હવામાન વિભાગ / નિસર્ગ વાવાઝોડાંની અસરના પગલે હજી પણ ગુજરાતમાં ભારે વરસાદની આગાહી

• વાવાઝોડાંની અસરને પગલે ગુજરાતમાં વરસાદની આગાહી
• દક્ષિણ ગુજરાતમાં 24 કલાક સુધી ભારે વરસાદની આગાહી
• સૌરાષ્ટ્ર, મધ્ય ગુજરાતમાં સામાન્યથી મધ્યમ વરસાદની આગાહી

નિસર્ગ વાવાઝોડું હાલ મહારાષ્ટ્રથી મધ્ય પ્રદેશ તરફ ફંટાયું છે. મધ્ય પ્રદેશમાં મધ્યથી ભારે વરસાદની આગાહી કરવામાં આવી છે ત્યારે વાવાઝોડાંની અસરના પગલે હજુ પણ ગુજરાતમાં કેટલાંક સ્થળો પર વરસાદની હવામાન વિભાગે આગાહી કરી છે. 

વાવાઝોડાની અસરને પગલે રાજ્યમાં હવામાન વિભાગે વરસાદની આગાહી કરી છે. રાજ્યના કેટલાક ભાગોમાં 24 કલાક સુધી વરસાદની શક્યતા છે. દક્ષિણ ગુજરાતમાં 24 કલાક સુધી ભારે વરસાદની શક્યતા છે.

હવામાન વિભાગ મુજબ સૌરાષ્ટ્ર, મધ્ય ગુજરાતમાં સામાન્યથી મધ્યમ વરસાદની આગાહી કરવામાં આવી છે. આગામી 24 કલાકમાં સુરત, નવસારી, ભરૂચ, ભાવનગર, આણંદ, અમરેલી, ગીર સોમનાથ, વલસાડ, અમદાવાદ, રાજકોટ વડોદરામાં વરસાદની શક્યતા છે.

અમદાવાદમાં રાત્રે વીજળીના કડાકા સાથે વરસાદ

અમદાવાદ શહેરમાં મોડી રાત્રે વીજળીના કડાકા-ભડાકા સાથે વરસાદી માહોલ જોવા મળ્યો હતો. શહેરના પૂર્વ અને પશ્ચિમના કેટલાંક વિસ્તારોમાં વરસાદ વરસ્યો હતો.  પશ્ચિમ અમદાવાદની વાત કરીએ તો સેટેલાઇટ, સોલા, બોપલ, બોડકદેવ, થલતેજ, મેમનગર, ગોતા, ચાંદખેડા, ચાંદલોડિય સહિત એસજી હાઇવે, સરખેજ, જીવરાજપાર્કમાં વરસાદ પડ્યો હતો. જ્યારે પૂર્વ અમદાવાદમાં નિકોલ, બાપુનગર, નરોડા, શાહપુર, દાણીલીમડા, મણિનગર, ઇસનપુર, કાંકરિયા વિસ્તારમાં કડાકા  ભડાકા સાથે વરસાદ વરસ્યો હતો.