દહેગામ બ્રાંચના ICICI બેંકના ડેપ્યુટી મેનેજરે કરી છેતરપિંડી
ગોલ્ડ લોન માટે મૂકેલા 7 લોકોના દાગીના સગેવગે કર્યાનો દાવો
દાગીના પર આશરે 20 લાખથી વધુની લોન બેંકે આપી હતી
દહેગામ બ્રાંચના ICICI બેંકના ડેપ્યુટી મેનેજરે છેતરપિંડી કર્યાની ઘટના સામે આવી છે. બેંકના મેનેજરે પોતાની બેંકના જ ડેપ્યુટી મેનેજર સામે ફરિયાદ નોંધાવી છે. ગોલ્ડ લોન માટે મૂકેલા 7 લોકોના દાગીના સગેવગે કર્યાનો બેંકના મેનેજરે દાવો કર્યો છે. નવા મેનેજરે ચાર્જ સંભાળતાની સાથે જ તપાસ કરતા આ સમગ્ર ભાંડો ફૂટ્યો. જો કે બીજી બાજુ કૌભાંડી ડેપ્યુટી મેનેજર દિપક સોની ફોન બંધ કરીને રફુચક્કર થઇ ગયો છે.
દાગીના પર આશરે 20 લાખથી વધુની લોન બેન્કે આપી હતી
તમને જણાવી દઇએ કે, છેલ્લાં એક માસથી દિપક સોની ડેપ્યુટી મેનેજરની ફરજ બજાવતો હતો. 9 મેથી દિપક રફુચક્કર થતા દહેગામ પોલીસ મથકમાં ફરિયાદ નોંધાઇ છે. દિપક આર્થિક લેણાંમાં ફસાઈ જતા બેંકનું સોનું સગેવગે કર્યાની ચર્ચા વહેતી થઇ છે. દાગીના પર આશરે 20 લાખથી વધુની લોન બેન્કે આપી હતી. દહેગામ પોલીસે બેંક મેનેજરની ફરિયાદના આધારે આ સમગ્ર મામલે વધુ તપાસ હાથ ધરી છે.
બેંક દ્વારા ઓડિટ કરવામાં આવતા સમગ્ર ભાંડો ફુટ્યો
બેંકનાં સાત ગ્રાહકો દ્વારા અલગ-અલગ પાઉચમાં 554.45 ગ્રામ સોનું બેંકમાં ગીરવે મૂકવામાં આવ્યું હતું. જેની સામે બેંક દ્વારા રૂ. 14 લાખ 68 હજાર 595નું ધિરાણ કરવામાં આવ્યું હતું. આ સોનું ગાયબ કર્યા બાદ બેંકના ડેપ્યુટી મેનેજરે ફોન ઉઠાવવાનાં બંધ કરી ફોનને જ સ્વીચ ઓફ કરી દીધો હતો. જો કે, બેંક દ્વારા ઓડિટ કરવામાં આવતા આ સમગ્ર કિસ્સો પ્રકાશમાં આવ્યો. આ મામલે દહેગામ પોલીસે ગુનો નોંધીને આગળની કાર્યવાહી હાથ ધરી છે.