રશિયા અને યુક્રેનના યુદ્ધનો આજે 11મો દિવસ છે. જેની વચ્ચે ક્રૂડ ઓઇલના ભાવ રેકોર્ડ સ્તર પર પહોંચી જવા પામ્યા છે. જેને લઈને પેટ્રોલ અને ડિઝલના ભાવમાં વધારો થઈ શકે છે
રશિયા-યુક્રેન યુદ્ધની અસર ક્રૂડ ઓઈલ પર
ક્રૂડ ઓઈલના ભાવ રેકોર્ડ સ્તર પર પહોંચ્યાં
અગામી દિવસોમાં પેટ્રોલ-ડીઝલના ભાવમાં થઈ શકે વધારો : નિષ્ણાંત
પેટ્રોલ-ડીઝલના ભાવ પર નિષ્ણાત જશવંત વાઘેલાની પોતાની પ્રતિક્રિયા આપતાં જણાવ્યું હતું કે, દેશભરમાં ચાલી રહેલી ચૂંટણીઓ વચ્ચે પેટ્રોલ-ડીઝલના ભાવ ઘણા સમયથી સ્થિર છે, જેમાં કોઈ ફેરફાર જોવા મળ્યો નથી.પરંતુ એવું માનવામાં આવે છે કે ચૂંટણી પૂર્ણ થયા બાદ ઈંધણના ભાવમાં ઉછાળો જોવા મળી શકે છે. મહત્વનું છે કે,રશિયા અને યુક્રેન વચ્ચે છેલ્લા 11 દિવસોથી ઘમાસાણ યુદ્ધ ચાલી રહ્યું છે. જેને લઈને આંતરરાષ્ટ્રીય બજારમાં ક્રૂડ ઓઈલની કિંમતો ભડકે બળી રહી છે.
રશિયા અને યુક્રેનની યુદ્ધની સ્થિતિ વચ્ચે ક્રૂડ ઓઇલના ભાવ રેકોર્ડ સ્તર પર
નિષ્ણાંત જશવંત વાઘેલાએ વધુમાં જણાવ્યું હતું કે, હાલ સમગ્ર વિશ્વમાં રશિયા અને યુક્રેનની યુદ્ધની સ્થિતિના કારણે ક્રૂડ ઓઇલના ભાવ તેના રેકોર્ડ સ્તર પર છે. ઉલ્લેખનીય છે કે, ગત ડિસેમ્બરના પ્રથમ સપ્તાહમાં ક્રૂડ ઓઈલના ભાવ 70 ડોલરની નીચે હતાં. જ્યારે આ વર્ષે માર્ચના પ્રથમ સપ્તાહમાં 124 ડૉલર પ્રતિ બેરલની નજીક આવી ગયા છે. માત્ર 3 મહિનામાં જ કાચા તેલની કિંમતમાં લગભગ 50 ડૉલર પ્રતિ બેરલનો વધારો થયો છે.
યુદ્વના કારણે કંપનીઓ પ્રોફિટ વધારવા ભાવ વધારી શકે છે
તેમણે વધુમાં ઉમેર્યુ હતું કે, પેટ્રોલ-ડીઝલના ભાવ વધારો ન થાય તે માટે આગોતરું પ્લાનિંગ જરૂરી છે. તેમણે ઉમેર્યું કે, હાલ પેટ્રોલપંપ માલિકોએ પેટ્રોલ-ડીઝલની સંગ્રહખોરી અટકાવવી જોઇએ મહત્વનું છે કે, દીવાળી બાદથી ઓઇલ કંપનીઓએ ભાવમાં વધારો કર્યો નથી જેને લઈને કંપનીઓના પ્રોફિટ ઓછો થયો છે. જો કે, હાલ યુદ્વના કારણોસર કંપનીઓ પ્રોફિટ વધારવા પેટ્રોલ-ડીઝલનો ભાવ વધારી શકે છે