વડોદરાથી 17 કિમી દૂર આવેલા પિપરિયા ગામમાં શેરી ગરબામાં અચાનક એક પરીચિત પણ અવાંછિત મહેમાને આવતા લોકોમાં ભયનો માહોલ જોવા મળ્યો હતો અને આ મહેમાન એટલે મગરમચ્છ. ગામના મુખ્ય ચોકમાં યોજાતી શેરીગરબીમાં સોમવારે મોડીરાત્રે જ્યારે લોકો ગરબી સમાપનની તૈયારી કરી રહ્યા હતા ત્યારે કેટલાક ગામવાસીઓનું ધ્યાન આ મહેમાન પર પડ્યું હતું. 7 ફૂટ લાંબો આ મગર અચાનક ગામના મુખ્ય ચોકમાં આવી જતા થોડીવાર માટે નાસભાગ મચી ગઇ હતી અને લોકોએ તાત્કાલિક વન વિભાગને ફોન કર્યા હતો.
જોકે લોકોની નાસભાગથી મગર પણ એટલા જ અંશે ડરી ગયો હતો જેના કારણે તેને પકડવા આવનાર વન વિભાગના અધિકારીઓએ મગર પર કાબૂ મેળવવામાં પસરેવો વળી ગયો હતો. ભયભીત થયેલા મગર ઘડી ઘડી આક્રમક થઇ જતો હતો જેના કારણે મગરના જડબાને પકડવા માટે ખાસ પ્રકારની લાકડીમાં તેનું મોઢું પકડી શકાતુ ન હતુ. તો પોતે ઘડી ઘડી ઉંધોચત્તો થતો હોવાથી તેના પર કંતાનનો કોથળો પણ નાખી શકતો નહતો. સામાન્ય રીતે મગરને પકડવા માટે પહેલા તો તેને શાંત કરવો પડે છે. આ માટે તેની આંખ પર કંતાનનો કોથળો નાખી દેવામાં આવે છે. આમ કરવાથી તેને કઇ દેખાતું નથી અને શાંત થઇ જાય છે.
ફોરેસ્ટ વિભાગના મગર પકડવા ગયેલી ટીમના સભ્ય જિગ્નેશ પરમારે કહ્યુ કે ''તેમને ફોન કોલ આવ્યા બાદ ટીમ જ્યારે ગામમાં પહોંચી ત્યારે તેમણે જોયુ કે ગરબા રમવાના સ્થળથી ચોકમાં 500 મીટર જ દૂર મગર ઉભો હતો અને લોકો ભયથી દૂર ઉપર ચડીને ઉભા હતા. જ્યારે ડીજે પણ જેમનું તેમ વાગતું હતુ. મહામહેનત બાદ મગર પકડવા અમને પરોઢના 3 વાગ્યા હતા. જેને અમે વડોદરા ખાતે નર્સરીમાં લઇ આવ્યા હતા.''