ઘટના કેશોદના જોલી પાર્કની છે જ્યાં ધાબા પર પતંગ ચગાવતા સમયે કિશોરી બીજા માળથી નીચે પટકાઈ હતી. કિશોરીને પગના ભાગે ગંભીર ઈજા પહોંચતા સારવાર અર્થે હોસ્પિટલમાં ખસેડવામાં આવી હતી.