હવામાન વિભાગ / ખેડૂતોના માથે ચિંતાના ઘેરા વાદળો છવાયા, ગુજરાતમાં વરસાદને લઈ હવામાનની મોટી આગાહી

• વરસાદને લઈ હવામાન વિભાગની આગાહી
• ઓગસ્ટના અંતમાં વરસાદી સિસ્ટમ થશે સક્રિય
• ઓગસ્ટ માસ પ્રમાણે 44 ટકા વરસાદની ઘટ

રાજ્યમાં હવામાન વિભાગે વરસાદને લઈ આગાહી કરતા  જણાવ્યું છે કે આગામી પાંચ દિવસ સુધી રાજ્યમાં વરસાદની સંભાવનાઓ નહીંવત જોવા મળી રહી છે હવામાને વધુ જણાવતા કહ્યું કે ગુજરાતમાં જરૂર મુજબ જોઈએ એવો વરસાદ પડ્યો નથી રાજ્યમાં હજુ 44 ટકા વરસાદની ઘટ જોવા મળી રહી છે. જુલાઈના અંતિમ સપ્તાહ બાદ વરસાદે લાંબો વિરામ લીધો છે જેને લઈ હવે ખેડૂતો પણ ચિંતામાં મુકાઈ ગયા છે. ત્યારે હવામાનની વિભાગની આગાહી સામે આવતા ખેડૂતોમાં ચિંતાનું મોજુ ફરી વળ્યું છે.

ઓગસ્ટ માસ પ્રમાણે 44 ટકા વરસાદની ઘટ

મહત્વનું  છે કે રાજ્યમાં સીઝનનો જોઈએ એટલો વરસાદ પડયો નથી, સામાન્ય રીતે ઓગસ્ટના પ્રથમ સપ્તાહ સુધીમાં 450 મીમી વરસાદ થઈ જવો જોઈએ પરતું હજુ માત્ર સિઝનનો 253 મીમી વરસાદ  નોંધાતા ખેડૂતો ચિંતિત બન્યા છે. કેમ કે હવામાન વિભાગે આગામી પાંચ દિવસ સુધી વરસાદની સંભાવનાઓ પર રોક લગાવી દીધી છે. તેમજ આગામી સમયમાં ગરમીનું પ્રમાણ વધશે તેવું હવામાન વિભાગે અણસાર આપ્યો છે. જો કે હવામાને દક્ષિણ ગુજરાત અને તેની આસપાસના પથંકમાં સામાન્ય  વરસાદની આગાહી કરી છે. 

ઓગસ્ટના અંતમાં વરસાદી સિસ્ટમ થશે સક્રિય

મહત્વનું છે કે ઓગસ્ટના અંત સુધીમાં વરસાદી સિસ્ટમ સક્રિય થઈ શકે તેવું હવામાન વિભાગે જણાવ્યું છે તે બાદ ગુજરાતની શક્યાતા જોવા મળી શકે છે. હવામાન વિભાગે કરેલી આગાહી બાદ રાજ્યના ખેડૂતોમાં ચિંતાનું મોજુ ફરી વળ્યું છે, ખેતીની સિઝનમાં ખેડૂતોને સિંચાઈ માટે પૂરતું પાણી ન મળી શકતા હવે તેમને તૈયાર થયેલો પાક બગડે નહીં તેની ચિંતા સતાવી રહી છે.