તૌકતે વાવાઝોડાને પગલે રાજુલા-જાફરાબાદ વિસ્તારના પાંચ સ્થળોએ સગર્ભા મહિલાઓ અને વૃદ્ધો માટે 108ની ટીમ તૈનાત રાખવામાં આવી છે. શિયાળબેટ ટાપુ પર સગર્ભા મહિલાને ખસેડવા માટે 108ને ફોન આવ્યો હતો. 108 દ્વારા તુરંત કાર્યવાહી કરવામાં આવી હતી. 108ની વાન પીપાવાવ પોર્ટ સુધી જ પહોંચી શકે છે. ત્યાંથી શિયાળબેટ ટાપુ પર જવા માટે હોળીનો સહારો લેવો પડે છે.
108ના કર્મચારીઓ દ્વારા તાત્કાલિક હોળીના માધ્યમથી શિયાળ બેટ પહોંચી સગર્ભા માતાને પીપાવાવ પોર્ટ સુધી લાવવામાં આવ્યા હતા. અને રેસ્ક્યુ કરી તેને 108ની એમ્બ્યુલન્સમાં પ્રાથમિક સારવાર આપ્યા બાદ સલામત સ્થળે પહોંચાડવામાં આવ્યા છે. ત્યારે દરિયામાં કરંટ અને વાવાઝોડાની દેહેશત હોય જીવના જોખમે 108ની ટીમ સ્પેશિયલ હોડી મારફતે દરિયામાં જઈ શિયાળબેટથી આ મહિલાને લઈ આવી તે આ પરિસ્થિતિમાં સરાહનીય કાર્ય ગણી શકાય.
દરિયા વચ્ચે આવેલા બેડદ્વારાકામાં પણ ચિંતા
દ્વારકામાં સંભવિત વાવજોડાના ખતરા સામે બેટ દ્વારકાના લોકોમાં ચિંતા જોવા મળી છે. કારણ કે ઓખાથી બેટ દ્વારકા જવા માટે બોટથી દરિયા મારફતે જવું પડે છે. બેટ દ્વારકાના દરિયામાં હાલ વાતાવરણ શાંત જોવા મળી રહ્યું છે. 12 હજારની વસ્તી ધરાવતું બેટ દ્વારકા દરિયા વચ્ચે આવેલું હોવાથી વાવાજોડાથી લોકોમાં ચિંતાનો માહોલ છે.