BIG NEWS / વાઘોડિયાના દબંગ ધારાસભ્ય મધુ શ્રીવાસ્તવે ભાજપમાંથી આપ્યું રાજીનામું, અપક્ષ ચૂંટણી લડવાની કરી જાહેરાત

• ટિકિટ કપાયા બાદ મધુ શ્રીવાસ્તવની મહત્વની જાહેરાત
• વાઘોડિયાના ધારાસભ્ય મધુ શ્રીવાસ્તવે ભાજપમાંથી આપ્યું રાજીનામું
• મધુ શ્રીવાસ્તવે ધારાસભ્ય પદેથી પણ આપ્યું રાજીનામું
• અપક્ષ ચૂંટણી લડશે મધુ શ્રીવાસ્તવ

આજે...કાલે...ની લાંબી રાહ જોવડાવ્યા બાદ ભાજપ દ્વારા 166 ઉમેદવારોના નામ જાહેર કરી દેવામાં આવ્યા છે. ભાજપ દ્વારા ઘણા સિનિયર નેતાઓને આ વખતે ઘર ભેગા કરી યુવાઓને પ્રાધાન્ય આપવામાં આવ્યું છે. વડોદરાની વાઘોડીયા બેઠકના ભાજપના બાહુબલી ધારાસભ્ય મધુ શ્રીવાસ્તવની ટિકિટ કાપવામાં આવતા તેઓએ ભાજપ અને ધારાસભ્ય પદેથી રાજીનામું આપી દીધું છે. ટિકિટ કપાયા બાદ મધુ શ્રીવાસ્તવ પાર્ટીથી નારાજ હતા. આ સાથે જ તેમણે અપક્ષ ચૂંટણી લડવાની જાહેરાત કરી છે. 

અપક્ષ ચૂંટણી લડશે મધુ શ્રીવાસ્તવ
વડોદરામાં દબંગ ધારાસભ્યની છાપ ધરાવતા વાઘોડિયા મધુ શ્રીવાસ્તવ જેઓ અવાર નવાર તેઓની વિવાદિત નિવેદનોને લઈને ચર્ચામાં આવતા હોય છે. જેઓને ટિકિટ ન આપી ભાજપ દ્વારા જિલ્લા પ્રમુખ અશ્વિન પટેલને ટિકિટ આપતા મામલો ગરમાયો છે. ગુરુવારે સાંજના સુમારે મહાદેવ તળાવ નજીક આવેલ મધુ શ્રીવાસ્તવની ઓફીસે બેઠક મળી હતી. જે બેઠકમાં નિર્ણય કરવામાં આવ્યો હતો કે મધુ શ્રીવાસ્તવ અપક્ષ ઉમેદવારી નોંધાવશે. વધુમાં તેમણે જણાવ્યું હતું કે 'વર્ષોથી પાર્ટીએ કામ કર્યું પણ પાર્ટી એ મારી કદર ના કરી. આ નિર્ણય કાર્યકર્તાઓ સાથેની મીટીંગ બાદ લીધો છે.'

છેલ્લા 6 ટર્મથી આ બેઠક પર શ્રીવાસ્તવનો દબદબો
વાઘોડિયા વિધાનસભા બેઠક વડોદરા જિલ્લામાં આવેલી છે અને વડોદરા લોકસભા બેઠક હેઠળ આવે છે. આ બેઠક પર 1962થી 1985 કોંગ્રેસનો કબજો હતો. જે બાદ 1995થી 2017 સુધી એટલે કે 6 ટર્મથી બાહુબલી નેતાની ઓળખ ધરાવતા મધુ શ્રીવાસ્તવ જીતતા આવ્યા છે.  આપને જણાવી દઈએ કે, ગત 2017ની ચૂંટણીમાં આ બેઠક પર ધર્મેન્દ્રસિંહ વાઘેલા અપક્ષ ઉભા રહ્યા હતા. તેઓને 52734 મત મળ્યા હતા. જ્યારે ભાજપના ઉમેદવાર મધુ શ્રીવાસ્તવને 63,049 મત મળ્યા હતા. એટલે કે ગત વિધાનસભાની ચૂંટણીમાં પણ તેમનો વિજય થયો હતો. 

સેન્સ પ્રક્રિયા વખતે દબંગ નેતાને દૂર રાખવામાં આવ્યા
વડોદરાની વાઘોડીયા બેઠકના ભાજપના ઉમેદવાર માટેની સેન્સ પ્રક્રિયા વખતે કેન્દ્રિય મંત્રી પુરૂષોત્તમ રૂપાલાના અધ્યક્ષ સ્થાને મીટીંગ મળી હતી. ત્યારે દબંગ નેતાને મીટીંગથી દૂર રાખવામાં આવ્યા હોવાનું પણ ચર્ચામાં આવ્યું હતું. ત્યારે યોજાયેલ બેઠક બાદ જ દબંગ નેતાની ટિકિટ કપાય તેવી ચર્ચા "ટોક ઓફ ધ ટાઉન" બની હતી. 

મતદારોની સંખ્યા
2011ની વસ્તી ગણતરીના અંદાજ મુજબ, આ વિસ્તારમાં કુલ 3,57,883 વસ્તી છે. જેમાંથી 55.27 ટકા વસ્તી ગ્રામીણ છે અને 44.73 ટકા શહેરમાં વસવાટ કરે છે. કુલ વસ્તીમાંથી અનુસૂચિત જાતિ (એસસી) અને અનુસૂચિત જનજાતિ (એસટી)નો ગુણોત્તર અનુક્રમે 5.86 અને 14.96 છે.