હાલમાં રમાયેલી WTC final 2021નું પરિણામ ધાર્યા કરતા અલગ આવ્યુ હતુ. ફેન્સને હતુ કે ભારત જીતી જશે પરંતુ ન્યૂઝીલેન્ડે જીત હાંસલ કરી હતી.
ન્યૂઝીલેન્ડની વૅબસાઇટે કર્યુ કોહલીનું અપમાન
ગળામા પટ્ટો નાંખી દર્શાવાયો કેપ્ટન
ક્રિકેટ ફેન્સ આ તસવીર જોઇ ભડકી ઉઠ્યા
મેદાન પર ખેલાડીઓએ કેવી રીતે રમવુ જોઇએ તેને લઇને કિવી ખેલાડીઓના ઉદાહરણ આપવામાં આવે છે પરંતુ એક વૅબસાઇટે ભારતીય કેપ્ટન વિરાટ કોહલીનું અપમાન કર્યુ છે અને તેને ગુલામ ગણાવ્યો છે. ન્યૂઝીલેન્ડની વૅબસાઇટ TheAccNZએ એક એવી તસવીર પોસ્ટ કરી છે જેને જોઇને ક્રિકેટ ફેન્સ ભડકી જ જશે.
TheAccNZએ પોતાની પોસ્ટમાં એવી તસવીર શૅર કરી છે જેમાં એક મહિલાએ એક માણસના ગળામાં પટ્ટો બાંધ્યો છે અને તે મહિલાને કાઇલ જેમિસન તેમજ પુરુષને વિરાટ કોહલી ગણાવ્યો છે. આ પ્રકારના ખરાબ મજાકથી ભારતીય ક્રિકેટ ફેન્સની લાગણી દુભાઇ છે અને આ તસવીરને અપમાન ગણાવી રહ્યાં છે.
જેમિસને 2 ઇનિંગમાં વિરાટની લીધી વિકેટ
વર્લ્ડ ટેસ્ટ ચેમ્પિયનશીપ ફાઇનલની પહેલી ઇનીંગમાં જેમિસને વિરાટને આઉટ કર્યો અને બીજી ઇનિંગમાં કેચ પકડીને આઉટ કર્યો હતો. જેમિસનની ધારદાર બોલિંગ ટીમ ઇન્ડિયાને ભારે પડી હતી અને પરિણામે ન્યૂઝીલેન્ડ જીતી ગયુ હતુ.
ઇંગ્લેન્ડના સાઉથેમ્પટનમાં રમાયેલી વર્લ્ડ ટેસ્ટ ચેમ્પિયનશિપની ફાઇનલમાં ન્યુઝીલેન્ડ સામે ભારતીય ટીમની હાર બાદ કરોડો ભારતીયોના દિલ તૂટ્યા હતા. ન્યૂઝીલેન્ડ ટીમે ICC વર્લ્ડ ટેસ્ટ ચેમ્પિયનશિપની ફાઈનલમાં ભારતને 8 વિકેટે હરાવી ઈતિહાસ રચી દીધો છે. ટીમ ઈન્ડિયાએ મેચમાં ઘણી જગ્યાએ ભૂલો કરી હતી જેના પરિણામ સ્વરૂપે તેમની પાસેથી વર્લ્ડ ટેસ્ટ ચેમ્પિયનશિપનો તાજ છીનવાયી ગયો હતો. જેથી ટીમ ઈન્ડિયાના કેપ્ટન કોહલી સહિતના અન્ય ખેલાડીઓ ખુબ જ નિરાશ થયા હતા. મેચ બાદ કોહલીએ આ હાર માટે કેટલાક કારણોને જવાબદાર ઠેરવ્યા હતા.
ટેસ્ટ ક્રિકેટના ઈતિહાસમાં પ્રથમ વખત યોજાયેલા WTC ફાઈનલમાં ભારતીય ટીમે પ્રથમ ઈનિંગમાં 217 રન બનાવ્યા હતા. જેના જવાબમાં ન્યૂઝીલેન્ડની ટીમ પ્રથમ ઈનિંગ્સમાં 249 રન બનાવી ઓલઆઉટ થઈ ગઈ હતી. ન્યૂઝીલેન્ડની ટીમને 32 રનની લીડ મળી હતી, બીજી ઈનિંગ્સમાં ભારતીય ટીમ 170 રન બનાવી ઓલઆઉટ થઈ ગઈ હતી અને કીવી ટીમને જીતવા માટે 139 રનનો ટાર્ગેટ આપ્યો હતો. ન્યૂઝીલેન્ડ ટીમે કેપ્ટન વિલિયમસનની અણનમ અડધી સદીની મદદથી 2 વિકેટ ગુમાવીને 139 રનનો ટાર્ગેટ પ્રાપ્ત કર્યો હતો. પ્રથમ વર્લ્ડ ટેસ્ટ ચેમ્પિયનશિપની ફાઇનલમાં જીત મેળવી પોતાનું નામ ઈતિહાસના પાનામાં નોંધાવી દીધું છે.