ભારતનો સૌથી મોસ્ટ વોન્ટેડ ગુનેગાર દાઉદ ઇબ્રાહીમ પાકિસ્તાનમાં છુપાયેલો બેઠો છે. ભારત જ્યારે પણ પાકિસ્તાન પાસે દાઉદ ઇબ્રાહીમના પ્રત્યર્પણનો મુદ્દો ઉઠાવે છે, ત્યારે દરવખતે પાકિસ્તાન દાઉદ તેમના દેશમાં નથી તેમ કહે છે. મુંબઇમાં થયેલા 1993 સીરીયલ બ્લાસ્ટનો માસ્ટર માઇન્ડ દાઉદ છેલ્લાં 25 વર્ષથી ફરાર છે અને પાકિસ્તાનમાં છે. આ ખુલાસો અમેરિકાએ કર્યો છે.
ગુપ્તચર એજન્સીઓના હાથે લાગેલી દાઉદની આ તસવીર ત્યારે લેવાઇ જ્યારે તે ડી નેટવર્ક ઇન્ટરનેશનલ નેટવર્ક જોનારા પોતાના સૌથી ખાસ જાબિર મોતીવાલને મળી રહ્યો હતો. દાઉદની આ તસવીરોમાં એકદમ સ્વસ્થ લાગી રહ્યો છે. આની પહેલાં કેટલાંય મીડિયા રિપોર્ટના હવાલે સામે આવ્યું હતું કે, દાઉદને ઘૂંટણની ગંભીર બીમારી છે.
જાબિર મોતીવાલા દાઉદના કરાચીમાં આવેલા ક્લિફંટન હાઉસની બાજુમાં રહે છે અને તેને દાઉદની પત્ની મેહજબીન અને તેના દીકરા મોઇન નવાજ સાથે પારિવારિક સંબંધ છે. જાબિર મોતીવાલા એ શખ્શ છે, જેની બ્રિટનમાં ધરપકડ કરાઇ છે. અમેરિકાની FBI બ્રિટનમાંથી તેના પ્રત્યર્પણની કોશિષમાં લાગી ગયું છે. FBIના મતે જાબિર મોતીવાલા ખુલાસો કરી ચૂકયા છે કે દાઉદ પાકિસ્તાનમાં છે. જો કે પાકિસ્તાને ફરી એકવખત કહ્યું છે કે દાઉદ પાકિસ્તાનમાં નથી.
અમેરિકન તપાસ એજન્સીઓના મતે જાબિર મોતીવાલા દાઉદનો ખાસ છે. તેની પાસે દાઉદ અને તેના નેટવર્કને લઇ ઘણી માહિતી છે. એવામાં ભારતીય એજન્સીઓ જાબિર મોતીવાલાના ડી નેટવર્કને લઇ FBI સાથે સંપર્ક કરવાની તૈયારીમાં છે. ભારતીય એજન્સીઓના મતે દાઉદના ડી.નેટવર્ક અને પાકિસ્તાની ગુપ્તચર એજન્સી ISIની વચ્ચે ગઠબંધન છે. મોતીવાલા તેમાં અગત્યની કડી છે. મોતીવાલા ડી નેટવર્કનું આંતરરાષ્ટ્રીય નેટવર્ક ચલાવે છે.
ઉલ્લેખનીય છે કે, દાઉદ ઇબ્રાહીમની હાલ સામે આવેલી તસવીર તાજી છે કે થોડાંક સમય પહેલાંની તેની અમે કોઇ પુષ્ટિ કરતાં નથી. FBIની તપાસમાં ખુલાસો થયો છે કે, જાબિર મોતીવાલાની પાસે યુકેના દસ વર્ષના વીઝા છે. જેની સમય મર્યાદા 2028મા ખત્મ થશે. પંરતુ તેઓ થોડાંક મહિનાથી પોતાના પરિવારની સાથે એન્ટિગુઆ અને બરમુડાની નાગરિકતા લેવાની કોશિષમાં લાગેલો હતો. ડી કંપનીના નેટવર્ક પર નજર રાખનારા એક અધિકારીએ કહ્યું કે જાબિર મોતીવાલાની ધરપકડથી પાકિસ્તાનને ડર છે કે આખી દુનિયા સામે પાકિસ્તાન દાઉદ ઇબ્રાહીમને લઇ બેનકાબ થઇ શકે છે.