કોરોના / ક્રૂડ 21 વર્ષના સૌથી નીચા ભાવે છતાં 27 દિવસથી પેટ્રોલ-ડીઝલના ભાવ ઠેરના ઠેર

ક્રૂડ ઓઇલના ભાવમાં ઘટાડાનો સિલસિલો ચાલુ રહ્યો છે. જ્યારે બ્રેન્ટ ક્રૂડ બેરલ દીઠ 27 ડોલરની આસપાસ કારોબાર કરી રહ્યો છે તે જ સમયે WTI ક્રૂડની કિંમત 18 ટકા ઘટીને MCX પર 1178ના સ્તરે આવી ગઈ છે. આંતરરાષ્ટ્રીય બજારમાં USA ક્રૂડ પ્રતિ બેરલ 15 ડોલરના ભાવે પહોંચ્યું છે. આ દ્રષ્ટિકોણથી રૂપિયાના સંદર્ભમાં 1 લિટર ક્રૂડની કિંમત 7 થી 8 રૂપિયાની વચ્ચે ગણાય છે. આ ભાવ અમેરિકન ક્રૂડનું 21 વર્ષનું સૌથી નીચું સ્તર છે. માંગમાં મોટો ઘટાડો થવાને કારણે અને તેલના સ્ટોરેજમાં થયેલી અનિશ્ચિતતાને કારણે તેલના ભાવમાં આ ઘટાડો નોંધવામાં આવ્યો છે. બ્રેન્ટની વાત કરીએ તો ઓપેક અને તેના સાથી દેશો દ્વારા તેલ ઉત્પાદનમાં ઐતિહાસિક કાપ મુકવાના કરાર છતાં ક્રૂડ ઓઇલના ભાવમાં રિકવરી શરૂ થઈ નથી.

કેમ ભાવ આટલા ઘટ્યા

કોરોના વાયરસ ફાટી નીકળ્યો તે સાથે જ સ્ટોરેજ કેપેસીટીના અભાવે USA ક્રૂડ ઓઇલ સોમવારે બેરલ દીઠ 15 ડોલરના સ્તરે બે દાયકાથી વધુની સૌથી નીચી સપાટીએ પહોંચ્યું. એશિયન માર્કેટમાં શરૂઆતના વેપાર દરમિયાન, USA સ્ટાન્ડર્ડ WTI 19 ટકાથી વધુ ઘટીને 14.73 ડોલર પ્રતિ બેરલ રહ્યું હતું. જો કે, બાદમાં તેમાં સુધારો થયો હતો અને ભાવ બેરલ દીઠ 15.78 ડોલર પર આવ્યો હતો. ઈન્ટરનેશનલ સ્ટાન્ડર્ડ બ્રેન્ટ ક્રૂડ 4.1 ટકા ઘટીને 26.93 ડોલર પ્રતિ બેરલ રહ્યો હતો, જો કે પાછળથી તેનો ભાવ સહેજ સુધરીને 28.11 ડોલર રહ્યો હતો.

આ વર્ષે બ્રેન્ટ ક્રૂડ પણ 57% સસ્તું

આ વર્ષે બ્રેન્ટ ક્રૂડ પણ સસ્તું થઈ ગયું છે. આજે બ્રેન્ટ ક્રૂડના ભાવમાં પણ નબળાઇ જોવા મળી રહી છે અને તે બેરલ દીઠ 27.5 ડોલરની આસપાસ કારોબાર કરી રહ્યું છે. આ વર્ષે બ્રેન્ટ ક્રૂડના ભાવમાં લગભગ 56.72 ટકા અને એક વર્ષમાં લગભગ 59.08 ટકાનો ઘટાડો થયો છે. હમણાંના સમયમાં લોકડાઉન અને મુસાફરી પ્રતિબંધોને કારણે વિશ્વભરમાં ક્રૂડ ઓઇલની માંગમાં ઘટાડો થયો છે. તે જ સમયે, ઓપેક અને રશિયા વચ્ચેના પ્રાઈસ વોરને કારણે ક્રૂડના ભાવોમાં ઘટાડો થયો છે.

ઓપેક દેશોની સ્થિતિ કફોડી

ક્રૂડ ઓઇલના વપરાશમાં ભારે ઘટાડાને કારણે તેલ ઉત્પાદક દેશો અને ખાસ કરીને ગલ્ફ દેશોના અર્થતંત્રને મોટું નુકસાન થયું છે. વપરાશમાં ઘટાડો થવાને કારણે ક્રૂડ ઓઇલના ભાવમાં અભૂતપૂર્વ ઘટાડો અટકવાનું નામ નથી લઈ રહ્યો જે અખાતી દેશો પર આર્થિક સંકટ વધારી મુકે છે. હાલત એવી છે કે ગલ્ફ દેશોએ બોન્ડ વેચી વેચીને પૈસા ભેગા કરવા પડે છે. નોંધપાત્ર વાત એ છે કે કોરોના વાયરસને કારણે વિશ્વના ઘણા દેશોમાં લોકડાઉનની સ્થિતિ છે, જેના કારણે ઔદ્યોગિક અને વ્યાપારી પ્રવૃત્તિઓ અટકી ગઈ છે. તેની સીધી અસર તેલના વપરાશ પર પડે છે.

27 દિવસથી પેટ્રોલ અને ડીઝલના ભાવ બદલાયા નથી

ક્રૂડમાં જોરદાર ઘટાડો જોવા મળી રહ્યો છે ત્યારે 27 દિવસથી દેશમાં પેટ્રોલ અને ડીઝલની કિંમતમાં કોઈ ફેરફાર થયો નથી. IOCLની વેબસાઇટ અનુસાર દિલ્હી, કોલકાતા, મુંબઇ અને ચેન્નાઇમાં આજે એક લિટર પેટ્રોલની કિંમત અનુક્રમે 69.59 રૂપિયા, 73.30 રૂપિયા, 76.31 રૂપિયા અને 72.28 રૂપિયા છે. જ્યારે એક લિટર ડીઝલની કિંમત દિલ્હી, કોલકાતા મુંબઇ અને ચેન્નાઇમાં અનુક્રમે 62.29 રૂપિયા, 65.62 રૂપિયા, 66.21 રૂપિયા અને 65.71 રૂપિયા છે.