સુરત / મોડા મોડા પોલીસ જાગી! ગણેશ ઉત્સવના નામે દારૂ પી'ને નાચતા 8 દારૂડીયાઓની કરી ધરપકડ

સુરતમાં ગણપતિ તહેવાર દરમિયાન દારૂની રેલમછેલ થઇ હોવાનો વીડિયો સામે આવ્યો છે. શખ્સો દારૂ પીને ધતિંગ કરતા શખ્સોનો વીડિયો વાયરલ થયો છે. જાહેરમાં બિયર અને દારૂ પીતા શખ્સો જોવા મળી રહ્યાં છે. એટલું જ નહીં પરંતુ ગણેશ ઉત્સવના નામે આ  શખ્સો નશામાં બિંદાસ્ત નાચી રહ્યા હોવાનું પણ વીડિયો જોઈ શકાય છે.

અહીં સવાલ એ છે કે કેમ વારંવાર આવી ઘટનાઓ સુરતમાં બનતી રહે છે. આમ જોઈએ તો ગુજરાતમાં દારૂબંધી છે. પરંતુ જ્યારે આવા વીડિયો સામે આવે છે ત્યારે દારૂબંધી માત્ર કાગળ પર હોય તેમ લાગે છે.

જો કે આ વીડિયો સોશિયલ મીડિયામાં વાયરલ થયા બાદ જ્યારે VTV અહેવાલ પ્રસારિત કર્યો ત્યારે મોડા મોડા પણ પોલીસે 8 આરોપીઓની ધરપકડ કરી છે. વધુ તપાસ હાથ ધરી છે. તમામ આરોપીઓ સામે પોલીસે જાહેરમાં દારૂ પીવાનો અને ધાર્મિક લાગણી દુભાવવાનો ગુનો દાખલ કર્યો છે.

ઝડપાયેલા આરોપી

• કમલેશ ઉર્ફે કાલુ કાંતિભાઈ રાણા
• તેજસ કિરીટ રાણા
• રોશન જશવંત રાણા
• અમિત સોમચંદ્ર રાણા
• અનિલ રમેશ રાણા
• અશરફખાન અખ્તરખાં પઠાણ
• રજનીકાંત પ્રાણજીવન રાણા
• ગણેશ રવીચંદ્ર રાણા

પોલીસના જણાવ્યા અનુસાર, સુરતના મહિધરપુર વિસ્તારના ગોલવાડ વિસ્તારમાં શિવ ગણેશ મિત્ર મંડળ દ્વારા ગણેશ ઉત્સવ યોજાયો હતો. જેમાં તેઓ નશાની હાલતમાં નાચતા હોવાનો વીડિયો વાયરલ થયો હતો. જ્યારબાદ પોલીસે કાર્યવાહી કરતા ગુનો દાખલ કરીને કેટલાક શખ્સોની ધરપકડ કરી છે. તો આ મામલે વધુ તપાસ હાથધરવામાં આવી છે.

ગોલવાડ વિસ્તાર દારૂ માટે કુખ્યાત

એક નહીં પણ ત્રણ વીડિયો સોશિયલ મીડિયામાં વાયરલ થયા છે. આ વીડિયો સુરતના ગોલવાડ વિસ્તારનો હોવાનું માનવામાં આવી રહ્યું છે. ગોલવાડ વિસ્તારનું એટલે મનાઇ રહ્યું છે કે, આ વિસ્તાર દારૂ માટે કુખ્યાત છે. જાહેરમાં દારૂ વેચાતો હોવાના અહેવાલો અગાઉ પણ આવી ચુક્યા છે. પોલીસ જ્યારે આ વિસ્તારમાં રેડ કરવા જતી ત્યારે મહિલાઓ દ્વારા પણ હુમલા થયા હતા.

ત્યારે અહીં કેટલાક સવાલો થાય છે કે, શું આ લોકોને કાયદાનો કોઇ ડર જ નથી? દારૂ અને બિયરની બોટલ ક્યાંથી આવી? શું દારૂબંધી માત્ર કાગળ પર જ છે? દારૂ પર પ્રતિબંધ છે તો ક્યાંથી આવી દારૂની બોટલો? શું આવા તત્વોને પોલીસનો કોઇ ભય જ નથી? ઉત્સવના નામે દારૂ પીને ધતિંગ કરતા આવા લોકો પર કાર્યવાહી ક્યારે?