વિરાટ બ્રિગેડ આ દિવસોમાં મિશન વર્લ્ડકપ 2019ને લઇને ઇંગ્લેન્ડના પ્રવાસે છે. ભારતીય ચાહકો એક વધુ વર્લ્ડકપની આશા સેવી રહ્યાં છે. દેશની જનતામાં ચારેતરફ એક જ સવાલ છે કે શું ભારતીય ટીમ 1983ની જેમ લોર્ડસના મેદાનમાં વર્લ્ડકપની ટ્રોફી પ્રાપ્ત કરી શકશે?
વર્લ્ડકપ 2019માં ભારતીય ટીમ મજબૂતી સાથે આગળ વધી રહી છે. ભારતીય ટીમનું લગભગ વર્લ્ડકપ-2019માં સેમિફાઇનલ સુધી પહોંચવું તો નિશ્ચિત માનવામાં આવી રહ્યું છે. જો કે આજનો દિવસ ભારત માટે વર્લ્ડકપને લઇને ઐતિહાસિક દિવસ છે. આ જ દિવસે ભારતે વિશ્વ સમક્ષ પોતાની એક મજબૂત છાપ છોડી હતી.
36 વર્ષ પહેલા આજના દિવસે ભારત લોર્ડ્સના મેદાનમાં વર્લ્ડકપ ચેમ્પિયન બન્યું હતું. 25 જૂન 1983ના દિવસને ભારતીય રમતના ઇતિહાસમાં ક્યારેય ન ભૂલનારો દિવસ છે. વેસ્ટઇન્ડિંઝને ભારતે ફાઇનલમાં 43 રનથી રોમાંચક જીત મેળવી પ્રથમ વાર વર્લ્ડકપ જીત્યો હતો.
1983ની વર્લ્ડકપની ટૂર્નામેન્ટમાં ભારતીય ટીમે આશા કરતા વિરુધ્ધ ચોંકાવનારું પ્રદર્શન કરી ઓસ્ટ્રેલિયા, ઇંગ્લેન્ડ અને વેસ્ટ ઇન્ડિઝ જેવી દિગ્ગજ ટીમને હરાવી વિશ્વકપ વિજેતા બન્યું હતું. 1983ના વર્લ્ડકપની ફાઇનલમાં પહોંચેલી વેસ્ટ ઇન્ડિઝ ટીમનું સપનું સતત ત્રીજી વખત વિશ્વકપ વિજેતા બનવાનું હતું.
જ્યારે બીજી તરફ અગાઉને બંને વર્લ્ડકપમાં ખરાબ પ્રદર્શનના કારણે ભારતીય ટીમની જીતને લઇને કોઇને આશા નહોતી. વર્લ્ડકપની ફાઇનલમાં ભારતની ટીમ માત્ર 183 રનમાં ઓલઆઉટ થઇ ગઇ હતી. જે તત્કાલીન વેસ્ટ ઇન્ડિઝની ટીમ માટે કોઇ મોટો લક્ષ્યાંક નહોતો. પરંતુ બલવિંદર સંધૂએ ગ્રીનિઝને માત્ર એક રન પર બોલ્ડ કરી ભારતને પ્રાથમિક સફળતા અપાવી.
જો કે ત્યારબાદ વિવિયન રિચર્ડસે 33 રનની આક્રમક ઇનિંગ્સ રમી હતી. જો કે ભારતીય ટીમના સુકાની કપિલ દેવે વિવિયન રીચર્ડસનો અદ્દભૂત કેચ ઝડપ્યો હતો. જે આ મેચનો ટર્નિંગ પોઇન્ટ માનવામાં આવી રહ્યો છે. આમ રિચર્ડસના આઉટ થયા બાદ વેસ્ટ ઇન્ડિઝની ટીમ 140 રનમાં ઓલઆઉટ થઇ ગઇ હતી.
On this day in 1983 - India won the World Cup and held the trophy high at Lord's - Memories to last a lifetime 🇮🇳🇮🇳🏆🏆 pic.twitter.com/w6b7gg7zAw
ભારતીય ટીમ તરફથી મદનલાલે 31 રન પર ત્રણ વિકેટ, અમરનાથે 12 રન પર ત્રણ વિકેટ, સંધૂએ 32 રન આપીને બે વિકેટ ઝડપી હતી. મોહિન્દર અમરનાથને સેમીફાઇનલ બાદ ફાઇનલમાં પણ પોતાના ઓલ રાઉન્ડર પ્રદર્શનના કારણે મેન ઓફ ધ મેચ જાહેર કરાયો હતો. 1983ની આ ઐતિહાસિક જીત બાદ ટીમ ઇન્ડિયાએ મહેન્દ્રસિંહ ધોનની કપ્તાની હેઠળ 28 વર્ષ બાદ 2011માં બીજી વખત વર્લ્ડકપ જીત્યો હતો.