આવડત અને પ્રકૃતિ પ્રત્યેના લગાવથી માણસ ધારે તો શું ન કરી શકે. માણસ ધારે તો પથ્થર પણ તોડી શકે છે અને વિશ્વને હચમચાવી પણ શકે છે. પરંતુ આજે માનવીના પ્રકૃતિ પ્રત્યેના પ્રેમની વાત કરવી છે. દાહોદ જિલ્લાનો એક અંતરિયાળ પહાડી વિસ્તાર જે હંમેશા સુકો ભટ્ટ રહેતો હતો. ત્યારે વન વિભાગની મહેનતથી પ્રકૃતિ ખિલી છે. ત્યારે કેવી છે માનવીની મહેનતથી ખીલેલી વનરાજી...
કેમ્પા અભિયાનની સફળતાની હરિયાળી
વન વિભાગે બનાવ્યા વન તળાવ
સુકા પહાડો પર 42 હજાર વૃક્ષોનું વાવેતર
એક સમયે રુખો-સુખો પહાડી વિસ્તાર હતો ત્યાં આજે લીલી ચાદર છવાઇ ગઇ છે. તેનો આકાશી નજારો પણ રમણીય છે. અહીં હવે હરિયાળી છે, કારણ કે અહીં કોઈની મહેનત રંગ લાવી છે. અહીં કોઈની મહેનતે આ પહાડોની વચ્ચે પાણી પૈદા કર્યું છે.
દાહોદ જિલ્લાના દુર્ગમ વિસ્તાર અને લીમડાબરા ગામના ડુંગરાઓનો છે. જ્યાં વન વિભાગની જમીન પર પહાડોની વચ્ચે વન વિભાગે કેમ્પા યોજના શરૂ કરી છે. આ કેમ્પા યોજનાનું પરિણામ તમે જે તડાવો જોઈ રહ્યા છો તે છે. વન વિભાગના અથાગ પ્રયાસો અને મહેનતના કારણે સમગ્ર પહાડી વિસ્તારમાં 12 તળાવો ઉભા કરાયા છે, જે તમામ છલકાઈ ગયા છે. તેમાંથી નવા નીર વહી રહ્યા છે. ઝરણાઓ ખિલી ઉઠ્યા છે.
બીજી તરફ વન તળાવોની ચોતરફ પહાડો પર બિંદુઓની માફક કાંઈક હયાતીનો અહેસાસ પણ થાય છે. આ અહેસાસ બીજું કાઈ નહીં પરંતુ વન વિભાગ અને આસપાસના ગામડાના લોકો દ્વારા તૈયાર કરવામાં આવેલા 42,042 ખાડા છે. જેમાં વૃક્ષા રોપણ કરવામાં આવી રહ્યું છે. એટલે કે, સુકા ભટ્ટ રહેતા પહાડો પર પ્રકૃતિને જીવંત કરવાની આ મુહિમ શરૂ કરાઈ છે.
49 હેક્ટરમાં 12 વન તળાવ ઉભા કરાયા
વન વિભાગના પ્રયાસથી 49 હેક્ટરમાં 12 વન તળાવ ઉભા કરાયા છે. આ તળાવો ઉભા થતા જ આસપાસના ગામડાઓના લોકોને તેમજ ખેડૂતોને ખેતી માટે ખુબ મોટો લાભ મળી રહ્યો છે. એવું કહી શકાય કે, તેમની પાણીની સમસ્યાનું નિવારણ થઈ ગયું છે. જોકે અહીં વન વિભાગ દ્વારા નર્સરી પણ બનાવવામાં આવી છે. જ્યાં વિવિધ પ્રકારના રોપાઓને ઉગાડી તેનું આ પહાડી વિસ્તારમાં વાવેતર કરવામાં આવી રહ્યું છે.
પ્રકૃતિનું જતન કરનારા ભાગ્યે જ જોવા મળે છે
મહત્વનું છે કે, એક તરફ વિશ્વમાં જંગલો ઘટી રહ્યા છે. તેવામાં અહીં વન વિભાગના અથાગ પ્રયાસોથી સુકા ભટ્ટ વિસ્તારમાં જંગલ બનાવવામાં આવી રહ્યું છે. પહાડોને લીલી ચાદર પોઢાડવામાં આવી છે. આ પ્રયાસને VTV બિરદાવે છે. વન વિભાગના તમામ અધિકારીઓને VTV સલામ કરે છે. કારણ કે, હાલના સમયમાં પ્રકૃતિનું પતન કરનારા તો ડગલે ને પગલે મળશે. પરંતુ જતન કરનારા ભાગ્યે જ જોવા મળે છે.