આઇપીએલમાં ગઈ કાલે ડબલ હેડર બાદ પોઇન્ટ ટેબલની સ્થિતિ સંપૂર્ણપણે બદલાઈ ગઈ છે. સનરાઇઝર્સ હૈદરાબાદ સામે મળેલી જીતથી મુંબઈ ઇન્ડિયન્સને ફાયદો થયો છે, જ્યારે ધોનીની ટીમે કિંગ્સ ઈલેવન પંજાબને માત આપી પોઇન્ટ ટેબલમાં પોતાની સ્થિતિ સુધારી છે.
વાત આઇપીએલ 2020ની
ધોનીની ટીમ છે ચર્ચામાં
કિંગ્સ ઈલેવન પંજાબ અને સીએસકેની મેચમાં સ્ટાર ખેલાડીઓએ રન બનાવતા ઓરેન્જ કેપની રેસ વધુ રોમાંચક બની છે. કેપ્ટન કે. એલ. રાહુલે મયંક અગ્રવાલ પાસેથી ઓરેન્જ કેપ છીનવી લીધી છે, જ્યારે પર્પલ કેપની રેસમાં મોહંમદ શામીને નુકસાન થયું છે.
મુંબઈ ઇન્ડિયન્સે પોતાની પાંચમાંથી ત્રણ મેચ જીતી લઈને પોઇન્ટ ટેબલમાં ટોચનું સ્થાન હાંસલ કરી લીધું છે. ટૂર્નામેન્ટમાં મુંબઈ ઇન્ડિયન્સનો નેટ રનરેટ બહુ જ શાનદાર રહ્યો છો. રોહિત શર્માના નેતૃત્વવાળી આ ટીમે +૧.૨૧ના નેટ રનરેટ સાથે પહેલા સ્થાન પર કબજો જમાવ્યો છે.
બીજા સ્થાને રહેલી દિલ્હીની ટીમ ચારમાંથી બે ત્રણ મેચ જીતી ચૂકી છે. ઐયરના નેતૃત્વવાળી આ ટીમનો નેટ રનરેટ +૦.૫૯ છે. આરસીબીની ટીમ -૦.૯૫ના નેટ રનરેટ સાથે પોઇન્ટ મેળવીને ત્રીજા સ્થાન છે. કોલકાતાની ટીમ ચાર પોઇન્ટ અને -૦.૧૨ના નેટ રનરેટ સાથે ચોથા સ્થાન પર છે. રાજસ્થાન રોયલ્સ -૦.૩૨ના નેટ રનરેટ અને ચાર પોઇન્ટ સાથે પાંચમા સ્થાન પર છે.
સૌથી ઉંમરલાયક ખેલાડીઓ હોવાને કારણે ' Dady's Army' કહેવાતી સીએસકેએ ગઈ કાલે શાનદાર રમતનું પ્રદર્શન કરતા કિંગ્સ ઈલેવન પંજાબને ૧૦ વિકેટે કારમો પરાજય આપ્યો. આ જીતથી ધોનીની ટીમનો નેટ રનરેટ તો સુધર્યો જ, સાથે સાથે ટીમ આઠમા સ્થાનેથી કૂદકો મારીને છઠ્ઠા સ્થાન પર પહોંચી ગઈ. સીએસકેનો નેટ રનરેટ -૦.૩૪ છે અને ટીમ પાસે ચાર પોઇન્ટ છે.
ઓરેન્જ કેપઃ કિંગ્સ ઈલેવન પંજાબની ટીમ ભલે છેલ્લા સ્થાને હોય, પરંતુ કેપ્ટન રાહુલે શાનદાર ફોર્મ દેખાડતા પાંચ મેચમાં ૩૦૨ રન બનાવ્યા છે. રાહુલે પોતાની જ ટીમના મયંક અગ્રવાલ પાસેથી ઓરેન્જ કેપ છીનવી લીધી છે. જ્યારે સીએસકેનો ફાફ ડુ પ્લેસિસ ૨૮૨ રન સાથે બીજા સ્થાને આવી ગયો છે. ૨૭૨ રન સાથે મયંક અગ્રવાલ ત્રીજા નંબર પર છે.
પર્પલ કેપઃ ગઈ કાલની મેચ બાદ પર્પલ કેપ પર યુઝવન્દ્ર ચહલે કબજો જમાવી દીધો છે. ચહલે અત્યાર સુધીમાં આઠ વિકેટ ઝડપી છે, જ્યારે મોહંમદ શામી ખરાબ ઇકોનોમી રેટને કારણે પર્પલ કેપની રેસમાં ચોથા સ્થાને સરકી ગયો છે. રબાડા બીજા અને બોલ્ટ ત્રીજા સ્થાન પર છે. આ બધા બોલરે આઠ-આઠ વિકેટ ઝડપી છે. જ્યારે મુંબઈ ઇન્ડિયન્સના જેમ્સ પેટિન્સન અને જસપ્રીત બૂમરાહ સાત-સાત વિકેટ ઝડપીને અનુક્રમે પાંચમા અને છઠ્ઠા સ્થાન પર છે.