WEF / દાવોસમાં કમલનાથે કહ્યું, આ પહેલા ભારતની મંદી વિશે આટલી ચર્ચા ક્યારેય નથી સાંભળી

• મધ્યપ્રદેશના CM કમલનાથે દેશની આર્થિક સ્થિતિ પર ચિંતા દર્શાવી
• તેઓએ કહ્યું કે, તમામ લોકો ભારતની આર્થિક મંદી વિશે પૂછી રહ્યા છે
• WEF સમ્મેલનમાં દુનિયાભરથી 3000થી વધારે પ્રતિનિધિ ભાગ લઇ રહ્યા છે

તેઓએ કહ્યું કે, હું જે લોકોને પણ મળ્યો, તમામ કથળતી જઇ રહેલી ભારતની અર્થવ્યવસ્થા અને વધતા સામાજીક અસંતોષની વાત કરી રહ્યા હતા. 

વિશ્વ આર્થિક મંચ (WEF) સમ્મેલનની 50મી બેઠક સોમવારે એટલે કે 20 જાન્યુઆરીથી શરૂ થઇ છે અને તે 24 જાન્યુઆરી સુધી ચાલશે. સ્વિટ્ઝરલેન્ડના રિઝૉર્ટ શહેર દાવોસમાં વર્લ્ડ ઇકોનોમિક ફોરમ સમ્મેલનમાં દુનિયાભરથી 3000થી વધારે પ્રતિનિધિ ભાગ લઇ રહ્યા છે. 

આ બેઠકમાં વિશ્વના ઘણા મોટા લોકો એક મંચ પર જોવા મળશે. અમેરિકી રાષ્ટ્રપ્રમુખ ડોનાલ્ડ ટ્રમ્પ, બ્રિટેનના પ્રિન્સ ચાર્લ્સ, જર્મનીની ચાન્સેલર એન્જેલા મર્કેલ, અફઘાનિસ્તાનના અશરફ ગની અને પાકિસ્તાનના વડાપ્રધાન ઇમરાન ખાન આ વાર્ષિક બેઠકમાં ભાગ લેશે. 

સ્વિટ્ઝરલેન્ડના દાવોસમાં ભારતીય પ્રતિનિધિમંડળનું પ્રતિનિધિત્વ કેબિનેટ મંત્રી પીયૂષ ગોયલ કરી રહ્યા છે. તેમના સિવાય રાજ્યમંત્રી મનસુખ લાલ માંડવિયા, મધ્યપ્રદેશના મુખ્યમંત્રી કમલનાથ, કર્ણાટકના મુખ્યમંત્રી બીએસ યેદિયુરપ્પા, પંજાબના નાણામંત્રી અને તેલંગાણાના સૂચના મંત્રી પણ ભાગ લઇ રહ્યા છે. મંત્રીઓ ઉપરાંત કેટલાક ટોચના ઉદ્યોગપતિઓ, ફિલ્મ અભિનેત્રી દીપિકા પાદુકોણ અને સદગુરુ પણ તેમા સામેલ થયા છે.