ગુજરાતમાં ક્રાઇમ રેટ વધતા જોવા મળી રહ્યો છે, આજે રાજ્યમાં એક દિવસમાં 3 હત્યાના બનાવ સામે આવ્યા છે જ્યારે એક આપઘાતનો કેસ સામે આવ્યો છે.
એક જ દિવસમાં 3 હત્યાના બનાવથી હડકંપ
કલોલમાં સુતેલી પત્નીની ગળું દબાવીને હત્યા
ભરુચમાં હત્યાના બે બનાવ સામે આવ્યા
દિવાળીના તહેવારને હવે ગણતરીના દિવસો જ બાકી છે, એવામાં ચોરી, લૂંટફાટ, અને તસ્કરીના કિસ્સાઓ સામે આવતા હોય છે, રાજ્યમાં ગુનાખોરીના કેસમાં વધારો થયો હોય એમ હવે હત્યાના ગુનાઓમાં પણ વધારો થયો છે.
આજે રાજ્યમાં હત્યાના ત્રણ બનાવ સામે આવ્યા છે જેને લઈને કાયદો અને વ્યવસ્થા સામે અનેક સવાલ ઉઠી રહ્યા છે, ગુનેગારોમાં પોલીસનો ખોફ રહ્યો ન હોય તેમ એક બાદ એક હત્યા, અપહરણ અને દુષ્કર્મના કેસમાં વધારો થયો છે, આજે ગાંધીનગરના કલોકમાં પતિએ પત્નીની નિર્મમ હત્યા નીપજાવી દેતા ચકચાર મચી ગઈ, વહેલી સવારે પતિએ ઘરમાં સૂતેલી પત્નીનું ગળું દબાવીને હત્યા કરી પતિ ફરાર થઈ ગયો હતો. બનાવની જાણ થતા પોલીસ ઘટના સ્થળે દોડી આવી હતી અને આરોપી પતિ વિરુદ્ધ ગુનો નોંધી આગળી કાર્યવાહી હાથ ધરી હતી.
ભરુચમાં હત્યાના બે બનાવ સામે આવ્યા
આ તરફ ભરુચમાં પણ હત્યાના બે બનાવો સામે આવ્યા જેમાં એક કિસ્સામાં વૃદ્ધની માથાના ભાગે પથ્થર મારીને નિર્મમ હત્યા કરી દેવાઈ, અંકલેશ્વરના કનોરિયા કેમિકલ કંપની પાસે મોબાઈલ ચોરીની આશંકાએ વૃદ્ધની કેટલાક શખ્સો દ્વારા હત્યા કરી દેવાઈ હતી. જોકે હત્યા બાદ આરોપીઓ ઘટના સ્થળેથી ફરાર થઈ ગયા હતા જેની GIDC પોલીસે ગુનો નોંધી આરોપીને શોધવાની તજવીજ હાથ ધરી હતી. જેમાં પોલીસે ત્રણ આરોપીઓની ધરપકડ કરી આગળની કાર્યવાહી હાથ ધરી છે.
ભરૂચના અસુરીયા નજીક લૂંટ બાદ હત્યા
જ્યારે બીજી તરફ ભરૂચના અસુરીયા નજીક લૂંટ બાદ હત્યાને અંજામ આપવામાં આવ્યો જેમાં દહેજથી સુરત જવા નીકળેલા ટ્રક ડ્રાઈવરની લૂટના ઈરાદે હત્યા કરી દેવામાં આવી, ડ્રાઈવર મુકેશ યાદવો મૃતદેહ નેશનલ હાઈવે નં 48 પર અસુરીસા નજીક મળી આવ્યો જેને પોલીસે જાણ કરવામાં આવતા પોલીસે ગુનો નોંધી આગળની તપાસ હાથ ધરી છે.
જુનાગઢના કેશોદમાં જીમ સંચાલકનો આપઘાત
રાજ્યમાં આપઘાતના કિસ્સાઓનું પ્રમાણ પણ વધ્યું છે, આજે જૂનાગઢના કેશોદમાં જીમ સંચાલક દિપેશ પેથાણીએ ગળેફાંસો ખાઈ આપઘાત કરી લીધો હતો જોકે મૃતકે આપઘાત કરતા પહેલા એક સ્યૂસાઈડ નોટ લખી જેમાં પોતે માનસિક રીતે કંટાળી ગયો હોવાનો સ્યૂસાઈડ નોટમાં ઉલ્લેખ જોવા મળે છે. મૃતકે આપઘાત પાછળ કોઈ પણ જવાબદાર ન હોવાનો ઉલ્લેખ જોવા મળી રહ્યો છે, બનાવની જાણ પોલીસને કરાતા પોલીસે મૃતદેહને પીએમ અર્થે ખસેડીને આગળની કાર્યવાહી હાથ ધરી હતી.