ફ્લોપ / IND vs ENG : ગઇકાલે ભારતનો આ ખેલાડી એવું રમ્યો કે ટીમમાંથી હકાલપટ્ટી લગભગ નક્કી

• કેએલ રાહુલ છેલ્લી બે મેચમાં શૂન્યમાં આઉટ થયો 
• ગઇકાલે ત્રીજી ટી 20 મેચમાં પણ શૂન્ય રને પેવેલિયન પરત ફર્યો 
• ભારતના પૂર્વ ક્રિકેટરો કહી રહ્યા છે કે તેની રમતમાં ટેકનિકલ ખામી છે

ઇંગ્લેન્ડ સામે ચાલી રહેલી ટી 20 શ્રેણીની પહેલી મેચમાં 1 રન અને પછીની બંને મેચમાં શૂન્ય રને આઉટ, આ છેલ્લી વનડે અને ટી 20 શ્રેણીમાં ટીમ ઈન્ડિયા માટે રનનો વરસાદ વરસાવનારો ટીમ ઇન્ડિયાના બેટ્સમેનનો સ્કોર છે, હા અહીં ભારતીય ઓપનર કેએલ રાહુલ વિશે વાત કરવામાં આવી રહી છે જે ઇંગ્લેન્ડ સામેની ટી -20 શ્રેણીની ત્રણ મેચમાં ખૂબ જ ખરાબ રીતે ફ્લોપ સાબિત થયો છે.

છેલ્લી ચારમાંથી ત્રણ ટી -20 ઈનિંગ્સમાં ખાતું ખોલાવ્યા વગર જ આઉટ થયો છે 

કેએલ રાહુલે ત્રણ મેચમાં માત્ર 1 રન બનાવ્યો છે, અને તેની છેલ્લી ચાર ટી -20 ઇનિંગ્સ જોતા તેણે 3 વાર ખાતું પણ ખોલ્યું નથી. કેએલ રાહુલ સતત આવી જ ભૂલો કરી રહ્યો છે અને હવે પૂર્વ ક્રિકેટરો કહે છે કે આ બેટ્સમેનની રમતમાં જ ટેકનિકલ ભૂલો છે.

શું છે ટેકનિકલ ખામીઓ?

પૂર્વ ક્રિકેટર વીવીએસ લક્ષ્મણે સ્ટાર સ્પોર્ટ્સ પરની કોમેન્ટ્રી દરમિયાન કહ્યું કે કેએલ રાહુલ સતત આવી ભૂલો કરી રહ્યો છે. તેનો પગ બહાર આવી રહ્યો નથી અને તેના બેટ અને પેડ વચ્ચે ઘણું અંતર છે. છેલ્લા ત્રણ ઇનિંગ્સમાં કેએલ રાહુલ બે વાર બોલ્ડ થઈ ગયો છે અને તે બંને બોલમાં અંદર જતા જ મુશ્કેલીનો સામનો કરી રહ્યો છે.

શું હવે કેએલ રાહુલને તક મળશે?

પ્રથમ બે ટી 20 મેચોમાં ફ્લોપ થયા બાદ કેએલ રાહુલને ત્રીજી ટી 20 માં પણ તક આપવામાં આવી હતી. ટીમ ઈન્ડિયાએ તેના પર વિશ્વાસ વ્યક્ત કર્યો હતો અને રોહિત શર્માને પ્લેઇંગ ઇલેવનમાં સામેલ કરવામાં આવ્યા હોવા છતાં, તેને ટીમમાંથી બહાર કરવામાં આવ્યો ન હતો. રોહિત શર્મા માટે ત્રીજી ટી -20 માં સૂર્યકુમાર યાદવ રમ્યો ન હતો. જો કે હવે કેએલ રાહુલ સતત ત્રણ મેચમાં ફ્લોપ થઈ ગયો છે અને ચોથી ટી 20 મેચમાં તેનું સ્થાન ભાગ્યે જ જોવા મળી શકે તેમ છે.