ભારત અને વેસ્ટઇન્ડિઝ એ વચ્ચે આજે એટલે કે 17 ઓગસ્ટથી ત્રણ દિવસીય પ્રેક્ટિસ મેચ શરૂ થઇ રહી છે. આ પહેલા ટીમ ઇન્ડિયા પાર્ટીના મૂડમાં નજરે પડી. વાત એમ છે કે વેસ્ટઇન્ડિઝના મહાન ખેલાડી બ્રાયન લારાએ ગુરુવારે ડિનર માટે ટીમ ઇન્ડિયાને પોતાના ઘરે આમંત્રિત કરી હતી. આ પાર્ટીમાં વિન્ડીઝ ટીમના ખેલાડીઓ પણ હાજર રહ્યા હતા.
બ્રાયન લારાની ડિનર પાર્ટીની ફોટોઝ વેસ્ટઇન્ડિઝના ઑલરાઉન્ડર ડ્વેન બ્રાવોએ પોતાના ઇન્સ્ટાગ્રામ પર શેર કરી છે. એક ફોટોમાં બ્રાવો યજમાન લારા, ગેઇલ, સુનીલ નરેન અને કીરોન પોલાર્ડ સાથે નજરે પડી રહ્યા છે. બીજી ફોટોમાં કેએલ રાહુલ, રોહિત શર્મા, ચહલ, કેદાર જાધવ, મયંક અગ્રવાલ, અને રવીન્દ્ર જાડેજા સાથે જોવા મળ્યા.
બ્રાવોએ ફોટો શેયર કરતા લખ્યું, ''પોતાના ઘરે અમારા સૌને આમંત્રણ આપવા માટે બ્રાયન લારાનો આભાર, ટીમના સાથી ખેલાડી અને ભારતીય મિત્રો સાથે સમય વિતાવવો હંમેશા શાનદાર હોય છે''.
બ્રાવો ઉપરાંત ભારતના ઓપનિંગ બેટ્સમેન શિખર ધવને પણ બ્રાયન લારા સાથે પોતાની ફોટો ઇન્સ્ટાગ્રામ પર શેયર કરતા લખ્યું, ''લેફ્ટી અને લેફ્ટીનો અલ્ટીમેટ કોમ્બો.'' ટીમ ઇન્ડિયા વેસ્ટઇન્ડિઝ પ્રવાસ પર ક્રિકેટ રમવાની સાથે-સાથે ફરવાની મજા પણ લઇ રહી છે. આ પહેલા ટીમ ઇન્ડિયાના ખેલાડી પોલાર્ડની સાથે પોર્ટ ઓફ સ્પેનમાં બોટ રાઇડનો આનંદ લેતા નજરે પડ્યા હતા.
ભારત અને વેસ્ટઇન્ડીઝની વચ્ચે 2 મેચોની ટેસ્ટ સિરીઝની શરૂઆત 22 ઓગસ્ટથી થઇ રહી છે. પહેલી ટેસ્ટ એન્ટિગાના નોર્થ સાઉન્ડમાં સર વિવિયન રિચર્ડ્સ ક્રિકેટ ગ્રાઉન્ડ પર 26 ઓગસ્ટ દરમિયાન રમવામાં આવશે. બીજી મેચ 30 ઓગસ્ટથી 3 સપ્ટેમ્બર વચ્ચે જમૈકાના કિગ્સટનમાં આયોજિત થશે.