સુરત: ફરી એક વખત શહેર પોલીસની દાદાગીરી સામે આવી છે. સુરતના ઉધના વિસ્તારમાં પોલીસે લાઈસન્સ હોવા છતા 1 વાગતા પહેલા હોટલો બંધ કરાવી છે. હોટલના માલિકે ચા ન પીવડાવતા પોલીસકર્મીઓએ મારામારી કરી હોવાના હોટલના માલિકે આક્ષેપ કર્યા હતા.
છેલ્લા 3 મહિનાથી હોટલ માલિકને હેરાન કરતા હોવાનો હોટલના માલિક દ્વારા આક્ષેપ કરવામાં આવ્યો છે. આ સાથે જ સત્તાનો દુરૂપ્રયોગ કરીને પોલીસ દાદાગીરી કરે છે તેવા પોલીસ પર આક્ષેપ કરાયા છે.
આ ઘટના મામલે મળતી વિગત મુજબ શુક્રવારની રાત્રે 10 વાગ્યાના આસપાસના સમયગાળામાં સ્થાનિક પોલીસનો એક કાફલો હાથમાં ધોકા અને લાકડી લઇને પહોંચી ગયો હતો. જેમાં આશરે ડઝન જેટલા પોલીસ કર્મચારીઓ હાથમાં દંડા સાથે હોટલ ઉપર પહોંચીને દાદાગીરી કરવા લાગ્યા હતા. આ તમામ કર્મીઓએ હોટલ બંધ કરી દેવા ધાક-ધમકી આપી હોવાનો આરોપ હોટલના માલિકો પોલીસકર્મીઓ પર લગાવ્યો હતો.
આ સાથે હોટલના માલિકે માધ્યમ સાથે વાતચીત કરતા વધુમાં કહ્યું કે પોલીસકર્મીઓને ચા નહીં પીવડાવતા તેમણે મારામારી પણ કરી હતી. જો કે આ મામલે એક CCTV ફુટેજ વાયરલ થયા છે.
જેમાં પોલીસકર્મીઓ હોટલ બંધ કરાવતા નજરે પડે છે. આપને જણાવી દઇએ કે આ હોટલ પાસે રાતના 1 વાગ્યા સુધી ચાલુ રાખવાનું લાયસન્સ છે. ત્યારે હવે જોવું જ રહ્યું કે સ્થાનિક પોલીસવડા દ્વારા આ મામલે કોઇ ચોક્કસ પગલા લેવામાં આવે છે કે નહીં.