ક્રિકેટ / વિશ્વ ક્રિકેટ પર કેટલાય વર્ષો સુધી ભારતનો રહેશે દબદબો, તૈયાર છે ભારતની આ યંગબ્રિગેડ

• ભારતીય ક્રિકેટનું ભવિષ્ય સુરક્ષિત હાથોમાં છે
• ભારત પાસે  વિકલ્પની અછત નથી
• પરિસ્થિતિ મુજબ રમવાની ક્ષમતા ધરાવે છે આ ખેલાડીઓ 

જયારે વાત યંગ અને પ્રતિભાશાળી ક્રિકેટર્સની કરવામાં આવે ત્યારે ભારત હમેશાં ટોપ પર રહ્યું છે, કેમકે ભારતની ઘરેલું ક્રિકેટ અને iplની ગળાકાપ પ્રતિસ્પર્ધામાંથી જો કોઈ ક્રિકેટર ભારતીય ટીમ માટે પસંદ થાય તો એ સ્વાભાવિક વાત છે કે તે ખેલાડી બીજા કોઈ પણ દેશના ખેલાડી કરતા શૈલીમાં ઘણો આગળ હોય.

રાહુલ ચહર    

કોઈપણ ટીમ પાસે એક ચાલક લેગ-સ્પિનર હોવો એ બહુ જ જરૂરી છે, ભારત યુઝ્વેન્દ્ર ચહલ પર બહુ જ આધારિત છે ત્યારે iplમાં મુંબઈ તરફથી રમતો રાહુલ ચહર યુઝ્વેન્દ્ર ચહલનો પરફેક્ટ બેકઅપ વિકલ્પ સાબિત થઇ શકે છે. રાહુલ ચહર અત્યાર સુધી ભારત માટે 3 ટી-20 રમી ચુક્યો છે.

પૃથ્વી શૉ

પૃથ્વી લગાતાર સારું પ્રદર્શન કરી રહ્યો છે. હમણાં જ યોજાયેલી વિજય હજારે ટ્રોફીની આઠ મેચમાં પૃથ્વીએ 827 રન ફટકાર્યા હતા એટલું જ નહીં IPL-14માં પણ દિલ્હી માટે રમતા 166ની તાબડતોડ સ્ટ્રાઈકરેટથી 308 રન ફટકાર્યા.  પૃથ્વી શૉ આવનાર સમયમાં ઓપનરની ભૂમિકામાં ધૂમ મચાવી શકે છે.

રિષભ પંત 

એમ.એસ.ધોનીના સ્થાન પર આવેલા યંગ રિષભ પંતના કરિયરની શરૂઆત આલોચના અને નિરાશાજનક રહી હતી પણ હમણા જ યોજાયેલી ઓસ્ટ્રેલિયાની ટુરમાં પંતની અવિશ્વનીય બેટિંગના લીધે ભારત ઓસ્ટ્રેલિયાને ઓસ્ટ્રેલિયામાં હરાવવામાં સક્ષમ રહ્યું. રિષભ પંત ટેસ્ટ  આઈસીસી રેન્કિંગમાં ટોપ 10માં પ્રવેશ કરનાર પ્રથમ ભારતીય વિકેટકીપર પણ  બન્યો.

દીપક ચહર

iplમાં ચેન્નઈ માટે સદંતર સારું પ્રદર્શનના લીધે દીપક ચહરને ભારતીય ટી20 ટીમમાં જગ્યા મળી અને દીપક ચહરે આ તકને  બંને હાથોથી સ્વીકારી લીધી અને બાંગ્લાદેશ સામે માત્ર 7 રન આપીને 6 વિકેટ ઝડપી ટી-20ના ઈતિહાસમાં એક મેચમાં સર્વશ્રેષ્ઠ બોલિંગ પ્રદર્શન કરનાર ખેલાડી બન્યો. 

રિયાન પરાગ

આસામથી આવતો રિયાન પરાગ IPLમાં રાજસ્થાન રોયલ્સ માટે  છેલ્લા 2 વર્ષથી ફિનિશરની ભૂમિકા ભજવી રહ્યો છે. જયારે રિયાન પરાગે દિલ્હી સામે 50 રન માર્યા ત્યારે એ માત્ર 17 વર્ષનો જ હતો અને IPLના ઇતિહાસમાં આ ઉપલબ્ધી હાંસલ કરનારો સૌથી નાની ઉંમરનો ખેલાડી બન્યો. રિયાન પરાગ ભારત માટે  છઠ્ઠા બોલરનો વિકલ્પ પણ પૂરો પડી શકે છે.

શુભમન ગિલ 
    
વિરાટ કોહલીની સાથે જો કોઈ ક્રિકેટરની તુલના કરવામાં આવે તો એ વાત દર્શાવે છે કે ખેલાડી કેટલો સક્ષમ હશે. સ્થિતિ અનુસાર રમવાની અને પોતાની વિકેટનું મહત્વ કેટલું છે એ સમજવાની આવડત ગિલને બીજા બધા ખેલાડીઓથી અલગ બનાવે છે. ભારતની ટેસ્ટ ટીમમાં ઓપનર તરીકે ગિલનુ પ્રદર્શન દર્શાવે છે કે ગિલ લાંબા સમય સુધી વિશ્વ ક્રિકેટ પર રાજ કરશે.

દીપક હુડ્ડા

ટી 20 ક્રિકેટમાં છઠ્ઠા નંબર પર આવીને થોડા જ સમયમાં મૅચની પરિસ્થિતિ બદલવાની ક્ષમતા રાખનાર ખેલાડી દિપક હુડ્ડા છે. બરોડા માટે છેલ્લા કેટલાય સમયથી ફિનીશરની ભૂમિકામાં યોગદાન આપી રહ્યો છે. ભારતીય ક્રિકેટ ટીમના ભવિષ્યને ઉજ્જવળ બનાવવામાં દિપક ખુબ સારુ યોગદાન આપી શકે છે.