ગુજરાતમાં એક તરફ કોરોના વાયરસનો કહેર જોવા મળી રહ્યો છે ત્યારે રાજ્ય પર આગામી 4 અને 5 જૂનના રોજ વાવાઝોડાનો ખતરો તોળાઇ રહેલો જોવા મળી રહ્યો છે. સૌરાષ્ટ્ર, મધ્ય-ગુજરાત અને દક્ષિણ ગુજરાતમાં વરસાદને લઇને આગાહી કરવામાં આવી છે. ત્યારે રાજ્યના તાપી અને સુરત જિલ્લામાં તેની અસર જોવા મળી રહી છે. તાપી અને સુરત જિલ્લાના વાતાવરણમાં પલટો જોવા મળ્યો છે.
રાજ્યમાં આગામી 4-5 જૂનના રોજ વાવાઝોડાને લઇને ભારે વરસાદની આગાહી વચ્ચે તાપીના વ્યારામાં વહેલી સવારે વરસાદ વરસ્યો છે. વ્યારા સહિત આસપાસના વિસ્તારોમાં વરસાદી વાતાવરણ જોવા મળ્યું છે. વહેલી સવારથી ગાજવીજ સાથે વરસાદ વરસી રહ્યો છે. વિધિવત ચોમાસાની શરૂઆત થઈ હોય તેવો માહોલ સર્જાયો છે. જો ભારે ઉકળાટ વચ્ચે વરસાદ થતાં લોકોને ગરમીથી રાહત મળી છે.
સુરત શહેરમાં સવારથી જ જોવા મળ્યું વાદળછાયું વાતાવરણ
હવામાન વિભાગ દ્વારા રાજ્યમાં આગામી 4 અને 5 જૂનના રોજ હકા નામનું વાવાઝોડું ટકરાવાની સંભાવના વ્યક્ત કરવામાં આવી છે. ત્યારે આજે વહેલી સવારથી જ સુરત શહેરના વાતાવરણમાં પલટો જોવા મળ્યો છે. સુરત શહેરના સીમાડા વિસ્તાર પર્વત પાટિયામાં કમોસમી વરસાદી ઝાપટું પડ્યું છે. જો કે ભારે ઉકળાટ વચ્ચે પડેલા માવઠાના પગલે વાતાવરણમાં ઠંડક જોવા મળી રહી છે.