સુરત / કસ્ટોડિયલ ડેથ મામલે PI, PSI સહિત 8 પોલીસકર્મીઓ સામે લૂકઆઉટ નોટિસ

સુરતના ખટોદરા પોલીસ મથકમાં ચોરીના આરોપીને ઢોર માર મરાયા બાદ મોત નિપજ્યું હતું. ત્યારે ઘટનાના 8 દિવસ બાદ પણ હજુ સુધી આરોપી પોલીસકર્મીઓ હાથ લાગ્યા નથી. હાલ પોલીસે અલગ-અલગ ટીમ બનાવી આરોપીઓની શોધખોળ હાથ ધરી છે.

આ મામલે આરોપીઓ વિદેશ ભાગી ન જાય તે માટે લૂકઆઉટ નોટિસ જાહેર કરવામાં આવી છે. આ પહેલા રાજ્યભરના એરપોર્ટ પર નજર રાખવાનો આદેશ કરાયો હતો, જે બાદમાં હવે દેશના તમામ એરપોર્ટ પર નજર રાખવાના આદેશ કરાયા છે. બીજી તરફ પોલીસે તમામ પોલીસ કર્મીઓના વતનમાં પણ તપાસ કરી છે.

રાજ્યમાં પોલીસની કામગીરીને લઇને VTVના ગંભીર સવાલ 

• પોલીસ જ કેમ કરી રહી આરોપીઓ જેવા કામ?
• સુરતમાં PI સહિત 8 પોલીસકર્મીઓ સામે હત્યાનો ગુનો, 8 દિવસ વિત્યા છતાં પોલીસકર્મીઓ હજુ કેમ નથી પકડાતા?
• વડોદરામાં ફાયરિંગ કરનાર PSI પોલીસ જાપ્તામાંથી ફરાર 
• હોસ્પિટલમાંથી PSIને ફરાર કરનાર અધિકારીઓ કોણ?
• શું પોલીસ વિભાગ જ આરોપી પોલીસકર્મીઓને બચાવી રહ્યો છે?
• પોલીસકર્મીઓને કાયદાનો ડર નથી?
• શા માટે કાયદાથી ભાગી રહ્યાં છે કાયદાના રક્ષકો?
• કાયદાના રક્ષકો જ કેમ કાયદાનું પાલન નથી કરી રહ્યાં ?
• સામાન્ય જનતા સામે કડક કાર્યવાહી તો પોલીસકર્મીઓ સામે કેમ નહી?
• પોલીસ વિભાગની કામગીરીમાં બેવડી નીતિઓ છતી થઇ!
• પોલીસકર્મીઓ આરોપી બનતા પોલીસ કાર્યવાહી સામે જ સવાલો ઉઠ્યા?
• પોલીસકર્મીઓ પોતાની મનમાની કેમ કરી રહ્યાં છે?
• શું કોઇ સેટિંગ કરવા માટે પોલીસકર્મીઓની ધરપકડ નથી કરાતી?