આમ તો ક્રિકેટરોને રાજનીતિની સાથે જૂનો સંબંધ છે પછી તે નવજોત સિંહ સિદ્ઘુ ચેતન ચૌહાણ મોહમ્મ્દ અઝહરૂદ્દીન હોય કે પછી કીર્તિ આઝાદ પરંતુ હવે આ લિસ્ટમાં એક નવું નામ જોડાવવા જઇ રહ્યુ છે. ટીમ ઇન્ડિયામાં પોતાની શાનદાર બેટિંગ માટે જાણીતો ઑપનર બેટ્સમેન ગૌતમ ગંભીર હવે રાજનીતિમાં એન્ટ્રી કરવા જઇ રહ્યો છે. સૂત્રોનુસાર ગૌતમ ગંભીર ભારતીય જનતા પાર્ટી (BJP)માં શામેલ થઇને ચૂંટણી લડી શકે છે.
સૂત્રોનુસાર BJP ગૌતમ ગંભીરને આગામી લોકસભાની ચૂંટણી માટે દિલ્હીથી ઉતારવાની તૈયારી કરી રહી છે. જોકે ગંભીરે હજુ પોતાના ક્રિકેટ કરિયરમાંથી રિટાયરમેન્ટ લીધી નથી પરંતુ સૂત્રોનુસાર તે BJPનું આમંત્રણ સ્વીકારી શકે છે. ગૌતમ ગંભીરે પોતાની અંતિમ ટેસ્ટ 2016માં રમી હતી જે પછી તે દિલ્હીની તરફથી રણજી રમી રહ્યો છે.
તમને જણાવી દઇએ કે ગૌતમ ગંભીર તે સમયે ટીમ ઇન્ડિયાનો ભાગ રહી ચૂક્યો છે જે ટીમે ધોનીની કેપ્ટન્સીમાં 2007માં T20 વર્લ્ડ કપ અને 2011માં વર્લ્ડ કપ જીત્યો હતો. બંને ટૂર્નામેન્ટ્સની ફાઇનલમાં ગંભીરે મહત્વપૂર્ણ ઇનિંગ રમી હતી.
ટીમ ઇન્ડિયાની તરફથી 58 ટેસ્ટ અને 147 એકદિવસીય મેચ રમી ચૂકેલો ગંભીરે કુલ 9392 રન કર્યા છે જેમાં 20 સેન્ચુરી શામેલ છે. ગૌતમ ગંભીરની કેપ્ટન્સીમાં KKR 2 વખત IPLનું ટાઇટલ જીતી ચૂકી છે.