જિલ્લા ભાજપ પ્રમુખના રાજીનામાથી ડાંગના રાજકારણમાં ગરમાવો, ભાજપ સંગઠન-ચૂંટાયેલા પાંખ વચ્ચે વિખવાદ ચાલતો હોવાને કારણે રાજીનામું આપ્યું હોવાનું પણ ચર્ચા
ડાંગ જિલ્લા ભાજપ પ્રમુખનું રાજીનામું
દશરથ પવારે આપ્યું રાજીનામું
આંતરિક વિવાદમાં રાજીનામું આપ્યું
ડાંગ જિલ્લા ભાજપ પ્રમુખ દશરથ પવારે રાજીનામું આપી દીધું છે. વાત જાણે એમ છે કે, ડાંગ પંથકમાં ભાજપને મોટો ફટકો પડ્યો છે. ડાંગ જિલ્લા ભાજપ પ્રમુખ પદેથી દશરથ પવારે સ્વૈચ્છિક રાજીનામું આપ્યું હોવાનું સામે આવ્યું છે. આ સાથે ડાંગ ભાજપ સંગઠન-ચૂંટાયેલા પાંખ વચ્ચે વિખવાદ ચાલતો હોવાને કારણે રાજીનામું આપ્યું હોવાનું પણ ચર્ચાઇ રહ્યું છે. મહત્વનું છે કે, આંતરિક વિવાદમાં સૌ પ્રથમ જિલ્લા ભાજપ પ્રમુખે રાજીનામું આપ્યું છે.
ગુજરાત વિધાનસભા ચૂંટણીમાં ભાજપે 156 સીટો જીતી હતી. જોકે હવે ભાજપ-સંગઠન અને ચૂંટાયેલ પાંખ વચ્ચે વિખવાદને કારણે ડાંગ જિલ્લા ભાજપ પ્રમુખે રાજીનામુ ધરી દેતાં હડકંપ મચી ગયો છે. દક્ષિણ ગુજરાત એ ગુજરાત ભાજપના પ્રદેશ અધ્યક્ષ સીઆર પાટીલનો ગઢ ગણાય છે. જોકે પાટીલના ગઢ દક્ષિણ ગુજરાતનાં ડાંગ જિલ્લા ભાજપ પ્રમુખ દશરથ પવારે તેમના હોદ્દા પરથી રાજીનામું આપી દેતાં પંથકનું રાજકારણ ગરમાયું છે.
શું કહ્યું દશરથ પવારે?
ડાંગ જિલ્લા ભાજપ પ્રમુખ દશરથ પવારે પોતાના લેટરહેડ પર પ્રદેશ પ્રમુખ સી.આર.પાટીલને સંબોધીને એક પત્ર લખ્યો છે. જેમાં દશરથ પવારે લખ્યું કે, હું ડાંગ જિલ્લા ભાજપ પ્રમુખ પદેથી સ્વૈચ્છિક રાજીનામું આપું છું જે સ્વીકારવા વિનંતી છે. આ લેટરપેડની નીચે દશરથ પવારે સહી કરી છે.
ભાજપ સંગઠન અને ચૂંટાયેલ પાંખ વચ્ચે વિખવાદ
ચર્ચાઓ મુજબ છેલ્લા કેટલાક દિવસોથી ડાંગ ભાજપ સંગઠન અને ચૂંટાયેલ પાંખ વચ્ચે વિખવાદ ચાલતો હતો. ડાંગ ભાજપ સંગઠનમાં આંતરિક ખેંચતાણ બાદ જિલ્લા પ્રમુખનું સૌથી પહેલું રાજીનામુ પડ્યુ છે. ભાજપ સંગઠનમાં આંતરિક ખેંચતાણ લઈને કાર્યકરોની ચર્ચા મુજબ આગામી દિવસોમાં વધુ હોદ્દેદારો સંગઠનના હોદ્દા પરથી રાજીનામું આપી શકે છે. નોંધનીય છે કે, ભાજપ પ્રમુખે થોડા દિવસો પહેલા ડાંગ જિલ્લામાં થતા ભ્રષ્ટાચારને લઈ અવાજ પણ ઉઠાવ્યો હતો.