Wednesday, June 26, 2019
સબસ્ક્રાઈબ કરો VTVGujarati ન્યુઝ Whatsapp

વાવાઝોડું / વાયુનું જોર વધ્યું, 150 કિ.મીની ઝડપે વાવાઝોડાંની આશંકાએ હાલ ગુજરાતમાં આ છે સ્થિતિ

વાયુનું જોર વધ્યું, 150 કિ.મીની ઝડપે વાવાઝોડાંની આશંકાએ હાલ ગુજરાતમાં આ છે સ્થિતિ

વાયુ વાવાઝોડાના કારણે દીવ અને આસપાસના વિસ્તારોમાં ધોધમાર વરસાદ પડ્યો છે. વાવાઝોડાને પગલે સૌરાષ્ટ્રમાં 3 લાખ લોકોનું સ્થળાંતર કરવામાં આવ્યું છે અને અમરેલી, જૂનાગઢ, પોરબંદરમાં NDRFની ટીમ તહેનાત કરી દેવાઇ છે. વાયુ વાવાઝોડું 340 કિલોમીટર દૂર છે ત્યારે મોડીરાત્રે મોટી તબાહી સર્જાવાના એંધાણ છે. જેને લઇ વીજળી માટે પણ સરકારે 370 ટીમ તૈયાર કરી દીધી છે.

 

વાયુ વાવાઝોડું 145થી 155 કિલોમીટરની ઝડપે ફૂંકાશે ત્યારે વાવાઝોડાની અસરને જોતા અન્ય રાજ્યમાંથી પણ 12 NDRFની ટીમને બોલાવાઇ છે. અને આર્મીને પણ સ્ટેન્ડબાય રાખવામાં આવી છે. તો સાથે જ દરિયાઇ પટ્ટીના મોટાભાગના ગામોને ખાલી કરાવવામાં આવી રહ્યા છે. આ ઉપરાંત સૌરાષ્ટ્રના 7 જિલ્લામાં તંત્રને એલર્ટ રહેવા આદેશ આપ્યો છે અને પ્રવાસીઓ સહિતના લોકોને દરિયાકિનારે ન જવા સૂચન અપાયું છે. તો સીએમ રૂપાણીએ પણ તંત્રને તમામ સ્થિતિમાં પહોંચી વળવા આદેશ આપ્યા છે.

  • 140થી 150ની ઝડપે સૌરાષ્ટ્ર તરફ આગળ વધી રહ્યું છે વાયુ વાવાઝોડું 
  • વાવાઝોડાના પગલે દક્ષિણ ગુજરાત, દીવ અને સૌરાષ્ટ્રમાં કેટલાક સ્થળે વરસાદ શરૂ
  • સૌરાષ્ટ્ર-કચ્છના 11 જિલ્લા અને દીવમાં વાવાઝોડાની અસરની સંભાવના
  • વેરાવળથી દીવ વચ્ચેના દરિયાકાંઠે વાયુ વાવાઝોડું ત્રાટકે તેવી સંભાવના
  • રાજ્યમાં અંદાજે 3 લાખથી વધુ લોકોનું કરાયું સ્થળાંતર
  • વાયુ વાવાઝોડાને લઇ કંડલા પોર્ટ કરાયું બંધ
  • વાવાઝોડાના પગલે સૌરાષ્ટ્રના એરપોર્ટ બે દિવસ રહેશે બંધ
  • રાજકોટમાં વાવાઝોડાના પગલે PGVSL તંત્ર હાઈ અલર્ટ પર 
  • સૌરાષ્ટ્ર, કચ્છમાં વધારાની ટીમો તૈનાત 

  • ઉનાના 50 ગામના 6665 લોકોનું સ્થળાંતર
  • વેરાવળના 630 લોકોનું સ્થળાંતર 
  • જામનગરના દરિયાકાંઠાના વિસ્તારમાં પણ સ્થળાંતર શરૂ

અરબી સમુદ્રમાં વેરાવળથી 650 કિલોમીટર દૂર કેન્દ્રિત થયેલું વાવાઝોડું વાયુ 140થી 150 કિલોમીટરની સ્પીડથી આગળ વધી રહ્યું છે. 12મી જૂનની મધરાતે અને 13મીના પરોઢે વેરાવળથી દીવ વચ્ચેના દરિયાકાંઠે 150 કિલોમીટર પ્રતિ કલાકની ઝડપે પવન સાથે ત્રાટકે તેવી સંભાવના છે. 

