ક્રાઇમ / Crime: ખોટા કેસમાં ફસાવી દેવાની ધમકી આપી અમદાવાદના લેબર કોન્ટ્રાક્ટરને લૂંટી લેવાયો

• અમદાવાદમાં આજે પણ બની 2 મોટી ક્રાઇમની ઘટના 
• ક્રાઇમ બ્રાન્ચની ઓળખ આપી લેબર કોન્ટ્રાક્ટરને લૂંટી લીધો
• ખોટા કેસમાં ફસાવી દેવાની ધમકી આપી ૬૬ હજાર પડાવી લીધા

અમદાવાદના મકરબા વિસ્તારમાં ત્રણ શખ્સોએ ક્રાઇમ બ્રાન્ચની ઓળખાણ આપી લેબર કોન્ટ્રાક્ટરને ખોટા કેસમાં ફસાવી દેવાની ધમકી આપી ૬૬ હજાર રૂપિયા લૂંટી લીધા હોવાની ઘટના સામે આવી છે. બીજી તરફ સાબરમતી વિસ્તારમાં નકલી પોલીસની ઓળખ આપનાર ઝડપાયો છે.
વેજલપુરના અક્કલદેવ નગરમાં રહેતા હોરિલાલ મૌર્યએ ત્રણ લોકો વિરુદ્ધ ફરિયાદ નોંધાવી છે. હોરિલાલ અને તેમની સાથે રહેતા સુરેશભાઈ બંને આરસીસી લેબર વર્કનું કામકાજ કરે છે.

ગઈ કાલે બપોરના ત્રણ વાગ્યાની આસપાસ મકરબા ખાતે હોરિલાલ પેટ્રોલ પુરાવીને ઘરે જતા હતા ત્યારે ટોરેન્ટ પાવર હાઉસ પાસે પહોંચ્યા તે દરમિયાન બે બાઈક લઈને આવેલ ત્રણ શખ્સોએ હોરિલાલને ઊભા રાખ્યા હતા.

ત્રણ શખ્સોએ આપી ધમકી 

ત્રણેય શખ્સોએ હોરિલાલને કહ્યું કે અમે બધા ક્રાઇમ બ્રાન્ચના માણસો છીએ, તને પોલીસ સ્ટેશન લઇ જઈશું અને તારા પર ખોટા કેસ કરી દઈશું. આમ કહીને એક શખ્સે હોરિલાલની બાઇકની ચાવી કાઢી લીધી હતી. હોરિલાલને ત્રણ શખ્સો બાઈક પર બેસાડી મકરબા રેલવે ફાટકથી કૃષ્ણધામ ઔડાના મકાન પાસે લઇ ગયા હતા.

ત્યારબાદ ત્રણ શખ્સોએ હોરિલાલને અલગ અલગ એટીએમ સેન્ટરમાં લઇ જઈ  તારે ખોટા કેસમાં ન ફસાવું હોય તો અમને ૬૬ હજાર રૂપિયા આપી દે તેવી વાત કરી હતી, જોકે હોરિલાલે કહ્યું કે એટીએમમાંથી માત્ર દસ હજાર રૂપિયા નીકળે છે. ત્રણ શખ્સોએ આવતી કાલે ફોન કરીએ તે જગ્યાએ બીજા રૂપિયા લઇ આવવા માટે તેમને ધમકી આપી હતી.

ત્રણ શખ્સોએ બીજા દિવસે હો‌િરલાલને ફોન કરી અમે લોકો ક્રાઇમ બ્રાન્ચમાંથી વાત કરીએ છીએ એમ કહી બાકીના રૂપિયા લઈ મળવા માટે બોલાવ્યા હતા. હોરિલાલ ડરી ગયા હોવાથી તેમણે પ૬ હજાર રૂપિયા લઈ ત્રણ શખ્સોને આપ્યા હતા. ત્રણ  શખ્સોએ હોરિલાલને ધમકી આપી કે આ વાતની કોઈને જાણ કરતો નહીં, નહિતર બીજા ખોટા કેસમાં ફસાવી દેવાની ધમકી આપીને આરોપીઓ ફરાર થઇ ગયા હતા. હોરિલાલે  ત્રણયે શખ્સો વિરુદ્ધ સરખેજ પોલીસ સ્ટેશનમાં ફરિયાદ નોંધાવતાં પોલીસે ગુનો નોંધી વધુ તપાસ હાથ ધરી છે. 

સાબરમતીમાં નકલી પોલીસની ઓળખ આપનાર શખ્સ ઝડપાયો

બીજી તરફ સાબરમતી વિસ્તારમાં પોલીસની ખોટી ઓળખ આપનાર યુવકને કારચાલકે પોલીસ હવાલે કર્યો છે. મૂળ ઇડરમાં રહેતા કીર્તિરાજસિંહ હાડાએ સુનીલકુમાર પંચાલ વિરુદ્ધ ફરિયાદ નોંધાવી છે. કીર્તિરાજસિંહ તેમના મિત્રો સાથે અંબાજી દર્શન કરવા માટે ગયા હતા. ત્યારબાદ રાતના આઠ વાગ્યાની આસપાસ અંબાજીથી નીકળી અમદાવાદ આવતા હતા.

રાતના બે વાગ્યે કીર્તિરાજસિંહ ત્રાગડ રોડ પાસે પહોંચ્યા ત્યારે એક બાઈક ચાલકે કાર ઊભી રખાવી હતી. બાઈક ચાલકે કાર ઊભી રખાવી કીર્તિરાજસિંહ પાસે ડ્રાઈવિંગ લાઇસન્સ માગતાં તે દારૂ પીધેલી હાલતમાં હતો. કીર્તિરાજસિંહે બાઈકચાલકને મજાક નહીં કરવાનું કહ્યું હતું. બાઈકચાલકે તેની પોલીસ તરીકે ઓળખ આપી હતી. જેથી કીર્તિરાજસિંહે આઈકાર્ડ માગતાં તે ભાગવા જાય તે પહેલાં કીર્તિરાજસિંહે તેને ઝડપી પાડ્યો હતો. ત્યારબાદ કીર્તિરાજસિંહે પોલીસને બોલાવતાં તેની પૂછપરછ કરતાં પોલીસનું ડુપ્લિકેટ આઇકાર્ડ મળી આવ્યું હતું અને તેમાં નામ સુનીલકુમાર પંચાલ હતું. પોલીસે હાલ તેના વિરુદ્ધ ગુનો નોંધી વધુ તપાસ હાથ ધરી છે.