કમિન્સ કાંગારું ટીમનો 47મો ટેસ્ટ કેપ્ટન બન્યો છે, જ્યારે વાઈસ કેપ્ટન તરીકેની જવાબદારી બોલ ટેમ્પરિંગમાં ફસાયેલા સ્ટીવ સ્મિથને સોંપવામાં આવી છે.
કમિન્સને ઓસ્ટ્રેલિયન ક્રિકેટ ટીમનો નવો ટેસ્ટ કેપ્ટન બનાવવામાં આવ્યો
65 વર્ષ બાદ કમિન્સ પ્રથમ ફાસ્ટ બોલર છે જેને કેપ્ટન બનાવવામાં આવ્યો
રિચી બેનો બાદ પ્રથમ બોલર છે, જે ઓસી. ટીમનું નેતૃત્વ કરશે
અનુભવી ફાસ્ટ બોલર પેટ કમિન્સને ઓસ્ટ્રેલિયન ક્રિકેટ ટીમનો નવો ટેસ્ટ કેપ્ટન બનાવવામાં આવ્યો છે. કમિન્સ કાંગારું ટીમનો 47મો ટેસ્ટ કેપ્ટન બન્યો છે, જ્યારે વાઈસ કેપ્ટન તરીકેની જવાબદારી બોલ ટેમ્પરિંગમાં ફસાયેલા સ્ટીવ સ્મિથને સોંપવામાં આવી છે. કમિન્સ આગામી એશીઝમાં ઓસ્ટ્રેલિયાની કેપ્ટનશિપ કરતો નજરે પડશે. ઓસ્ટ્રેલિયા-ઈંગ્લેન્ડ વચ્ચે પાંચ ટેસ્ટની શ્રેણીની પ્રથમ મેચ તા. 8 ડિસેમ્બરથી બ્રિસબેનમાં રમાશે. 65 વર્ષ બાદ કમિન્સ પ્રથમ ફાસ્ટ બોલર છે, જેને કેપ્ટન બનાવવામાં આવ્યો છે. આ ઉપરાંત રિચી બેનો બાદ પ્રથમ બોલર છે, જે ઓસી. ટીમનું નેતૃત્વ કરશે.
કેપ્ટન બનાવવામાં આવ્યા બાદ પેટ કમિન્સે કહ્યું, ''હું આ જવાબદારી મેળવીને ખુદને સન્માનિત અનુભવી રહ્યો છું. આશા છે કે હું એ લીડરશિપ ટીમને આપી શકીશ, જે આટલાં વર્ષોથી ટિમ પેન દઈ રહ્યો હતો.''
ઓસ્ટ્રેલિયા સામાન્ય રીતે બેટ્સમેનોને જ કેપ્ટનશિપ સોંપતું આવ્યું છે. ૧૯૫૬માં છેલ્લે કોઈ ફાસ્ટ બોલરે ઓસી. ટીમની કેપ્ટનશિપ સંભાળી હતી. એ સમયે ફાસ્ટ બોલર લિન્ડવાલ એક ટેસ્ટ મેચમાં ટીમનો કેપ્ટન બન્યો હતો, જ્યારે સ્ટાર લેગ સ્પિનર રિચી બેનો ઓસ્ટ્રેલિયન ટીમનું નેતૃત્વ કરનારો અંતિમ બોલર હતો અને તેણે ૨૮ ટેસ્ટ મેચમાં ૧૨ જીત, ૧૧ ડ્રો, એક ટાઇ અને ચારમાં હારનો સામનો કર્યો હતો.
ઉલ્લેખનીય છે કે થોડા દિવસ પહેલાં જ ઓસ્ટ્રેલિયાની ટેસ્ટ ટીમની કેપ્ટનશિપ ટિમ પેને છોડી દીધી હતી. ટિમ પર સાથી મહિલા કર્મચારીને અશ્લીલ તસવીરો અને મેસેજ મોકલવાનો આરોપ છે. આ ઉપરાંત ક્રિકેટનાં બધાં ફોર્મેટમાંથી ટિમ પેનને અનિશ્ચિત સમય સુધી બ્રેક લેવાનો પણ આજે નિર્ણય કર્યો છે. હવે વિકેટકીપર તરીકે ટિમ પેનના સ્થાને મેથ્યૂ વેડ, એલેક્સ કેરી અથવા જોશ ઈંગ્લિશમાંથી કોઈ એકને ટીમમાં સામેલ કરવામાં આવશે. મેથ્યૂ વેડે તાજેતરમાં પૂરા થયેલા ટી-૨૦ વર્લ્ડકપમાં શાનદાર પ્રદર્શન કર્યું હતું.