સૌથી વધુ આ વિસ્તારો પ્રભાવિત થવાની સંભાવના

વાયુ વાવાઝોડાને પગલે હવામાન વિભાગના જયંત સરકારે કહ્યું કે, વાયુ વાવાઝોડું વધુ મજબૂત બન્યું છે. આવતીકાલે સવારે વાયુ વાવાઝોડું વેરાવળ અને દીવ વચ્ચે ત્રાટકશે અને સૌરાષ્ટ્ર સાથે દક્ષિણ ગુજરાતના વિસ્તારો પણ વાવાઝોડું પ્રભાવિત થવાની સંભાવના જયંત સરકારે જણાવી છે. તેમણે કહ્યું કે, સોરાષ્ટ્ર અને દક્ષિણ ગુજરાતમાં સૌથી વધુ વાવાઝોડાની અસર થશે. જેમાં દાદરાનગર હવેલી, વેરાવળ, ગીર-સોમનાથ, પોરબંદર, દીવ, દ્વારકા, ભાવનગર, જામનગર, અમરેલી, જુનાગઢ રાજકોટ અને કચ્છમાં સૌથી વધુ વાયુ વાવાઝોડું પ્રભાવિત થવાની સંભાવના છે. વાવાઝોડાની ઝડપ 145થી 150 વચ્ચે હશે, 14 જૂન સુધી વેરાવળ-દીવમાં વાવાઝોડાની અસર જોવા મળશે. લો પ્રેશર સર્જાતા વેરી સેવિયર સાયક્લોન સક્રિય બન્યું છે. સ્કાય મેપ મુજબ વેરાવળથી 340 કિમી દુર વાવાઝોડુ છે. 

અંદાજે એક લાખથી વધુ લોકોનું સ્થળાંતર

વાયુ’વાવાઝોડું રૌદ્ર રૂપ ધારણ કરીને ગુજરાત તરફ આગળ વધી રહ્યું છે અને 140થી 150 કિલોમીટરની ઝડપે સૌરાષ્ટ્રના દરિયાકાંઠે વાવાઝોડું પહોંચશે ત્યારે તેની ઝડપ 165 કિમી થવાની સંભાવના છે. વાવાઝોડું વેરાવળથી 340 કિલોમીટર દૂર છે અને તેની તીવ્રતા વધી રહી છે. ત્યારે સૌરાષ્ટ્ર-કચ્છના પ્રભાવિત થનાર જિલ્લામાંથી મોટી સંખ્યામાં લોકોનું સ્થળાંતર કરવાની કાર્યવાહી વહીવટી તંત્ર દ્વારા આરંભી દેવાઈ છે. અંદાજે એક લાખથી વધુ લોકોનું સ્થળાંતર શરૂ થઈ ગયું છે. સાથે જ એનડીઆરએફની 51 ટીમને તહેનાત કરાઈ છે. ત્યારે વાવાઝોડાની અસર તળે સુસવાટા મારતો પવન ફૂંકાવા લાગ્યો છે અને વરસાદ પણ પડી રહ્યો છે. વાયુ વાવાઝોડાને લઈને વેરાવળમાં નીચાણવાળા વિસ્તારમાં એલર્ટ આપતી ગાડી ફરી રહી છે અને તાકીદે વિસ્તાર છોડી દેવાની સૂચનાઓ આપી રહી છે.

10 જિલ્લાના 23 તાલુકામાં વરસાદ શરૂ:

વાયુ વાવાઝોડુ જેમ જેમ નજીક આવી રહ્યું છે તેમ 10 જિલ્લાના 23 તાલુકામાં વરસાદ શરૂ થઇ ગયો છે. પોરબંદર, ગીરસોમનાથ, વલસાડ, કપરાડા, વેરાવળમાં વરસાદ પડી રહ્યો છે. જ્યારે સોનગઢ, ઉમરપાડા સહિતના વિસ્તારોમાં પણ વરસાદ શરૂ થઇ ગયો છે. જેને લઇ તંત્ર હાલ ખડેપગે છે અને લોકોને સલામત સ્થળે ખસેડવામાં આવી રહ્યા છે.

આર્મી, NDRF અને SDRFની ટીમો ખડે પગે

તો પોરબંદર, ગીરસોમનાથ અને દીવમાં પણ કેટલાક વિસ્તારોમાં વરસાદ પડી રહ્યો છે. આજે માડી રાત્રે અથવા કાલે વહેલી સવારે વાયુ વાવાઝોડું ત્રાટકી શકે છે. જેમાં સૌથી વધુ અસર સોમનાથ, પોરબંદર, કચ્છને થઇ શકે છે. જેને લઇ આર્મીની 34, NDRFની 15 અને SDRFની 11 ટીમો ખડે પગે છે અને હાલ પ્રભાવિત થાય તેવા વિસ્તારોમાંથી લોકોનું સ્થળાંતર પણ કરવામાં આવી રહ્યું છે. પોરબંદરના કાંઠા અને નીચાણવાળા 75 ગામમાંથી 35 હજારથી વધુ લોકોનું સ્થળાંતર કરવામાં આવી રહ્યું છે. ઉપરાંત ઉના પટ્ટીના ગામમાં પણ સ્થળાંતર કરવામાં આવી રહ્યું છે.

