કોરોના વાયરસને કારણે લોકોને સાવચેતી રાખવા, 2 ગજનું અંતર રાખવા અને માસ્ક પહેરવા કહેવામાં આવી રહ્યું છે.
અત્યારે આ મુશ્કેલ સમયમાં સાવધાની જ એકમાત્ર ઈલાજ છે. પરંતુ, એક નવજાત બાળકીએ જન્મ લેવાની થોડી જ સેકંડમાં જે કર્યું તેની આખી દુનિયા જાણે રાહ જોઈ રહી છે તેવું લાગી રહ્યું છે. સોશિયલ મીડિયામાં લોકો આ તસ્વીરને નવી આશાઓ સાથે જોઈ રહ્યા છે.
આ તસ્વીરમાં એક બાળકી તેનો જન્મ થયા બાદ થોડા જ સમયમાં ડોક્ટરના સર્જિકલ માસ્કને ચહેરા પરથી ખેંચતી જોવા મળે છે. આ તસવીર UAEના ગાયનેકોલોજિસ્ટ ડો સમીર ચેયબે ઇન્સ્ટાગ્રામ પર શેર કરી છે. તે દેખાય છે કે નવજાત બાળકી તેના હાથથી ડોક્ટરનું માસ્ક ખેંચીને ઉતારવાનો પ્રયત્ન કરી રહી છે અને ડોકટરનો ચહેરો ખુશખુશાલ જણાઈ રહ્યો છે.
ઇન્સ્ટાગ્રામ-ફેસબુક પર તસવીર શેર કરતી વખતે ડો ચેયબે લખ્યું કે, "આપણે બધા એક સંકેત ઇચ્છીએ છીએ કે આપણે ટૂંક સમયમાં માસ્ક કાઢી શકીશું." આ તસવીર સોશિયલ મીડિયા પર મૂક્યા પછી તે એટલી વાયરલ થઈ ગઈ કે હજારોની સંખ્યા લાઈક આવી છે.
ઘણા લોકોએ આ તસ્વીરને સારા ભવિષ્યની નિશાની ગણાવી છે જ્યારે અન્ય લોકોએ કહ્યું કે આ તસ્વીરને 2020ની શ્રેષ્ઠ તસ્વીર જાહેર કરવી જોઈએ. એક યુઝરે લખ્યું છે: આપણે ટૂંક સમયમાં માસ્કથી મુક્ત થઇ જઈશું.