ઈન્ટરનેટ ક્રાંતિ બાદ ભારતમાં ઇન્ટરનેટનાં ઉપયોગમાં ખુબ વધારો થયો છે, ઈન્ટરનેટ પર ડેટા ચોરીની ઘટનાઓ પણ સામે આવી રહી છે ત્યારે મોદી સરકાર દેશમાં ડેટા સરંક્ષણ કાયદો લાવવા જઈ રહી છે. ડેટા પ્રોટેક્શન બિલમાં ડેટા કેન્દ્ર બનાવવાના પ્રસ્તાવ મુકવામાં આવ્યો છે. દેશમાં આર્ટીફીશીયલ ઈન્ટેલીજન્સમાં એક ઇકોસિસ્ટમ પણ ઉભું કરવાની તૈયારી છે જેની મદથી દેશમાં રોજગાર ઉભું થાય તેની સંભાવના છે.
ડેટા ચોરી કરતી કંપનીઓને કડક સજા કરવાની જોગવાઈ
ગૂગલ ફેસબુક જેવી કંપનીઓની ઓફીસ ભારતમાં નથી જેથી તેમના પર ભારતનાં કાયદા લાગુ પડતા નથી
ભારત દુનિયાનું સૌથી મોટું ડેટા રિફાયનરી કેન્દ્ર બની શકે
ફેસબુક અને ગૂગલ જેવી કંપનીઓ પર ભારતમાં જ ડેટા સ્ટોર કરવાના આદેશ આપવામાં આવી શકે
આ બિલમાં વ્યક્તિગત માહિતીઓ ચોરી કરનાર કંપનીઓ પર કડક કાર્યવાહી કરવાની વાત કરવામાં આવી છે. નિયમોનું ઉલ્લંઘન કરનાર કંપનીઓ પર 15 કરોડનો દંડ અથવા વૈશ્વિક કારોબારનાં 4 ટકા જેટલો દંડ કરવામાં આવશે, સાથે સાથે જેલની સજાની જોગવાઈ પણ કરવામાં આવી છે. ફેસબુક અને ગૂગલ જેવી કંપનીઓ પર ભારતમાં જ ડેટા સ્ટોર કરવાના આદેશ આપવામાં આવી શકે છે.
ડેટા પ્રોસેસિંગની પ્રોત્સાહન આપશે આ બિલ
અત્યારે ભારતનાં ડેટા પર અમેરિકન કંપનીઓનું નિયંત્રણ છે. પરંતુ આ બિલ આવ્યા બાદ ડેટાને ભારતમાં સંગ્રહિત કરવા આદેશ આપવામાં આવશે જે બાદ વિદેશીઓ દ્વારા ડેટા ચોરીની સંભાવનાઓ ઘટશે. આશા છે કે આ બિલ બાદ કંપનીઓ ડેટા પ્રોસેસિંગ ભારતમાં જ કરશે જેના કારણે ભારત દુનિયાનું સૌથી મોટું ડેટા રિફાયનરી કેન્દ્ર બની શકે છે.
દેશમાં હાલ ડેટા પ્રોટેક્શન પર કોઈ જ કાયદો નથી
ડિજિટલ અર્થવ્યવસ્થામાં ડેટા એક સંપત્તિ છે, ઘણી કંપનીઓ ડેટા લઈને સેવાઓ આપે છે આવી કંપનીઓ વ્યક્તિગત ડેટાનો ઉપયોગ કંપનીના અંગત સ્વાર્થ માટે પણ કરે છે. ભારતમાં ડેટા પ્રોટેક્શન માટે કોઈ જ અલગ કાયદો બનાવવામાં આવ્યો નથી. ભારતમાં એવી કોઈ સંસ્થા નથી જે ડેટાની ગોપનીયતા પર સુરક્ષા આપી શકે. નોંધનીય છે કે વ્યાપર માધ્યમથી એપલ, ગૂગલ, ફેસબુક અને ટ્વીટર અને વોટ્સએપ જેવી કંપનીઓ કરોડો રૂપિયા કમાઈ રહી છે પરંતુ ભારતમાં તેની ઓફીસ ન હોવાના કારણે તેમના પર ભારતનાં કાયદા લાગુ પડતા નથી,.
બિલમાં સરકારને છૂટ આપવામાં આવતા સામાજિક કાર્યકર્તાઓએ વિરોધ કર્યો
કેન્દ્રિય મંત્રી રવિશંકર પ્રસાદે કહ્યું હતું કે સરકાર પ્રાઈવસીને ગંભીરતાથી લે છે.ભારતમાં ઘણા વિશેષજ્ઞો આ બિલને બેધારી તલવાર જેવું માને છે. તજજ્ઞોનું માનવું છે કે જ્યાં એક તરફ પ્રાઈવેટ કંપનીઓને ડેટા ચોરી પર રોક લગાવવામાં આવી રહી છે જયારે બીજી તરફ તેમા સરકારને છૂટ આપવામાં આવી રહી છે. દુનિયાભરમાં ડેટા સુરક્ષા માટે કાયદા બનાવવામાં આવ્યા છે, યુરોપિયન સંઘ અને ચીન જેવા દેશોએ કંપની પર નિયંત્રણ લગાવતા કાયદા બનાવ્યા છે. એવામાં ભારતમાં આ કાયદો લાવવા માટે એક સશક્ત ઢાંચાની ખાસ જરૂર છે.