કોરોના વાઇરસને કારણે આ વખતે UAE ખાતે યોજાઈ રહેલી IPLમાં ઘણું નવું જોવા મળશે, સ્ટેડિયમમાં દર્શકો નહીં હોય. કદાચ ચોગ્ગા-છોગ્ગા પર ચીયરલિડર્સનો ડાન્સ પણ જોવા નહીં મળે અને હવે એવા સમાચાર મળી રહ્યા છે કે TV પર તમે જે કોમેન્ટ્રી સાંભળશો એ પણ સ્ટેડિયમમાંના કોમેન્ટ્રી બોક્સમાંથી નહીં, પરંતુ 'વર્ક ફ્રોમ હોમ'ના અંદાજમાં સાંભળવા મળશે. આ વખતે IPL સાથે જોડાયેલા મોટા ભાગના કોમેન્ટ્રેટર પોતપોતાના ઘેરથી 'વર્ચ્યુઅલ કોમેન્ટ્રી' કરશે. સ્ટાર સ્પોર્ટ્સે તાજેતરમાં જ આ પ્રયોગ દક્ષિણ આફ્રિકામાં રમાયેલી 3-ટી મેચમાં કર્યો હતો, જે સંપૂર્ણપણે સફળ રહ્યો હતો.
કોરોનાકાળમાં ક્રિકેટ કોમેન્ટ્રી પણ વર્ક ફ્રોમ હોમ
ઇરફાન પઠાણે વડોદરાથી કરી લાઇવ કોમેન્ટ્રી
IPLમાં પહેલીવાર ઘટી આ ઘટના
તાજેતરમાં દક્ષિણ આફ્રિકાના સેન્ચુરિયન પાર્કમાં ત્રણ ટીમ વચ્ચે રમાયેલી એક ચેરિટી મેચમાં ઇરફાન પઠાણ વડોદરાથી, દીપદાસ ગુપ્તા કોલકાતાથી અને સંજય માંજરેકરે મુંબઈથી પોતપોતાના ઘરથી આ મેચની કોમેન્ટ્રી આપી હતી. આ રમતની કોમેન્ટ્રેટરોએ ભારતીય દર્શકોને હિન્દીમાં કોમેન્ટ્રી આપી હતી, જે ભારતથી હજારો કિલોમીટર દૂર રમાઈ રહી હતી.
આ અંગે ઇરફાન પઠાણે, ''આ અનુભવ જાદુથી જરાય ઓછો નહોતો. અમે બહુ જ ચિંતિત હતા, કારણ કે ઇન્ટરનેટની સ્પીડ વધતી-ઓછી થઈ શકતી હતી અને અવાજની ક્વોલિટી પર પણ અસર પડી શકે તેમ હતી. જ્યારે મેચનું લાઇવ ટેલિકાસ્ટ થઈ રહ્યું હોય ત્યારે કંઈ પણ બની શકે તેમ હતું, કારણ કે ટેકનોલોજી સંપૂર્ણપણે તમારા હાથમાં નથી. ભલે એ ચેરિટી મેચ હોય, પરંતુ બધાએ તેને ગંભીરતાથી લીધી હતી.'
હવે સ્ટાર ઇન્ડિયા એવી યોજના બનાવી રહ્યું છે કે IPL માટે પણ કોમેન્ટ્રીના આ અંદાજને ચાલુ રાખવામાં આવે, જેનાથી મેદાન પર પ્રસારણ માટે જરૂરી સ્ટાફની સંખ્યાને નિર્ધારિત કરી શકાય. શક્ય છે કે હિંદી અને ઈંગ્લિશની કોમેન્ટ્રી સ્ટેડિયમમાંથી આપવામાં આવે, પરંતુ અન્ય ભાષાઓ- જેવી કે, તામિલ, કન્નડ, તેલુગુની કોમેન્ટ્રી વર્ચ્યુઅલ કોમેન્ટ્રી બની રહેશે.