અમદાવાદમાં આજે 3 મહત્વની ક્રાઈમની ઘટના બની હતી. જેમાં પતિએ પત્ની તેમજ બે બાળકોને માર મારીને કાઢી મુક્યા હતા તો પાડોશીએ મહિલાને ફટકારી હોવાની ઘટના પણ પ્રકાશમાં આવી હતી.
‘ઊંચા અવાજે વાત કેમ કરે છે’ કહી પત્ની અને બે બાળકોને કાઢી મૂક્યાં
શહેરના છેવાડે આવેલા અસલાલીમાં રહેતા પતિએ પત્ની તેમજ બે બાળકોને માર મારીને કાઢી મૂકતાં મામલો પોલીસ સ્ટેશન સુધી પહોંચ્યો છે. ઘર કામ કરવા બાબતે સાસુ વહુ વચ્ચે ઝઘડો થયો હતો. જેમાં માતાનું ઉપરાણું લઇને યુવકે તેની પત્નીને માર માર્યો હતો અને ઘરમાંથી કાઢી મૂકી હતી.
ખોખરા વિસ્તારમાં રહેતી ૩૦ વર્ષની ઇન્દિરા સોલંકીએ ખોખરા પોલીસ સ્ટેશનમાં પતિ શૈલેશ, સાસુ ગંગાબહેન અને દિયર રાહુલ વિરુદ્ધ ડોમેસ્ટિક વાયોલન્સ એક્ટ હેઠળ ફરિયાદ કરી છે. ઇન્દિરાનાં લગ્ન વર્ષ ૨૦૧૨માં અસલાલીમાં રહેતા શૈલેશ સાથે થયાં હતાં. ઇન્દિરા બે બાળકો તેમજ પતિ સાસુ અને દિયર સાથે સંયુક્ત પરિવારમાં રહેતી હતી પરંતુ છેલ્લા ચાર મહિનાથી તે તેનાં બે બાળકો સાથે પિયરમાં રહે છે.
ફરિયાદમાં કરેલા આક્ષેપ પ્રમાણે ઇન્દિરા અને ગગાંબહેન વચ્ચે ઘર કામ બાબતે બબાલ થઇ હતી. જેને લઇને શૈલેશ ઇન્દિરા પર ભડક્યો હતો અને મારી માતા સાથે ઊંચા અવાજે કેમ વાત કરે છે તેમ કહીને માર માર્યો હતો. દરમિયાનમાં ગંગાબહેન તેમજ રાહુલે પણ માર માર્યો હતો. શૈલેશે ઇન્દિરાને બે બાળકો સાથે ઘરમાંથી કાઢી મૂકી હતી. પિયરમાં આવી ગયા બાદ પાંચ મહિના સુધી શૈલેશ કે પછી સાસરિયાંનો કોઇ સભ્ય લેવા નહીં આવતા અંતે તેણે ખોખરા પોલીસ સ્ટેશનમાં ફરિયાદ કરી છે. ખોખરા પોલીસે આ મામલે ગુનો નોંધીને તપાસ શરૂ કરી છે.
પાડોશીએ મહિલાને ફટકારી
અમદાવાદઃ શહેરમાં સામાન્ય બાબતે મારામારીની ઘટનાઓ દિવસે ને દિવસે વધી રહી છે ત્યારે વાસણા વિસ્તારમાં છોકરાં રમવા બાબતે પાડોશીએ મહિલાને ગાળો બોલી ગડદાપાટુંનો માર માર્યો હોવાની ઘટના પ્રકાશમાં આવી છે.
વાસણાના યોગેશ્વરનગરમાં રહેતાં દેવિકાબહેન ગુપ્તાએ જોનીભાઈ વાઘેલા વિરુદ્ધ ફરિયાદ નોંધાવી છે. દેવિકાબહેન નહેરુનગર ખાતે એડવીનો હેલ્થ કેરમાં નોકરી કરે છે. તેમને સંતાનમાં એક દીકરી અને એક દીકરો છે.
ગઈ કાલે રાતના આઠ વાગ્યાની આસપાસ દેવિકાબહેન ઘરે હાજર હતાં ત્યારે તેમની બાજુમાં રહેતા જોનીભાઈના ઘર આગળ ચૂલો સળગતો હતો. દેવિકાબહેનનો દીકરો જોનીભાઈની છોકરી સાથે રમતાે હતાે. દેવિકાબહેનનો દીકરો ચૂલામાંથી દેવતા કાઢતો હતો, જેથી જોનીભાઈએ દેિવકાબહેનના ઘરે જઈને કહ્યું કે તમારા છોકરાને ઘરે લઇ જાઓ. જોનીભાઇ આમ કહી દેવિકાબહેનને ગાળો બોલવા લાગ્યા હતા, જેથી દેવિકાબહેને ગાળો બોલવાની ના પાડતાં જોનીભાઈ એકદમ ઉશ્કેરાઈ ગયા હતા અને જોતજોતમાં દેવિકાબહેનને ગડદાપાટુંનો માર મારવા લાગ્યા હતા.
દેવિકાબહેને બૂમાબૂૂમ કરતાં આસપાસના લોકો આવી જતાં વધુ મારમાંથી તેમને છોડાવ્યાં હતાં. દેવિકાબહેને પોલીસને જાણ કર્યા બાદ જોનીભાઈ વિરુદ્ધ વાસણા પોલીસ સ્ટેશનમાં ફરિયાદ નોંધાવતાં પોલીસે ગુનો નોંધી વધુ તપાસ હાથ ધરી છે.
ચાંદખેડામાં ૧૦ જુગારિયાની મુદ્દામાલ સાથે ધરપકડ
અમદાવાદઃ શહેરના ચાંદખેડા વિસ્તારમાં આવેલ પાર્ટી પ્લોટમાં પોલીસે જુગારનો પર્દાફાશ કરીને ૧૦ જુગારિયાની ૮.૬૩ લાખના મુદ્દામાલ સાથે ધરપકડ કરી છે. ચાંદખેડા પોલીસની ટીમને બાતમી મળી હતી કે નીલકંઠ હોટલ ચાર રસ્તા પાસે આવેલ શિલ્પ રિયાલિટી સવિતા ગ્રીન પાર્ટી પ્લોટમાં કેટલાક લોકો જુગાર રમી રહ્યા છે. આ માહિતીના આધારે પોલીસે રેડ કરતાં સ્થળ ઉપર ૧૦ જણા જુગાર રમી રહ્યા હતા, જેથી પોલીસે કોર્ડન કરી તમામને ઝડપી લીધા હતા
ઝડપાયેલામાં આશિષ દલાલી, ધરમસિંહ વાઘેલા, હસમુખ પટેલ, હિરેનભાઈ પટેલ, બિરેનભાઈ પટેલ, પ્રવીણ વાઘેલા, ભાવિક પટેલ, હિતેશ પટેલ, પાર્થ પટેલ સની પટેલની ૮.૬૩ લાખના મુદ્દામાલ સાથે પોલીસે ધરપકડ કરી છે.