તો કચ્છમાં તંત્ર દ્વારા અલર્ટ જાહેર કરવામાં આવ્યું છે. NDRFની ટીમ પણ કંડલા પોર્ટ પહોંચી છે. અહીંના સ્થાનિકોને પણ સુરક્ષિત સ્થળે ખસેડવા માટે કાર્યવાહી હાથ ધરાઈ છે. તો બીજી તરફ, દ્વારકાનો દરિયો પણ હવે ધીરે ધીરે જોર પકડી રહ્યો છે. 

હોસ્પિટલ સ્ટાફ અને સરકારી કર્મચારીઓની રજાઓ મૌકૂફ ​

વાયુ વાવાઝોડાના સંભવિત અસરગ્રસ્ત વિસ્તારોમાં રેસ્ક્યૂ માટે તંત્ર પણ ખડેપગે છે. અસરગ્રસ્તોને સલામત સ્થળે ખસેડવા માટે તૈયારીઓ કરવામાં આવી છે. જેમાં અનેક ગામડાઓના હજારો લોકોને ST બસો દ્વારા સલામત સ્થળે ખસેડવામાં આવશે. જેને લઇ રાજ્યભરમાં કુલ 700 જેટલા સલામત સ્થળ તૈયાર કરાયા છે. તો સાથે જ આંગણવાડી, શાળા-કોલેજોમાં પણ રજા જાહેર કરી દેવાઇ છે અને અસરગ્રસ્ત જિલ્લાઓમાં દરિયાકાંઠે સિગ્નલો અપાયા છે અને અલગ અલગ જિલ્લાઓમાં હેલ્પલાઈનો શરૂ કરાઇ છે.

આ ઉપરાંત આરોગ્ય વિભાગ, વાહન વ્યવહાર વિભાગને સૂચન કરાયા છે, જેમાં હોસ્પિટલ સ્ટાફ અને સરકારી કર્મચારીઓની રજાઓ મૌકૂફ કરી દેવાઇ છે. ત્યારે વાયુ વાવાઝોડાને લઇ ડિઝાસ્ટર મેનેજમેન્ટ, પાણી પુરવઠા, વીજ વિભાગો પણ સતર્ક છે. હાલ ગુજરાત SDRFની 10 ટીમ, આર્મીની 10 ટીમ તૈનાત કરી દેવાઇ છે. આર્મીની અન્ય 23 ટીમોને પણ રિઝર્વ રાખવામાં આવી છે. જ્યારે કચ્છમાં બચાવ કાર્ય માટે BSFની 2 ટીમ ખડેપગે છે. તો રસ્તા ખુલ્લા કરવા માટે 100 JCB રાખવામાં આવ્યા છે. 

આ ઉપરાંત ખોરવાયેલા વીજપુરવઠાને લઈ GEBને સતર્ક કરાયું છે. સાથે જ દરિયાકિનારે માછીમારોને વાવાઝોડાને લઇ સલામત સ્થળે પહોંચવા સૂચનો અપવામાં આવ્યા છે. તો સીએમ રૂપાણીએ NGO, મંદિરો અને સંસ્થાઓને તંત્રની કામગીરીમાં જોડાવા આહવાન કર્યું છે. જ્યારે પ્રવાસીઓને પણ સલામત સ્થળે ખસી જવા સૂચનો કરાયા છે. તો વાયુ વાવાઝોડાને લઇ કેન્દ્ર સરકારે રાજ્ય સરકારને પૂર્ણ સહયોગની બાંહેધરી આપી છે. પીએમ મોદીએ સીએમ રૂપાણીને ફોન કરીને જાણકારી મેળવી છે અને જિલ્લા કક્ષાઓ પર પણ ઉચ્ચ અધિકારીઓ સમીક્ષા કરી ચૂક્યા છે.

સંભવિત વાવાઝોડાને લઇને ગીર-સોમનાથના લોકોની મદદ માટે કંટ્રોલ રૂમના નંબરની યાદી.


વેરાવળ મામલતદાર કચેરીનો નંબર 02876- 244299
તલાળા મામલતદાર કચેરીનો નંબર 02877- 222222
સૂત્રાપાડા મામલતદાર કચેરીનો નંબર 02876-263371
કોડિનાર મામલતદાર કચેરીનો નંબર 02895- 221244
ઉના મામલતદાર કચેરીનો નંબર 02875-222039
ગીર ગઢડા મામલતદાર કચેરીનો નંબર 02875-243100 


 

Gujarati News Cyclone Vayu Cyclone Cyclone in Gujarat

જોવા જેવું વધુ જુઓ

બ્રેકિંગ ન્યૂઝ