સમુદ્રમાં સર્જાયેલા મહા વાવાઝોડાની દિશા બદલાઈ છે. જો તે ઓમાન તરફ નહીં ફંટાય અને ગુજરાતમાં ત્રાટકશે તો ગુજરાતને ઘણુ નુકસાન પહોંચી શકે છે. મધદરિયાએ દિશા પલટાતા ફરીથી વાવાઝોડું ગુજરાતમાં આવશે. ગુજરાતના દરિયા કિનારે મહા વાવાઝોડું નબળુ પડે તેવી શક્યતા છે. હાલમાં વાવાઝોડું ઓમાન-એડન તરફ આગળ વધીરહ્યું છે. બે દિવસ બાદ વાવાઝોડું ગુજરાત તરફ આગળ વધશે. હાલમાં મહા વાવાઝોડુ દરિયામાં વેરાવળથી 531 કિલોમીટર દુર છે.
40 કિ.મી.ની ઝડપે પવન ફૂંકાશે
3થી 4 ઈંચ સુધીનો વરસાદ પડશે
વાવાઝોડુ દરિયામાં વેરાવળથી 531 કિલોમીટર દુર
વાવાઝોડુ ઓમાન તરફ નહીં ફંટાય તો!
15 કિ.મી.ની ઝડપે આ વાવાઝોડું ઓમાન તરફ આગળ વધી રહ્યું છે. તેનો ઘેરાવો અંદાજે 550 કિ.મી.નો છે. 48 કલાક સુધી આગળ વધ્યા બાદ સ્થિર થવાની વકી છે પણ તે હાલ દિશાઓ બદલી રહ્યુ છે. અને તેનાથી સૌથી વધુ ખતરો ગુજરાતને છે.
ઓમાન નજીક દરિયામાં સમાઈ જવાની શક્યતા
ઓમાન નજીક જ દરિયામાં સમાઇ જવાની 80 ટકા શક્યતા છે. જો દરિયામાં આ વાવાઝોડું નહીં સમાઇ તો સુરત અને ઘોઘાની વચ્ચેની ખાડીમાંથી સૌરાષ્ટ્ર-દક્ષિણ ગુજરાતમાં ત્રાટકશે આ સમયે 40 કિ.મી.ની ઝડપે પવન ફૂંકાશે અને સંભવત: 3થી 4 ઈંચ સુધીનો વરસાદ પડી શકે તેમ છે.
સાવચેતીના પગલા શરૂ
સમગ્ર રાજ્યમાં ચોમાસી વરસાદથી પણ વધુ આકાશ ગોરંભાયુ છે અને અમદાવાદ સહિત તમામ જિલ્લાઓમાં વરસાદ ચાલુ છે. દરિયો પણ ગાંડોતૂર બન્યો છે. અને માછીમારો સહિત પોર્ટ વોર્નિંગ ઈશ્યુ કરી દેવામાં આવી છે તો વળી મહાનો સામનો કરવા માટે અત્યારથી જ સુરક્ષા ટીમોને તૈનાત કરી દેવામાં આવી છે.
વરસાદી માહૌલ જામ્યો
અમદાવાદમાં ગઈકાલથી જ વાદળછાયુ વાતાવરણ છે અને આખી રાત વરસાદ વરસ્યો છે. તો વળી વડોદરા, વલસાડ, અમરેલી, જૂનાગઢ, વડનગર મહેસાણા, સુરત, ગીર સોમનાથ, દ્વારકા, પોરબંદર, બનાસકાંઠા સહિતના વિસ્તારોમાં વરસાદી માહૌલ જામ્યો છે.
ત્રણ દિવસ ગુજરાતમાં ધોધમાર વરસાદ થશે
હવામાન વિભાગે કહ્યું છે કે આગામી 24 કલાકમાં આંધી અને વીજળી પડવાની શક્યતા છે. પૂર્વ અરબી સમુદ્રમાં 150 કિમીની ઝડપે પવન ફૂંકાશે. આથી ગુજરાત, મુંબઈ અને કોંકણના દરિયાકાંઠે માછીમારોને દરિયો નહીં ખેડવાની સૂચના અપાઈ છે. આ વિસ્તારોમાં આગામી બે-ત્રણ દિવસ ભારે વરસાદ થવાની શક્યતા છે.
શું કહે છે હવામાન વિભાગ
હવામાન વિભાગના ડાયરેક્ટર જયંત સરકારે જણાવ્યું હતું કે, 5 નવેમ્બરથી 7 નવેમ્બર સુધી 40થી 50 કિમી પ્રતિકલાકની ઝડપે પવન ફૂંકાશે. 6 નવેમ્બરથી સૌરાષ્ટ્ર અને દક્ષિણ ગુજરાતના કોસ્ટલ એરિયામાં વરસાદ પડશે
દરિયાકાંઠે એલર્ટ જાહેર કરાયા
સૌરાષ્ટ્રમાં બોટાદ, ભાવનગર, અમરેલી, દીવ, ગીર સોમનાથ, જૂનાગઢ, પોરબંદર, દ્વારકા અને રાજકોટમાં ભારેથી અતિભારે વરસાદ પડશે. ઉપરાંત દક્ષિણ ગુજરાતના નવસારી, સુરત, ડાંગ અને તાપીમાં ધોધમાર વરસાદ પડશે. હાલ પોર્ટ વોર્નિંગ છે. તેમજ 8 નવેમ્બર સુધી માછીમારોને દરિયો ન ખેડવા માટે સૂચના આપવામાં આવી છે.