કોંગ્રેસ / CWCની બેઠકમાં ફરી અધ્યક્ષ માટે રાહુલનું નામ ઉછળ્યું, મોદી સરકારથી નારાજ પ્રિયંકાએ કહ્યું 'રાહુલ સિવાય કોઈ...'

• કોરોનામાં સરકારનો ગેરવહીવટ 'સૌથી મોટી વિનાશકારી વિફળતા' : સોનિયા ગાંધી 
• અશોક ગેહલોતે ઓનલાઈન અધિવેશન બોલાવી રાહુલની તાજપોશી કરવા સૂચન કર્યું : સૂત્ર 
• અનેક નેતાઓથી નારાજ પ્રિયંકાએ કહ્યું 'રાહુલ સિવાય કોઈ પીએમ વિરુદ્ધ બોલતું જ નથી' 

દેશ વિવિધ સંકટનો સામનો કરી રહ્યું છે ત્યારે દિલ્લીમાં કોંગ્રેસ વર્કિંગ કમિટીની વીડિયો કોન્ફરન્સથી બેઠક મળી હતી. આ બેઠકમા ગલવાન ઘાટીમાં શહીદ થયેલા જવાનોને શ્રદ્ધાંજલિ અર્પણ કરવામાં આવી અને બેઠકની શરૂઆતમાં સંબોધનમાં સોનિયા ગાંધીએ કેન્દ્ર સરકાર પર પ્રહાર કર્યા હતા. 

રાહુલ ગાંધીને ફરી બનાવો પાર્ટી અધ્યક્ષ

નોંધનીય છે કે આ જ બેઠકમાં રાહુલ ગાંધીને કોંગ્રેસ પાર્ટીના અધ્યક્ષ બનાવવા માટે ફરી માગ ઉઠી છે. મળતી માહિતી પ્રમાણે સૂત્રો મુજબ રાજસ્થાનના મુખ્યમંત્રી અશોક ગેહલોતે કોંગ્રેસની વર્કિંગ કમિટીની બેઠકમા આ મુદ્દો ઉછાળ્યો હતો. ઓનલાઇન અધિવેશન બોલાવી રાહુલને પાર્ટી અધ્યક્ષ તરીકે જાહેરાત કરવાનું સૂચન આપ્યું છે. એક યુવા નેતાએ પણ ગેહલોતને સમર્થન આપ્યું હતું. 

પ્રિયંકા ગાંધીએ અસંતોષ વ્યક્ત કર્યો 

જોકે આ બેઠકમાં કેટલાક નેતાઓ નારાજ પણ થયા હોવાનું સૂત્રો અનુસાર સામે આવી રહ્યું છે. PM મોદીની ટિકા ન કરવાની વાત પર અનેક નેતા નારાજ થયા હોવાનું મનાય છે અને આ જ મુદ્દે પ્રિયંકા ગાંધીએ બેઠકમાં અસંતોષ દર્શાવ્યો અને નેતાઓને ટકોર કરતા કહ્યું કે  રાહુલ સિવાય કોઇ PM વિરુદ્ધ નથી બોલતા

રાહુલ ગાંધીએ વડાપ્રધાન નરેન્દ્ર મોદી પર કર્યા હુમલા 

જ્યારથી ચીન સાથે ભારતનો વિવાદ શરુ થયો છે ત્યારથી કોંગ્રેસ નેતા રાહુલ ગાંધી મોદી સરકાર પર દરરોજ હુમલાઓ કરી રહ્યા છે. રાહુલ ગાંધીએ દેશની સીમાસુરક્ષા ન કરવા માટે સરકાર પર આરોપ લગાવ્યો છે અને સોશ્યલ મીડિયામાં રાહુલ ગાંધી વડાપ્રધાન નરેન્દ્ર મોદી પર જ સીધા હુમલાઓ કરી રહ્યા છે. રાહુલ ગાંધીએ કહ્યું કે ચીને ભારતની જમીન પર કબજો કરી લીધો છે પણ વડાપ્રધાન નરેન્દ્ર મોદીએ ચીનની જે સ્થિતિ છે તેને સ્વીકારી લીધી છે અને આપણી સ્થિતિને સરહદ પર નષ્ટ જ કરી દીધી. PM મોદીએ સેના સાથે છેતરીપિંડી કરી છે 

સોનિયા ગાંધીએ સરકાર પર ઉભા કર્યા સવાલ 

સોનિયા ગાંધીએ કહ્યું કે LAC પર આપણી સામે મોટા સંકટની સ્થિતિ છે. એપ્રિલ-મેથી ચીને આપણી સીમામાં ઘુસણખોરી કરી છે. પેગોંગ ત્સો લેક અને ગલવાન ઘાટીમાં ઘુસણખોરી કરી છે. જોકે PM મોદીના નિવેદનથી દેશને આંચકો લાગ્યો છે.  વડાપ્રધાને લદ્દાખમાં ભારતીય ક્ષેત્રમાં કોઈ ન ઘુસ્યું હોવાનું નિવેદન આપ્યું હતું. સોનિયા ગાંધીએ કહ્યું કે દેશ એક તરફ આર્થિક સંકટ અને ભયાનક મહામારી અને હવે ચીન સાથે સીમા વિવાદના મોટા સંકટનો સામનો કરી રહ્યો છે. ભાજપની આગેવાની વાળી NDA સરકારની નીતિઓના કારણે આ સંકટ ઉભા થયા છે.