આગાહી / ગુજરાતમાં 'હિકા' વાવાઝોડાના ભણકારા વચ્ચે હવામાન વિભાગે આપ્યા રાહતના સમાચાર

• ગુજરાત પર 'હિકા' આફતથી રાહત
• રાજ્યના હવામાન વિભાગે કરી આગાહી
• માછીમારો અને દરિયાકાંઠાના વિસ્તારોને સાવચેત રહેવાની સૂચના 

દરિયો તોફાની બની શકે

ઉત્તર અરબી સમુદ્રમાં લો પ્રેશરથી દરિયો તોફાની બનવાની શક્યતાઓ છે. આગામી 24 કલાક સુધી માછીમારોને દરીયો ન ખેડવા સૂચના આપવામાં આવી છે. 

અમરેલીના જાફરાબાદ બંદરે 700 બોટ બોલાવાઇ પરત

અમરેલીમાં માછીમારોને ટોકન આપવાનુ બંધ કરી દેવામાં આવ્યું છે. દરિયો ખેડવા ગયેલી બોટોને પરત બોલાવી લેવામાં આવી છે. જાફરાબાદ બંદરની 700 બોટો કિનારે પરત ફરી છે. તંત્ર દ્વારા સૂચના ન મળે ત્યાં સુધી ટોકન ઈસ્યુ નહીં કરવામાં આવે. 

અંબાલાલ પટેલે પણ કરી છે આગાહી

હવામાન નિષ્ણાત અંબાલાલ પટેલ દ્વારા વરસાદને લઇને આગાહી કરવામાં આવી છે. અંબાલાલ પટેલે ગુજરાતના વરસાદ અંગે જણાવ્યું હતું કે, રાજ્યમાં ચોમાસું લંબાવાની શક્યતા છે. આ સાથે જ 5 ઓક્ટોબર સુધી રાજ્યમાં ઠેર-ઠેર છૂટોછવાયો વરસાદ પણ પડી શકે છે. 

ઓક્ટોબરમાં પણ વરસાદી માહોલ

અંબાલાલ પટેલે VTV સાથે વાતચીત કરતા જણાવ્યું કે, વરસાદી સિસ્ટમ બનશે તો 5 ઓક્ટોબર સુધી વરસાદ રહેશે. તો આ સાથે જ ઓક્ટોબર સુધી રાજ્યમાં વરસાદી માહોલ યથાવત રહેવાની શક્યતા છે. 

મધ્ય ગુજરાતના વરસાદ અંગે વાત કરતા હવામાન નિષ્ણાત અંબાલાલ પટેલે કહ્યું કે,  અમદાવાદ, ગાંધીનગર, આણંદમાં પણ છૂટાછવાયો વરસાદ થવાના એંધાણ છે. તો આ સાથે જ રાજ્યના હવામાન ખાતાએ પણ ઠેર-ઠેર વરસાદ થવાની આગાહી કરેલ છે. 

જૂનાગઢમાં વરસાદ 

ગુજરાતમાં વરસાદની આગાહીના પગલે સૌરાષ્ટ્ર સહિત ગુજરાતના વિવિધ ભાગોમાં સારો વરસાદ થયો છે. જૂનાગઢમાં ફરીથી ધીમીધારે વરસાદ થઇ રહ્યો છે. ત્રણ દિવસના વિરામ બાદ ફરી વરસાદની શરૂઆત થઇ છે. કાળવા ચોક સહિતના વિસ્તારોમાં વરસાદ થયો છે.