રાહત / ક્રુડ ઓઈલની કિંમતમાં પાંચ વર્ષનો સૌથી મોટો કડાકો, આટલા રૂપિયા સસ્તું થશે પેટ્રોલ

• કોરોનાનાં કહેર વચ્ચે ક્રુડ ઓઈલની માંગમાં ઘટાડો
• ક્રુડ ઓઈલની કિંમતમાં 10 ટકાનો કડાકો 
• ક્રુડનાં ભાવ વર્ષ 2016 બાદ સૌથી ન્યૂનતમ સ્તર પર

આંતરરાષ્ટ્રીય બજારોમાં શુક્રવારે ક્રૂડ ઓઈલની કિંમતમાં 10 ટકાનો  કડાકો થયો છે. યુએસ WTI અને બ્રેન્ટ ક્રુડનાં ભાવમાં ભારે ઘટાડો જોવા મળ્યો. ઓપેક અને તેના સહયોગી દેશોની બેઠક દરમિયાન ક્રુડ પ્રોડક્શનમાં કાપ મુકવાની વાત પર કોઈ જ સહમતી બની નથી. 

શુક્રવારે યુએસ વેસ્ટ ટેક્સાસ ઇન્ટરમીડીએટનાં ક્રુડનાં ભાવમાં 4.62 ડોલર એટલે 10.07 ટકાનો ઘટાડો થયો. જે બાદ ક્રુડનાં ભાવ વર્ષ 2016 બાદ સૌથી ન્યૂનતમ સ્તર પર પહોંચી ગયો. બ્રેન્ટ ક્રુડની વાત કરીએ તો તેની કિંમત 9.4 ટકા ગગડી 45.27 ડોલર પ્રતિ બેરલ પર પહોંચી ગઈ.વર્ષ 2008માં ઓપેક અને તેમના સહયોગી દેશોએ ભેગા થઇ ક્રુડ ઓઈલના ઉત્પાદન પર કાપ મૂક્યો હતો. 

ઓપેક અને તેના સહયોગી દેશો વચ્ચે ક્રુડના પ્રોડક્શન પર કાપ મુકવો કે નહીં તેના પર સહમતી ન બનતા હવે ફરીથી બેઠક કરવામાં આવશે. નોંધનીય છે કે ક્રુડના પ્રોડક્શન પર કાપ મુકવાનો નિર્ણય પહેલેથી જ લાગુ છે જે માર્ચનાં અંત સુધીમાં અમલમાં રહેશે. હવે આ નિર્ણય અગામી સમયમાં લાગુ કરવામાં આવે કે નહીં તેના પર સહમતી સધાઈ શકી નથી. રશિયાના ઉર્જા મંત્રીએ બેઠક બાદ કહ્યું કે 1 એપ્રિલ સુધી કોઈ પણ સભ્ય દેશ પોતાની મનમરજી મુજબ તેલનું ઉત્પાદન કરી શકશે નહીં. 

કોરોના વાયરસની દહેશત વચ્ચે ક્રુડ ઓઈલની ડીમાન્ડમાં ઘટાડો જોવા મળ્યો છે. આ જ કારણ છે કે વૈશ્વિક બજારમાં કાચા તેલની કિંમતમાં સતત ઘટાડો જોવા મળી રહ્યો છે.