ઋષભ પંતની આ બાઉન્ડ્રીથી સ્ટોક્સ રોષે ભરાઈ ગયો હતો અને જ્યારે તે તેના પછીનો બોલ નાખવા માટે આગળ વધ્યો ત્યારે બોલ તેના હાથથી લપસી ગયો અને આ બોલને જોરથી નિરાશામાં લાત મારી હતી.
ભારત અને ઇંગ્લેન્ડ વચ્ચે ચાર ટેસ્ટ મેચની શ્રેણીની છેલ્લી મેચ અમદાવાદના નરેન્દ્ર મોદી સ્ટેડિયમ ખાતે રમાઇ રહી છે. આ મેચમાં ભારતીય વિકેટકીપર બેટ્સમેન ઋષભ પંતે અને વોશિંગ્ટન સુંદરે ભારતની લાજ બચાવી હતી, એક સમયે ૧૫૩ રનના સ્કોર પર ૬ વિકેટ ગુમાવી દેનારા ભારતનો સ્કોર આજના દિવસની રમતના અંતે સાત વિકેટના નુકસાન પર ૨૯૪ રન નોંધાયો હતો. ઋષભ પંતની ઝડપી સદી અને તેના પછી વોશિંગ્ટન સુંદરની અણનમ અડધી સદીથી ભારતે ઈંગ્લેન્ડ પર ૮૯ રનની નિર્ણાયક લીડ મેળવી લીધી છે. જેમાં સુંદર ૬૦ રન અને અક્ષર પટેલ ૧૧ રન બનાવીને ક્રીઝ પર અણનમ રહ્યા હતા.
જો કે આજે મેચમાં એક સમયે એવો બનાવ બન્યો હતો જેનાથી દેખાઈ રહ્યું હતું કે કઈ રીતે ઉપરાછાપરી બે હારથી ઈંગ્લેન્ડના ક્રિકેટરો માનસિક રીતે હતાશ બની ગયા છે. હકીકતે ઈંગ્લેન્ડનો ઓલરાઉન્ડર બેન સ્ટોક્સ તેની ઓવર નાખી રહ્યો હતો, ત્યારે સામે ક્રીઝ પર ઋષભ પંત બેટિંગ કરી રહ્યો હતો, બેનની ઓવર[ના એક બોલ પર ઋષભ પંતે એક દર્શનીય શૉટ રમીને બાઉન્ડ્રી ફટકારી દીધી, જેનાથી બેન એટલો હતાશ થઈ ગયો કે જ્યારે તે આગલો બોલ નાખવા રનિંગ કરી રહ્યો હતોન ત્યારે બોલ પર તેની ગ્રીપ ઢીલી પડી ગઈ હતી અને દડો તેના હાથમાંથી છૂટી ગયો અને લપસી પડ્યો, જેના પછી દોડી રહેલો બેન સ્ટોક્સ ધૂંધવાઈ ગયો હતો અને તેણે ગબડી રહેલા બોલને લાત મારીને ક્રીઝની બહાર ધકેલી દીધો હતો.
આ ઘટનાનો વીડિયો સોશિયલ મીડિયા પર વાયરલ થઈ રહ્યો છે અને તે જ સમયે ક્રિકેટ પ્રેમીઓ ઈંગ્લેન્ડના ક્રિકેટરોને અમદાવાદની ગરમીમાં શાંત રહેવાની સલાહ આપી રહ્યા છે. જો કે સાથે જ તેઓ એમ પણ કહી રહ્યા છે કે ભારત અને ઈંગ્લેન્ડ વચ્ચેની મેચમાં બેન સ્ટોક્સ હારી ચૂક્યો છે અને તે ઓફિશિયલી પાગલ થઈ ચૂક્યો છે.
આ ઘટના ભારતીય ઇનિંગની 78 મી ઓવરમાં બની છે. ઓવરનો પહેલો બોલ પંતના બેટના બાહરી છોર સાથે ટકરાઇને બાઉન્ડ્રી લાઇનની બહાર પહોં કહી ગયો હતો, આ ઓવરના ત્રીજા બોલ પર પંતે લેગ સાઇડમાં શાર્પ ફોર લગાવી ભારતને ઇંગ્લેન્ડના સ્કોરની બરાબરી પર પહોંચાડી દીધું હતું જેના પછી સ્ટોક્સ તેનું મગજ ગુમાવી બેઠોઅને જ્યારે તે પછીના બોલ માટે આવી રહ્યો હતો, ત્યારે બોલ તેના હાથથી લપસી ગયો અને આ ઘટના બની હતી.
સ્ટોક્સ અહીં પછી અટક્યો નહીં, તેણે ઓવરનો છેલ્લો બોલ વોશિંગ્ટન સુંદરને બીમર તરીકે નાખ્યો, જોકે આ પછી તેણે માફી પણ માંગી. સ્ટોક્સનું આ વલણ જોઈને, કોઈ પણ સમજી શકે છે કે તે કેટલો નિરાશ બની ગયો હતો. જો કે મેચ અગાઉ સ્ટોક્સે મેચના પહેલા દિવસે પત્રકાર પરિષદમાં એમ પણ કહ્યું હતું કે તે તેની ટેસ્ટ કારકિર્દીમાં આનાથી વધુ મુશ્કેલ પરિસ્થિતિઓમાં રમ્યો નથી.