અરબી સમુદ્રમાં ઉભુ થયેલ ચક્રવાત તોફાન 'કયાર' આગામી 24 કલાકમાં ભયંકર તોફાન બનીને કર્ણાટક, ગોવા, ગુજરાત અને મહારાષ્ટ્રના તટીય વિસ્તારને ટકરાઇ તેવી સંભાવના છે. ચક્રવાતી તોફાનના કારણે તેજ ચાલનારી હવા તેમજ ભારે વરસાદના કારણે દક્ષિણ-પશ્ચિમ ભારતના તટીય વિસ્તાર અને ઉત્તર-પૂર્વના પહાડી વિસ્તારમાં દિવાળીના તહેવારની મજા બગાડવાની શક્યતા જોવા મળી રહી છે.
આગામી 24 કલાકમાં કર્ણાટક, ગોવા, ગુજરાતમાં ટકરાઇ શકે છે ક્યાર
કર્ણાટકમાં ઝડપથી હવા ફૂંકાય તેવી શક્યતા
કોંકણ અને ગોવામાં ભારે વરસાદની સંભાવના
ગુજરાતના કેટલાક વિસ્તારોમાં પડી શકે છે સામાન્યથી મધ્યમ વરસાદ
રત્નાગીરીથી 300 કિમી દૂર ક્યાર વાવાઝોડું સર્જાયું છે. ક્યાર વાવાઝોડુ પશ્ચિમ-ઉત્તર-પશ્ચિમ તરફ 6 કલાકે 12 કિમીનું અંતર કાપી રહ્યું છે. જેને લઇને ગુજરાતના કેટલાંક વિસ્તારોમાં વાદળછાયું વાતાવરણ જોવા મળી રહ્યું છે. ક્યાર વાવાઝોડાની અસર ગુજરાતના ઘણા શહેરોમાં જોવા મળી છે. જેમાં સૌરાષ્ટ્ર-દક્ષિણ ગુજરાતમાં સામાન્યથી મધ્યમ વરસાદની આગાહી કરવામાં આવી છે. ક્યાર વાવાઝોડાને લઇને ગુજરાતના બંદરો પર 2 નંબરનું સિગ્નલ લગાવાયું છે. આ સાથે તમામ માછીમારોને દરિયો ન ખેડવા સૂચન અપાયું છે.
કર્ણાટકમાં જોવા મળી શકે છે વધારે અસર
ભારતીય હવામાન વિભાગે શનિવારે જણાવ્યું હતું કે આગામી 24 કલાકમાં પૂર્વ-મધ્ય અરબી સમુદ્રમાં લહેરની સ્થિતિ વધુ ખરાબ જોવા મળી શકે છે. જેના કારણે ઉત્તરી કર્ણાટકના અનેક વિસ્તારોમાં તોફાની હવા ભયંકર રૂપ ધારણ કરી શકે છે. જેના કારણે ઉત્તરી કર્ણાટકના આંતરિક તેમજ તટિય વિસ્તારમાં તોફાની હવા સાથે ભારે વરસાદની શક્યતા છે.
ક્યાર વાવાઝોડાની અસર આ રાજ્યમાં પણ જોવા મળશે
કોંકણ અને ગોવાના તટીય વિસ્તારમાં પણ ભારે વરસાદની સંભાવના છે. આ સાથે જ ઓડિશા, અસમ અને મેઘાલયમાં પણ કયાર વાવાઝોડાના કારણે વરસાદ પડવાની સંભાવના છે. IMD દ્વારા જણાવવામાં આવ્યું છે કે દક્ષિણી ગુજરાતના દરિયાકાંઠાના વિસ્તારમાં સમુદ્રની સ્થિતિ ખરાબ થઇ શકે છે જ્યારે સૌરાષ્ટ્રના કેટલાંક વિસ્તાર અને કેન્દ્ર શાસિત પ્રદેશ દીવ અને દમણમાં વાવાઝોડા 'ક્યાર'ના કારણે આવનારા 4 દિવસ સુધી તેજ પવન સાથે મધ્યમ વરસાદની સંભાવના છે.
આ અગાઉ IMDએ બે દિવસ સુધી ગોવા, મહારાષ્ટ્ર અને કર્ણાટકના તટીય વિસ્તારોમાં રેડ એલર્ટ જાહેર કર્યું હતું. જેને લઇને કર્ણાટક સરકારે તટિય જિલ્લા દક્ષિણી કન્નડ ઉડ્ડપી અને ઉત્તર કન્નડમાં સ્કૂલ-કોલેજોમાં રજા જાહેર કરી દીધી હતી.